ବେଙ୍ଗାଲୁରୁ, ୨୯।୨: ଓମେନ୍ସ ପ୍ରିମିୟର ଲିଗ୍ (ଡବ୍ଲ୍ୟୁପିଏଲ୍)ର ବୁଧବାର ଅନୁଷ୍ଠିତ ଏକ ମ୍ୟାଚରେ ୟୁପି ଓ୍ବାରିଅର୍ଜ ୭ ଉଇକେଟରେ ମୁମ୍ବାଇ ଇଣ୍ଡିଆନ୍ସକୁ ପରାସ୍ତ କରିଛି। ହିଲି ମାଥ୍ୟୁସଙ୍କ ଅର୍ଦ୍ଧଶତକ ସହାୟତାରେ ମୁମ୍ବାଇ ଦଳ ୨୦ ଓଭରରେ ୬ ଉଇକେଟ ହରାଇ ୧୬୧ ରନ କରିଥିଲା। ଜବାବରେ କିରନ ନଭଗିରେଙ୍କ ଅର୍ଦ୍ଧଶତକ ସହାୟତାରେ ୟୁପି ୧୬.୩ ଓଭରରେ ୩ ଉଇକେଟ ହରାଇ ୧୬୩ ରନ ସଂଗ୍ରହ କରି ନେଇଥିଲା। ବିଜୟ ସହ ୟୁପି ଦଳ ମୁମ୍ବାଇର କ୍ରମାଗତ ୩ ବିଜୟରେ ବ୍ରେକ୍ ଲଗାଇଛି। ଏହା ପୂର୍ବରୁ ୨ଟି ମ୍ୟାଚରେ ମୁମ୍ବାଇ ବିଜୟୀ ହୋଇଥିଲା। ହରମନପ୍ରୀତ କୌର ଆହତ ଥିବାରୁ ତାଙ୍କ ସ୍ଥାନରେ ନାଟ୍ ସ୍କିଭର ବ୍ରଣ୍ଟ ୟୁପି ବିପକ୍ଷ ମ୍ୟାଚରେ ମୁମ୍ବାଇ ପକ୍ଷରୁ ଅଧିନାୟିକା ଦାୟିତ୍ୱ ତୁଲାଇଥିଲେ। ୟୁପି ପକ୍ଷରୁ ନଭଗିରେ ୩୧ ବଲ୍ରୁ ସର୍ବାଧିକ ୫୭ ରନ କରିଥିବାବେଳେ ଗ୍ରେସ ହାରିସ ୧୭ ବଲ୍ରୁ ୩୮ ରନରେ ଅପରାଜିତ ରହିଥିଲେ।
ଟସ୍ ହାରି ବ୍ୟାଟିଂ ଆମନ୍ତ୍ରଣ ପାଇଥିବା ମୁମ୍ବାଇ ଓପନିଂ ଯୋଡ଼ିରେ ୫୦ ରନ ଯୋଗକରି ଭଲ ପ୍ଲାଟଫର୍ମ ପ୍ରସ୍ତୁତ କରିଥିଲା। ୟାସ୍ତିକା ଭାଟିଆ ୨୬ ରନ କରି ଆଉଟ ହେବାରୁ ଯୋଡ଼ି ଭାଙ୍ଗିଥିଲା। କାମଚଳା ଅଧିନାୟିକା ବ୍ରଣ୍ଟ ୧୪ ବଲ୍ରୁ ୧୯ ରନକରି ରନ୍ଆଉଟ ହେବା ଦଳକୁ ଶକ୍ତ ଧକ୍କା ପହଞ୍ଚାଇଥିଲା। ଓପନର ହିଲି ମାଥ୍ୟୁସ ଅର୍ଦ୍ଧଶତକ ହାସଲ କରିଥିଲେ ଏବଂ ଦଳ ପକ୍ଷରୁ ସର୍ବାଧିକ ୫୫ ରନ ସ୍କୋର କରିଥିଲେ। ୟୁପିର ୩ ମ୍ୟାଚରୁ ଏହାଥିଲା ପ୍ରଥମ ବିଜୟ।
ସଂକ୍ଷିପ୍ତ ସ୍କୋର
ମୁମ୍ବାଇ ଇଣ୍ଡିଆନ୍ସ ୨୦ ଓଭରରେ ୧୬୧/୬ (ହିଲି ମାଥ୍ୟୁସ-୫୫, ୟାସ୍ତିକା ଭାଟିଆ-୨୬, ଅଞ୍ଜଳି ସର୍ଭାନି-୧/୩୮, ଗ୍ରେସ ହାରିସ-୧/୨୦, ସୋଫି ଏକଲେଷ୍ଟୋନ-୧/୨୫, ଦୀପ୍ତି ଶର୍ମା-୧/୪୦, ରାଜେଶ୍ୱରୀ ଗାଏକ୍ୱାଡ୍-୧/୩୮)। ୟୁପି ଓ୍ବାରିଅର୍ଜ ୧୬.୩ ଓଭରରେ ୧୬୩/୩ (କିରନ ନଭଗିରେ-୫୭, ଗ୍ରେସ ହାରିସ-୩୮*, ଆଲିସା ହିଲି-୩୩, ଇସି ଓ୍ବଙ୍ଗ-୨/୩୦, ଆମେଲିଆ କେର-୧/୩୪)।
