ନୂଆଦିଲ୍ଲୀ,୪ା୧: ଭେନେଜୁଏଲାର ତେଲ କ୍ଷେତ୍ରକୁ ଆମେରିକା ନିଜ ନିୟନ୍ତ୍ରଣକୁ ନେବା ପରେ ଏହା ଭାରତ ପାଇଁ ଏକ ବଡ଼ ସୁବିଧା ଆଣିପାରେ। ବିଶ୍ଳେଷକ ଓ ଶିଳ୍ପ ବିଶେଷଜ୍ଞଙ୍କ ମତରେ, ଏହାଦ୍ୱାରା ଭାରତର ପାଖାପାଖି ୧ ବିଲିୟନ ଡଲାର (ପ୍ରାୟ ୮୩୦୦ କୋଟି ଟଙ୍କା) ମୂଲ୍ୟର ଅଟକି ରହିଥିବା ପାଉଣା ମିଳିବା ସମ୍ଭାବନା ସୃଷ୍ଟି ହୋଇଛି। ଏଥିସହ, ନିଷେଧାଦେଶ ଯୋଗୁଁ ପ୍ରଭାବିତ ଥିବା ତୈଳ ଉତ୍ପାଦନରେ ମଧ୍ୟ ବୃଦ୍ଧି ଘଟିବ।
ଭାରତର ଅଗ୍ରଣୀ ବିଦେଶୀ ଉତ୍ପାଦନକାରୀ ସଂସ୍ଥା ଓଏନ୍ଜିସି ଭିଦେଶ ଲିମିଟେଡ୍ (OVL) ର ଭେନେଜୁଏଲାର ସାନ୍ କ୍ରିଷ୍ଟୋବାଲ୍ ତୈଳ କ୍ଷେତ୍ରରେ ୪୦% ଅଂଶଧନ ରହିଛି। ଭେନେଜୁଏଲା ସରକାର OVLକୁ ଏପର୍ଯ୍ୟନ୍ତ ପ୍ରାୟ ୫୩୬ ମିଲିୟନ ଡଲାରର ଲାଭାଂଶ ଏବଂ ପରବର୍ତ୍ତୀ ସମୟର ପ୍ରାୟ ସମାନ ପରିମାଣର ବକେୟା ଦେବାରେ ବିଫଳ ହୋଇଛନ୍ତି। ଆମେରିକା ନିୟନ୍ତ୍ରଣକୁ ଆସିବା ପରେ ଏହି ୧ ବିଲିୟନ ଡଲାରର ପାଉଣା ଫେରସ୍ତ ମିଳିବାର ସମ୍ଭାବନା ରହିଛି।
ନିଷେଧାଦେଶ ହଟିବା ପରେ OVL ଗୁଜୁରାଟରେ ଥିବା ନିଜର ମୂଳ ସଂସ୍ଥା ONGCରୁ ରିଗ୍ ଏବଂ ଅନ୍ୟାନ୍ୟ ଯନ୍ତ୍ରପାତି ସାନ୍ କ୍ରିଷ୍ଟୋବାଲ୍କୁ ସ୍ଥାନାନ୍ତର କରିପାରିବ। ବର୍ତ୍ତମାନ ଦିନକୁ ୫,୦୦୦ରୁ ୧୦,୦୦୦ ବ୍ୟାରେଲ୍ ଉତ୍ପାଦନ ହେଉଥିବା ଏହି କ୍ଷେତ୍ର ଅଧିକ ଉପକରଣ ସହାୟତାରେ ୮୦,୦୦୦ରୁ ୧,୦୦,୦୦୦ ବ୍ୟାରେଲ୍ ଉତ୍ପାଦନ କରିବାର କ୍ଷମତା ରଖେ।
ଭାରତ ପୂର୍ବରୁ ଭେନେଜୁଏଲାରୁ ପ୍ରତିଦିନ ୪,୦୦,୦୦୦ ବ୍ୟାରେଲ୍ରୁ ଅଧିକ କଞ୍ଚାତେଲ ଆମଦାନୀ କରୁଥିଲା। ନିଷେଧାଦେଶ କୋହଳ ହେଲେ ରିଲାଏନ୍ସ ଇଣ୍ଡଷ୍ଟ୍ରିଜ୍, ନୟାରା ଏନର୍ଜି, IOC ଭଳି ପ୍ରମୁଖ ଭାରତୀୟ ରିଫାଇନାରୀଗୁଡ଼ିକ ପୁଣିଥରେ ଏଠାରୁ ତୈଳ ଆମଦାନୀ କରିପାରିବେ, କାରଣ ଏହି ରିଫାଇନାରୀଗୁଡ଼ିକ ଏହି ପ୍ରକାରର ଭାରୀ କଞ୍ଚାତେଲ ପ୍ରକ୍ରିୟାକରଣ ପାଇଁ ଉପଯୁକ୍ତ।
Kplerର ବରିଷ୍ଠ ଗବେଷକ ନିଖିଲ ଦୁବେଙ୍କ ଅନୁଯାୟୀ, ନିଷେଧାଦେଶ ହଟିଲେ ଭେନେଜୁଏଲା ତୈଳ ଭାରତକୁ ରୁଷୀୟ ତୈଳ ଉପରେ ନିର୍ଭରଶୀଳତା କମାଇବାରେ ଏବଂ ଯୋଗାଣ ସ୍ଥିରତା ବଜାୟ ରଖିବାରେ ସାହାଯ୍ୟ କରିବ।
ଆମେରିକାର ଏହି ପଦକ୍ଷେପ ଭେନେଜୁଏଲା ତେଲ କ୍ଷେତ୍ରରେ ଚାଇନାର ପ୍ରଭାବକୁ ମଧ୍ୟ କମ କରିବ। ବିଶ୍ଳେଷକଙ୍କ ମତରେ, ଆମେରିକା ଭେନେଜୁଏଲାର ତୈଳକୁ ନିଜ ନିୟନ୍ତ୍ରଣରେ ରଖିଲେ OPEC ଉତ୍ପାଦକମାନଙ୍କ ଉପରେ ଏହାର ନିର୍ଭରଶୀଳତା କମିବ। ଟ୍ରମ୍ପ୍ ପ୍ରଶାସନ ବଡ଼ ଆମେରିକୀୟ ତୈଳ କମ୍ପାନୀଗୁଡ଼ିକୁ ଭେନେଜୁଏଲା ଫେରାଇ ଆଣିବାକୁ ଯୋଜନା କରିଛନ୍ତି। ଭେନେଜୁଏଲାରୁ ତୈଳ ପ୍ରବାହ ପୁନଃ ଆରମ୍ଭ ହେଲେ ବିଶ୍ୱ ବଜାରରେ ତୈଳ ଦର ସ୍ଥିର ହେବାର ସମ୍ଭାବନା ରହିଛି।
