ନୂଆଦିଲ୍ଲୀ, ୧୨।୧୦: ଚାଷୀ ଦିନରାତି ପରିଶ୍ରମ କରି ନିଜ ପରିବାରର ଗୁଜୁରାଣ ମେଣ୍ଟାଇଥାନ୍ତି। କିନ୍ତୁ ବେଳେବେଳେ ଏକ ଦୁର୍ଘଟଣା ପୂରା ପରିବାରର ଜୀବନକୁ ବଦଳାଇ ଦେଇଥାଏ। ପରିବାରର ମୁଖ୍ୟ ରୋଜଗାରକାରୀ କୃଷକଙ୍କ ଦୁର୍ଘଟଣାରେ ମୃତ୍ୟୁ ହେଲେ କିମ୍ବା ସେ ସ୍ଥାୟୀ ଭାବେ କାମ କରିବାକୁ ଅକ୍ଷମ ହୋଇଗଲେ, ପରିବାର ଆଗରେ ଆର୍ଥିକ ସଙ୍କଟ ଦେଖାଦେଇପାରେ। ଏପରି କଠିନ ପରିସ୍ଥିତିରେ ଚାଷୀ ଓ ତାଙ୍କ ପରିବାରକୁ ଆର୍ଥିକ ସହାୟତା ଯୋଗାଇବା ପାଇଁ ଉତ୍ତରପ୍ରଦେଶ ସରକାରଙ୍କ ପକ୍ଷରୁ ମୁଖ୍ୟମନ୍ତ୍ରୀ କୃଷକ ଦୁର୍ଘଟଣା କଲ୍ୟାଣ ଯୋଜନା ରହିଛି। ଏହି ଯୋଜନା ଅଧୀନରେ ଯୋଗ୍ୟ ବ୍ୟକ୍ତିଙ୍କୁ ସର୍ବାଧିକ ୫ ଲକ୍ଷ ଟଙ୍କା ପର୍ଯ୍ୟନ୍ତ ସହାୟତା ମିଳିପାରେ।
କେଉଁମାନେ ପାଇପାରିବେ ଏହି ଯୋଜନାର ଲାଭ?
ଏହି ଯୋଜନାର ଲାଭ କେବଳ ଜମି ମାଲିକ କୃଷକଙ୍କ ପାଇଁ ସୀମିତ ନୁହେଁ। ଅନ୍ୟ କେତେକ ଯୋଗ୍ୟ ବର୍ଗର ଲୋକ ମଧ୍ୟ ଏଥିରେ ସାମିଲ ହୋଇପାରନ୍ତି।
-ଜମିରେ ଅଂଶୀଦାର ଥିବା କୃଷକ।
-ପଟ୍ଟାରେ ଜମି ନେଇ ଚାଷ କରୁଥିବା ବ୍ୟକ୍ତି।
-ଭାଗଚାଷ କରୁଥିବା କୃଷକ।
-କୃଷକ ପରିବାରର ଯୋଗ୍ୟ ରୋଜଗାରକାରୀ ସଦସ୍ୟ
ତେବେ ଦୁର୍ଘଟଣା ସମୟରେ ସମ୍ପୃକ୍ତ ବ୍ୟକ୍ତିଙ୍କ ବୟସ ୧୮ରୁ ୭୦ ବର୍ଷ ମଧ୍ୟରେ ହୋଇଥିବା ଆବଶ୍ୟକ। ଯୋଜନାର ନିୟମ ଅନୁଯାୟୀ ଯୋଗ୍ୟତା ଯାଞ୍ଚ ପରେ ହିଁ ସହାୟତା ମିଳିଥାଏ।
-ଦୁର୍ଘଟଣାରେ ମୃତ୍ୟୁ: ସର୍ବାଧିକ ୫ ଲକ୍ଷ ଟଙ୍କା ପର୍ଯ୍ୟନ୍ତ ସହାୟତା ମିଳିପାରେ।
-ସମ୍ପୂର୍ଣ୍ଣ ଶାରୀରିକ ଅକ୍ଷମତା: ଯୋଗ୍ୟ ମାମଲାରେ ୫ ଲକ୍ଷ ଟଙ୍କା ପର୍ଯ୍ୟନ୍ତ ମିଳିପାରେ।
-ଦୁଇ ହାତ, ଦୁଇ ଗୋଡ଼ କିମ୍ବା ଦୁଇ ଆଖିର କ୍ଷତି: ଏପରି କ୍ଷେତ୍ରରେ ମଧ୍ୟ ୫ ଲକ୍ଷ ଟଙ୍କା ପର୍ଯ୍ୟନ୍ତ ସହାୟତାର ବ୍ୟବସ୍ଥା ରହିଛି।
-ଗୋଟିଏ ହାତ, ଗୋଟିଏ ଗୋଡ଼ କିମ୍ବା ଗୋଟିଏ ଆଖିର କ୍ଷତି: ଏଥିପାଇଁ ୨.୫ ଲକ୍ଷ ଟଙ୍କା ପର୍ଯ୍ୟନ୍ତ ସହାୟତା ମିଳିପାରେ।
-ଅନ୍ୟ ପ୍ରକାରର ସ୍ଥାୟୀ ଦିବ୍ୟାଙ୍ଗତା: ନିର୍ଦ୍ଧାରିତ ନିୟମ ଅନୁସାରେ ଆର୍ଥିକ ସହାୟତା ଦିଆଯାଇପାରେ।
ଏହି ଯୋଜନାର ଲାଭ ପାଇବା ପାଇଁ ଦୁର୍ଘଟଣା ଘଟିବାର ୪୫ ଦିନ ମଧ୍ୟରେ ଆବେଦନ କରିବାକୁ ପଡ଼ିଥାଏ। ତେବେ କେତେକ ବିଶେଷ ପରିସ୍ଥିତିରେ ଜିଲାପାଳ ଅତିରିକ୍ତ ସମୟ ଦେଇପାରନ୍ତି। ତେଣୁ ଦୁର୍ଘଟଣା ଘଟିଲେ ପରିବାର ପକ୍ଷରୁ ବିଳମ୍ବ ନକରି ଆବେଦନ ପ୍ରକ୍ରିୟା ବିଷୟରେ ତଥ୍ୟ ସଂଗ୍ରହ କରିବା ଉଚିତ।