ଗୋରଖପୁର: ଶାଶୁ ବାସି ଖାଇବାକୁ ଦେଲେ ବୋଲି କହି ପୋଲିସ ଡାକିଲେ ବୋହୂ। ଉତ୍ତରପ୍ରଦେଶର ଗୋରଖପୁରରେ ଏଭଳି ଚକିତ କଲାଭଳି ଘଟଣା ଦେଖିବାକୁ ମିଳିଛି। ଟିଭି ଦେଖୁଥିବାରୁ ରୋଷେଇ କରିବାକୁ ମନା କରିଥିଲେ ଶାଶୁ। ଏଥିରେ ରାଗିଯାଇ ବୋହୂ ୧୧୨ ନଂରେ ଫୋନ୍ କରି ପୋଲିସକୁ ଡାକିଦେଇଥିଲେ। ପୋଲିସ ସେଠାରେ ପହଞ୍ଚି ବାସ୍ତବତା ଜାଣିବା ପରେ ମୁଣ୍ଡରେ ହାତ ଦେଇଥିଲା। ଏଥିସହ ଉଭୟଙ୍କୁ ବୁଝାସୁଝା କରିଥିଲା। ଆଗାମୀ ଦିନରେ ଏଭଳି କାଣ୍ଡ ଘଟାଇଲେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାଇଥିଲା।
ଗୋରଖପୁରର ଗଗହା ଥାନା ଅଞ୍ଚଳର ଏହି ଘଟଣା। ୪ ଲୋକଙ୍କୁ ନେଇ ପରିବାର ଥିବା ବେଳେ ବାପା ଓ ପୁଅ ବାହାରେ ଚାକିରି କରିଥାନ୍ତି। ଏଣୁ ଘରେ ଶାଶୁବୋହୁ ରହୁଥିଲେ। ସେମାନଙ୍କ ମଧ୍ୟରେ ଛୋଟ କଥାକୁ ନେଇ ପାଟିତୁଣ୍ଡ ହେଉଥିଲା। ହେଲେ ଉକ୍ତଦିନ ଶାଶୁ ବାସି ଖାଇବା ଦେଇଥିବାରୁ ସ୍ବାସ୍ଥ୍ୟାବସ୍ଥା ବିଗିଡ଼ିଥିବା ନେଇ ପୋଲିସ ଆଗରେ ଅଭିଯୋଗ କରିଥିଲେ ବୋହୂ। ସାରାଦିନ ଟିଭି ଦେଖୁଥିବାରୁ ସେ ତାଙ୍କୁ ଠିକ୍ରେ ରୋଷେଇ କରି ଦେଉ ନ ଥିବା କହିଥିଲେ। ଅପରପକ୍ଷେ ଏହା ମିଥ୍ୟା ବୋଲି ଶାଶୁ କହିଥିଲେ। ସେ ପ୍ରତ୍ୟହ ରୋଷେଇ କରି ଗରମ ଖାଇବା ପରସନ୍ତି ବୋଲି କହିଥିଲେ। ଶେଷରେ ପୋଲିସ ଉଭୟଙ୍କ କଥାଶୁଣି ସେମାନଙ୍କୁ ବୁଝାଇ ଘଟଣାର ସମାଧାନ ବାହାର କରିଥିଲା।
