ଦୁବାଇ,୧୪ା୩: ଇରାନ୍ ବିରୋଧୀ ଯୁଦ୍ଧରେ ଆମେରିକାର ସାମରିକ ବିମାନଗୁଡ଼ିକୁ ତୈଳ ଯୋଗାଉଥିବା ଏକ କେସି-୧୩୫ ଏୟାରକ୍ରାଫ୍ଟ ପଶ୍ଚିମ ଇରାକ୍ରେ ଖସିପଡ଼ିଛି। ବିମାନରେ ନିଅଁା ଲାଗିଯିବାରୁ ସେଥିରେ ଥିବା ୬ କ୍ରିଉ ମେମ୍ବରଙ୍କ ମଧ୍ୟରୁ ୪ ଜଣ ପ୍ରାଣ ହରାଇଛନ୍ତି।
ଯୁଦ୍ଧ ଉପରେ ନଜର ରଖିଥିବା ଆମେରିକାର ସେଣ୍ଟ୍ରାଲ କମାଣ୍ଡ୍ ପକ୍ଷରୁ ଶୁକ୍ରବାର ଜାରି ଏକ ବିବୃତିରେ କୁହାଯାଇଛି, ଆକାଶରେ ଗୋଟିଏ ବିମାନରେ କେସି-୧୩୫ ଏୟାରକ୍ରାଫ୍ଟ ତୈଳ ଭର୍ତ୍ତି କରୁଥିବାବେଳେ ଏହା ଖସିପଡ଼ିଥିଲା। ଏହି ଅଘଟଣର କାରଣ ସ୍ପଷ୍ଟ ହୋଇନାହିଁ। ଏପରି କାହିଁକି ଘଟିଲା ସେନେଇ ତଦନ୍ତ ଚାଲିଛି। ତେବେ ଶତ୍ରୁପକ୍ଷର ଆକ୍ରମଣ ଯୋଗୁ ଏହା ଖସିପଡ଼ିନାହିଁ। ଫେବୃଆରୀ ୨୮ରେ ଯୁଦ୍ଧ ଆରମ୍ଭ ହେବା ପରଠୁ ଆମେରିକୀୟ ବିମାନ ଖସିବାରେ ଏହା ହେଉଛି ଚତୁର୍ଥ ଘଟଣା। ଅନ୍ୟପକ୍ଷେ ତୈଳ ଭର୍ତ୍ତି କରାଯାଇଥିବା ଅନ୍ୟ ବିମାନଟି ସୁରକ୍ଷିତ ଭାବେ ଅବତରଣ କରିଥିବା ଆମେରିକା ବାୟୁସେନା ସ୍ପଷ୍ଟ କରିଛି।
କେସି-୧୩୫ ଷ୍ଟ୍ରାଟୋଟ୍ୟାଙ୍କର ହେଉଛି ଆମେରିକା ବାୟୁସେନାର ଏକ ଏୟାରକ୍ରାଫ୍ଟ, ଯାହାକି ଆକାଶରେ ଅନ୍ୟ ଦୂରଗାମୀ ବିମାନଗୁଡ଼ିକୁ ତୈଳ ଯୋଗାଇଥାଏ। ଏପରି କି ଯୁଦ୍ଧ ସମୟରେ ଆହତ ସୈନ୍ୟମାନଙ୍କୁ ମଧ୍ୟ ଉଦ୍ଧାର କରି ଆମେରିକାକୁ ନେବା ସହ ସର୍ଭିଲାନ୍ସ ମିଶନରେ ନିୟୋଜିତ ହୋଇଥାଏ। ବୋଇଂ ୭୦୭ ବିମାନଟି ୬୦ରୁ ଊର୍ଦ୍ଧ୍ୱ ବର୍ଷ ଧରି ଆମେରିକା ବାୟୁସେନାରେ କାର୍ଯ୍ୟରତ ଥିଲା। ୧୯୬୦ ଦଶକରେ ଏହାର ଶେଷ ବିମାନ ନିର୍ମାଣ କରାଯାଇଥିଲା ବୋଲି ଦକ୍ଷିଣ କୋରିଆର ଏସିଆନ୍ ଇନ୍ଷ୍ଟିଚ୍ୟୁଟ୍ ଫର୍ ପଲିସି ଷ୍ଟଡିଜ୍ର ସୁରକ୍ଷା ବିଶେଷଜ୍ଞ ୟାଙ୍ଗ୍ ଉକ୍ ସୂଚନା ଦେଇଛନ୍ତି।
