ଓ୍ବାଶିଂଟନ୍/ନୂଆଦିଲ୍ଲୀ,୮।୮: ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧବିରତି ଆଣିବା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବାରମ୍ବାର ଦାବି ପରେ, ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ଏକ ବଡ଼ ଦାବି କରିଛନ୍ତି। ରୁବିଓ ଦାବି କରିଛନ୍ତି, ଯେତେବେଳେ ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧ ଆରମ୍ଭ ହୋଇଥିଲା, ସେତେବେଳେ ଆମେରିକା ସିଧାସଳଖ ଏଥିରେ ସାମିଲ ଥିଲା। ଆମେରିକାର ରାଷ୍ଟ୍ରପତି ଟ୍ରମ୍ପ ଦୁଇ ପରମାଣୁ ଅସ୍ତ୍ରଶସ୍ତ୍ର ପଡ଼ୋଶୀଙ୍କ ମଧ୍ୟରେ ଶାନ୍ତି ପ୍ରତିଷ୍ଠା କରିବାରେ ସଫଳ ହୋଇଥିଲେ।
ଟ୍ରମ୍ପ ମେ ୧୦ ତାରିଖରୁ ବାରମ୍ବାର ତାଙ୍କର ଦାବିକୁ ଦୋହରାଇଛନ୍ତି, ସେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ଶେଷ କରିବାରେ ସାହାଯ୍ୟ କରିଥିଲେ ଏବଂ ଉଭୟ ଦେଶକୁ କହିଥିଲେ, ଯଦି ସେମାନେ ସଂଘର୍ଷ ବନ୍ଦ କରନ୍ତି, ତେବେ ଆମେରିକା ସେମାନଙ୍କ ସହିତ ବହୁତ ବାଣିଜ୍ୟ କରିବ। କିନ୍ତୁ ଭାରତ ଲଗାତାର କହି ଆସୁଛି ଯେ, ଉଭୟ ସେନାର ସାମରିକ ଅଭିଯାନ ମହାନିର୍ଦ୍ଦେଶକ (DGMO)ଙ୍କ ମଧ୍ୟରେ ସିଧାସଳଖ ଆଲୋଚନା ପରେ ପାକିସ୍ତାନ ସହିତ ସାମରିକ ମୁକାବିଲା ସମାପ୍ତ କରିବାର ଚୁକ୍ତି ହୋଇଛି।
ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ EWTNର ‘ଦି ୱାଲର୍ଡ ଓଭର’ କାର୍ଯ୍ୟକ୍ରମ ପାଇଁ ଏକ ସାକ୍ଷାତକାରରେ କହିଥିଲେ, ଟ୍ରମ୍ପ ଶାନ୍ତି ପ୍ରତି ପ୍ରତିବଦ୍ଧ ଏବଂ ସେ ‘ଶାନ୍ତିର ରାଷ୍ଟ୍ରପତି’। ଏହି କାରଣରୁ ଯେତେବେଳେ ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧ ହୋଇଥିଲା, ଆମେ ଏଥିରେ ସିଧାସଳଖ ସାମିଲ ହୋଇଥିଲୁ ଏବଂ ରାଷ୍ଟ୍ରପତି ଟ୍ରମ୍ପ ଶାନ୍ତି ସ୍ଥାପନ କରିପାରିଥିଲେ।
ମାର୍କୋ ରୁବିଓ କାମ୍ବୋଡିଆ-ଥାଇଲାଣ୍ଡ, ଆଜରବାଇଜାନ-ଆମେରିଆ, ଡେମୋକ୍ରାଟିକ ରିପବ୍ଲିକ ଅଫ କଙ୍ଗୋ ଏବଂ ରୱାଣ୍ଡା ମଧ୍ୟରେ ସଂଘର୍ଷ ସମେତ ଅନ୍ୟାନ୍ୟ ସଂଘର୍ଷର କଥା ମଧ୍ୟ ଉଲ୍ଲେଖ କରିଥିଲେ ଏବଂ କହିଥିଲେ ଯେ, ଟ୍ରମ୍ପ ସେଗୁଡ଼ିକୁ ସମାଧାନ କରିବାରେ ମଧ୍ୟ ସାହାଯ୍ୟ କରିଥିଲେ। ସେ ଏହି ପଦକ୍ଷେପଗୁଡ଼ିକ ପାଇଁ ଗର୍ବିତ। ଆମେ ଯୁଦ୍ଧକୁ ରୋକିବା ଏବଂ ସମାପ୍ତ କରିବା ପାଇଁ ବହୁତ ସମୟ ଉତ୍ସର୍ଗ କରୁ।
