ସିଓଲ,୨୮।୭: ଆମେରିକା ରାଜଦୂତଙ୍କ ନିଶକୁ ନେଇ ଦକ୍ଷିଣ କୋରିଆରେ ବିବାଦ ସୃଷ୍ଟି ହୋଇଛି। ରାଜଦୂତ ହ୍ୟାରି ହାରିସ କ୍ଲିନ୍ ସେଭ ହେବା ପରେ ବିବାଦର ସମାପ୍ତ ହେବ ବୋଲି ଆଶା କରାଯାଉଛି। ଦକ୍ଷିଣ କୋରିଆ ସହ ଆମେରିକାର ସାମରିକ ସମ୍ପର୍କ ରହିଛି। ଦକ୍ଷିଣ କୋରିଆରେ ୨୮,୫୦୦ ଆମେରିକୀୟ ସୈନ୍ୟ ଅଛନ୍ତି। କିନ୍ତୁ ଦୁଇ ବର୍ଷ ହେବ ଦୁଇ ଦେଶ ମଧ୍ୟରେ ମତଭେଦ ଦେଖାଦେଇଛି। ଏହି ବିବାଦର କାରଣ ହେଉଛି ଉତ୍ତର କୋରିଆ ଏବଂ ସୁରକ୍ଷା ଖର୍ଚ୍ଚ ଭାଗ ପ୍ରସଙ୍ଗରେ ରହିଛି। ଏହି ପରିସ୍ଥିତିରେ ହ୍ୟାରି ଦକ୍ଷିଣ କୋରିଆରେ ବିବାଦର କେନ୍ଦ୍ରବିନ୍ଦୁ ପାଲଟିଛି। ସେ ମନଇଚ୍ଛା କାର୍ଯ୍ୟ କରୁଥିବା ଅଭିଯୋଗ ହୋଇଛି। ଏପରିକି ତାଙ୍କ ନିଶ ମଧ୍ୟ ବିତର୍କର କେନ୍ଦ୍ରରେ ଥିଲା। ସପ୍ତାହ ଶେଷରେ, ହ୍ୟାରି ସୋସିଆଲ ମିଡିଆରେ ଏକ ଭିଡିଓ ଅପଲୋଡ କରିଥିଲେ। ଭିଡିଓରେ ତାଙ୍କୁ ଏକ ପାରମ୍ପରିକ କୋରିଆ ସେଲୁନରେ କ୍ଲିନ୍ ସେଭ୍ କରୁଥିବା ଦେଖିବାକୁ ମିଳିଥିଲା। ଅନେକ କୋରିଆବାସୀଙ୍କ ପାଇଁ ହ୍ୟାରିସଙ୍କ ନିଶ ଦକ୍ଷିଣ କୋରିଆ ଉପରେ ଜାପାନର ଔପନିବେଶିକ ଯୁଗକୁ ମନେ ପକାଉଥିଲା। ହ୍ୟାରିସଙ୍କ ପରିବାର ପୃଷ୍ଠଭୂମି ହେତୁ ଏପରି ହୋଇଥିଲା। ହ୍ୟାରିଙ୍କ ମାତା ଜାପାନର ଏବଂ ପିତା ଆମେରିକୀୟ ସନ୍ତାନ। ତାଙ୍କ ପିତା ଆମେରିକାର ନୌସେନାରେ ଜଣେ ଅଧିକାରୀ ଥିଲେ।
ସୂଚନାଯୋଗ୍ୟ, ୧୯୧୦ରୁ ୧୯୪୫ ପର୍ଯ୍ୟନ୍ତ ଜାପାନ କୋରିଆ ଉପଦ୍ୱୀପରେ ଶାସନ କରୁଥିଲା। ତେଣୁ ଦକ୍ଷିଣ କୋରିଆରେ ଏବେ ବି ଜାପାନ ଉପରେ ଅସନ୍ତୋଷର ଭାବନା ରହିଛି। ଜୁଲାଇ ୨୦୧୮ଠାରୁ ହ୍ୟାରିସ ସିଓଲରେ ନିଯୁକ୍ତ କରାଯାଇଛି।
