ଓ୍ବାଶିଂଟନ, ୭।୪ : ଆମେରିକା, ବ୍ରିଟେନ ଏବଂ ଅଷ୍ଟ୍ରେଲିଆ କହିଛନ୍ତି ଯେ ନିକଟରେ ଗଠିତ ସୁରକ୍ଷା ସହଯୋଗୀ ’ଓକସ’ ଅଧୀନରେ ଏକ ହାଇପରସୋନିକ କ୍ଷେପଣାସ୍ତ୍ର ନିର୍ମାଣ ପାଇଁ ସେମାନେ ମିଳିତ ଭାବେ କାର୍ଯ୍ୟ କରିବେ। ଭାରତ-ପ୍ରଶାନ୍ତ ମହାସାଗରରେ ଚାଇନାର ବୃଦ୍ଧି ପାଉଥିବା ସାମରିକ କାର୍ଯ୍ୟକଳାପକୁ ଦୃଷ୍ଟିରେ କଡ଼ା ଜବାବ ଦେବାକୁ ତିନି ଦେଶ ଏହି ଘୋଷଣା କରିଛନ୍ତି।
ଆମେରିକାର ରାଷ୍ଟ୍ରପତି ଜୋ ବାଇଡେନ, ବ୍ରିଟିଶ ପ୍ରଧାନମନ୍ତ୍ରୀ ବୋରିସ ଜନସନ ଏବଂ ଅଷ୍ଟ୍ରେଲୀୟ ପ୍ରଧାନମନ୍ତ୍ରୀ ସ୍କଟ ମୋରିସନ ଓକସର ଅଗ୍ରଗତି ବିଷୟରେ ବିଚାର କରିବା ପରେ ଏହି ଯୋଜନା ଘୋଷଣା କରିଛନ୍ତି। ମିଳିତ ବିବୃତ୍ତିରେ ନେତାମାନେ କହିଛନ୍ତି ଯେ ସୂଚନା ବାଣ୍ଟିବା ଏବଂ ପ୍ରତିରକ୍ଷା ନବସୃଜନ ଉପରେ ସହଯୋଗକୁ ତ୍ୱରାନ୍ବିତ କରିବା ସହିତ ହାଇପରସୋନିକ, ଆଣ୍ଟି ହାଇପରସୋନିକ ସିଷ୍ଟମ ଏବଂ ଇଲୋକ୍ଟ୍ରୋନିକ୍ ଯୁଦ୍ଧ କ୍ଷମତା ଉପରେ ଏକ ନୂତନ ତ୍ରିପାକ୍ଷିକ ସହଯୋଗ ପାଇଁ ସେମାନେ ପ୍ରତିଶ୍ରୁତିବଦ୍ଧ।
ଗତ ବର୍ଷ ଚୀନ ଏହି ପରୀକ୍ଷା କରିଥିଲା। ଏହା ଆମେରିକା ପାଇଁ ଚିନ୍ତାର ବିଷୟ ପାଲଟିଥିଲା। ଆମେରିକାର ଜଏଣ୍ଟ୍ ଚିଫ୍ ଅଫ୍ ଷ୍ଟାଫ୍ ଜେନେରାଲ ମାର୍କ ମିଲି ଗତ ବର୍ଷ ଅକ୍ଟୋବରରେ ନିଶ୍ଚିତ କରିଥିଲେ ଯେ ଚାଇନା ଏକ ହାଇପରସୋନିକ କ୍ଷେପଣାସ୍ତ୍ର ପ୍ରଣାଳୀ ପରୀକ୍ଷା କରିଛି। ପରେ ଚାଇନାକୁ ଠିକଣା ଜବାବ ଦେବାକୁ ଆମେରିକା ପକ୍ଷରୁ ଯୋଜନାବଦ୍ଧ ଭାବେ ମିଳିତ ସାମୁଖ୍ୟ ଗଠନ କରାଯାଇଥିଲା।
