ନୂଆଦିଲ୍ଲୀ,୨୫।୫: ପାକିସ୍ତାନ ସମ୍ମୁଖରେ ଏଭଳି ଏକ ଦ୍ୱନ୍ଦ୍ୱ ଦେଖାଦେଇଛି, ଯେଉଁଥିରେ ଯଦି ସେ ସ୍ବୀକାର କରେ ତେବେ ବି ଫସିବ ଏବଂ ଯଦି ମନା କରେ ତେବେ ଅଧିକ ସମସ୍ୟାରେ ପଡ଼ିଯିବ। ପ୍ରକୃତରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସପ୍ତାହାନ୍ତରେ ପାକିସ୍ତାନ ସମେତ ଅନେକ ଦେଶ ସହିତ ଏକ ଉଚ୍ଚସ୍ତରୀୟ କନଫରେନ୍ସ କଲ କରିଥିଲେ।
ରିପୋର୍ଟ ଅନୁଯାୟୀ, ଟ୍ରମ୍ପ ଅଧିକରୁ ଅଧିକ ମୁସଲିମ ଦେଶମାନଙ୍କୁ ଅନୁରୋଧ କରିଛନ୍ତି ଯେ ସେମାନେ ଇରାନ ଯୁଦ୍ଧ ପରେ ‘ଆବ୍ରାହାମ ଆକର୍ଡ’ (Abraham Accords) ସହ ଜଡ଼ିତ ହୁଅନ୍ତୁ, ଯାହାର ସିଧାସଳଖ ଅର୍ଥ ହେଉଛି ଇସ୍ରାଏଲକୁ ଆନୁଷ୍ଠାନିକ ମାନ୍ୟତା ଦେବା। ରିପୋର୍ଟ ମୁତାବକ, ଏହି ପ୍ରସ୍ତାବ ପରେ କଲରେ କିଛି ସମୟ ପାଇଁ ନୀରବତା ଛାଇଯାଇଥିଲା।
ପ୍ରକୃତରେ, ପାକିସ୍ତାନର ସମସ୍ୟା ହେଉଛି ଯେ ସେ ଗୋଟିଏ ପଟେ ଆମେରିକା ଏବଂ ଇରାନ ମଧ୍ୟରେ ଶାନ୍ତି ଦୂତର ଭୂମିକା ଗ୍ରହଣ କରିବାକୁ ଚେଷ୍ଟା କରୁଛି, ଅନ୍ୟପଟେ ଟ୍ରମ୍ପଙ୍କ ଏହି ପ୍ରସ୍ତାବ ତାକୁ ଦ୍ୱନ୍ଦ୍ୱାତ୍ମକ ସ୍ଥିତିରେ ପକାଇ ଦେଇଛି। ଯଦି ପାକିସ୍ତାନ ଏହି ପ୍ରସ୍ତାବକୁ ଗ୍ରହଣ କରେ, ତେବେ ତାକୁ ଘରୋଇ ବିରୋଧ ଏବଂ ନିଜର ପାରମ୍ପରିକ ବୈଦେଶିକ ନୀତି ସହ ବୁଝାମଣା କରିବାକୁ ପଡ଼ିବ, ଅପରପକ୍ଷେ ମନା କଲେ ଆମେରିକା ସହ ତାର ସମ୍ପର୍କ ପ୍ରଭାବିତ ହୋଇପାରେ। ଏହି କାରଣରୁ ଏହି ପ୍ରସ୍ତାବ ପାକିସ୍ତାନ ପାଇଁ ଏକ ବଡ଼ କୂଟନୈତିକ ଆହୱାନ ପାଲଟିଛି।
ପାଲେଷ୍ଟାଇନ (ପ୍ରସଙ୍ଗ ପାକିସ୍ତାନର ଜନସାଧାରଣଙ୍କ ପାଇଁ ସେମାନଙ୍କ ଆବେଗ ସହ ସବୁବେଳେ ଜଡ଼ିତ ରହିଆସିଛି। ଏଭଳି ପରିସ୍ଥିତିରେ, କୌଣସି ସ୍ପଷ୍ଟତା ବିନା ଇସ୍ରାଏଲକୁ ଆନୁଷ୍ଠାନିକ ମାନ୍ୟତା ଦେବା ବାରୁଦ ଗଦା ଉପରେ ବସିବା ସଦୃଶ ହେବ, ଯାହା ଯେକୌଣସି ସମୟରେ ବିସ୍ଫୋରକ ରୂପ ନେଇପାରେ।