ନୂଆଦିଲ୍ଲୀ,୨୯।୮ (ଅଭୟ ଦାଶ): ଫୋନ୍ପେର ବହୁ ପ୍ରତୀକ୍ଷିତ ସେବା ତଥା ତା’ର ପ୍ଲାଟ୍ଫର୍ମରେ ୟୁପିଆଇ କ୍ରେଡିଟ୍ ଲାଇନ ଆରମ୍ଭ କରିବାକୁ ଘୋଷଣା କରିଛି। ଏପରିକି ଯେଉଁ ଉପଭୋକ୍ତାମାନେ ସେମାନଙ୍କ ବ୍ୟାଙ୍କରୁ କ୍ରେଡିଟ୍ ଲାଇନ ପାଇଥିବେ ଓ ସେମାନେ ବର୍ତ୍ତମାନ ଏହି କ୍ରେଡିଟ ଲାଇନଗୁଡ଼ିକୁ ଫୋନ୍ପେରେ ୟୁପିଆଇ ସହ ଲିଙ୍କ୍ କରିପାରିବେ ଏବଂ ନିରବଚ୍ଛିନ୍ନ ଭାବେ ବ୍ୟବସାୟିକ ପେମେଣ୍ଟ କରିପାରିବେ। ଏହି ବୈଶିଷ୍ଟ୍ୟ ଉପଭୋକ୍ତାମାନଙ୍କୁ ବହୁ ଲକ୍ଷ ବ୍ୟବସାୟୀଙ୍କଠାରୁ ସହଜରେ ବିଭିନ୍ନ ଜିନିଷ କିଣିବା ଏବଂ ସ୍ବଳ୍ପ ମିଆଦୀ ଋଣର ଉପଯୋଗ କରିବାକୁ ସକ୍ଷମ କରିବ। ଯାହାଦ୍ୱାରା ସେମାନଙ୍କ ମାସିକ ବ୍ୟୟକୁ ଭଲ ଭାବେ ପରିଚାଳନା କରିବାରେ ସେମାନଙ୍କୁ ସାହାଯ୍ୟ ହେବ। ସମ୍ପ୍ରତି ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ୟୁପିଆଇ ପରିସରକୁ ସମ୍ପ୍ରସାରିତ କରି ୟୁପିଆଇରେ କ୍ରେଡିଟ ଲାଇନ ନାମକ ଏକ ପୂର୍ବ-ଅନୁମୋଦିତ କ୍ରେଡିଟ ଲାଇନକୁ ଅନ୍ତର୍ଭୁକ୍ତ କରିଛି। ଏହାଦ୍ୱାରା ଉପଭୋକ୍ତାମାନେ ସେମାନଙ୍କ ବ୍ୟାଙ୍କ ମାଧ୍ୟମରେ କ୍ରେଡିଟ ଲାଇନ ପାଇପାରିବେ ଏବଂ ୟୁପିଆଇ ଆପ୍ ମାଧ୍ୟମରେ ଏହାକୁ ବ୍ୟବହାର କରିପାରିବେ। ଏହା ଫଳରେ କ୍ରେଡିଟ ଲାଇନ ବ୍ୟବହାର କରିପାରୁଥିବା ବ୍ୟବସାୟୀଙ୍କ ସଂଖ୍ୟା ଆହୁରି ଦ୍ରୁତଗତିରେ ବୃଦ୍ଧି ପାଇବ। ଉପଭୋକ୍ତାଙ୍କ ସମେତ ଫୋନ୍ପେ ପେମେଣ୍ଟ ଗେଟ୍ୱେରେ ଥିବା ବ୍ୟବସାୟୀମାନଙ୍କୁ ଏହି ବିକଳ୍ପ ଚେକ୍ଆଉଟ ସମୟରେ ସେମାନଙ୍କ ଗ୍ରାହକଙ୍କୁ ପେମେଣ୍ଟ ପାଇଁ ଅତିରିକ୍ତ ସୁବିଧା ପ୍ରଦାନ କରିଥାଏ।
ଏ ସମ୍ପର୍କରେ ଫୋନ୍ପେର ପେମେଣ୍ଟ ମୁଖ୍ୟ ଦୀପ ଅଗ୍ରୱାଲ କହିଛନ୍ତି, ଆମ ପ୍ଲାଟ୍ଫର୍ମରେ ୟୁପିଆଇ କ୍ରେଡିଟ୍ ଲାଇନ ଆରମ୍ଭକରି ଆମେ ବେଶ୍ ଉତ୍ସାହିତ ଅଛୁ। ଏପରିକି ୟୁପିଆଇରେ ରୂପେ କ୍ରେଡିଟ କାର୍ଡର ଅଦ୍ଭୁତପୂର୍ବ ସଫଳତା ପରେ ଏହା ହେଉଛି, ଆମର ଦ୍ୱିତୀୟ ଅଫର। ଯାହା ୟୁପିଆଇରେ କ୍ରେଡିଟ ବ୍ୟବହାରର ସମ୍ଭାବନାକୁ ବହୁଗୁଣିତ କରିବ।
