ଭଞ୍ଜନଗର, ୨୭।୮(ବାବୁଲା ପ୍ରଧାନ): ଗଛ ଓ ମଣିଷର ସମ୍ପର୍କକୁ ଦୃଢ଼ କରିବା ସହ ପରିବେଶ ସୁରକ୍ଷାର ବାର୍ତ୍ତା ଦେବା ଲକ୍ଷ୍ୟରେ ରାକ୍ଷୀପୂର୍ଣ୍ଣିମା ଅବସରରେ ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟରେ ନିଆରା ଢଙ୍ଗରେ ରାକ୍ଷୀ ପୂର୍ଣ୍ଣିମା ପାଳିତ ହୋଇଯାଇଛି। ଘୁମୁସର ଉତ୍ତର ବନଖଣ୍ଡ ଏବଂ ମହାବିଦ୍ୟାଳୟର ଜାତୀୟ ସେବା ଯୋଜନା (ଏନଏସଏସ) କୋ-ୟୁନିଟ ଓ ମହିଳା ଶାଖାର ମିଳିତ ଉଦ୍ୟମରେ ଗୁରୁବାର ଏହି କାର୍ଯ୍ୟକ୍ରମ ହୋଇଥିଲା।
ଏହି ଅବସରରେ ଛାତ୍ରୀଛାତ୍ର, ଅତିଥି ଓ ବନ ସୁରକ୍ଷା ସମିତିର କର୍ମକର୍ତ୍ତାମାନେ ମିଳିତ ଭାବେ ମହାବିଦ୍ୟାଳୟ ପରିସରରେ ନିମ ଗଛକୁ ରାକ୍ଷୀ ବାନ୍ଧିଥିଲେ। ଏଥିସହ ଚାରାରୋପଣ କରାଯାଇ ବୃକ୍ଷର ସୁରକ୍ଷା ଓ ଯତ୍ନ ନେବା ସହ ପରିବେଶ ସୁରକ୍ଷା ପାଇଁ ସମସ୍ତେ ସଂକଳ୍ପ ନେଇଥିଲେ। କାର୍ଯ୍ୟକ୍ରମରେ ମହାବିଦ୍ୟାଳୟ ଅଧ୍ୟକ୍ଷ ଡ. ଗଗନ ବିହାରୀ ପୁରୋହିତ, ଏସିଏଫ ବିମଳ କୁମାର ପ୍ରଧାନ, ଖଲ୍ଲିକୋଟ ବିଶ୍ୱବିଦ୍ୟାଳୟର ପ୍ରାଧ୍ୟାପିକା ଡ ରଶ୍ମିତା ପାଢି, ମୁଜାଗଡ଼ ରେଞ୍ଜର ସରୋଜ କୁମାର ମହାନ୍ତି ଓ ମହାବିଦ୍ୟାଳୟ ପ୍ରଶାସନିକ ଅଧିକାରୀ କୁମୁଦ ଚନ୍ଦ୍ର ମହାପାତ୍ର ପ୍ରମୁଖ ଅତିଥି ଭାବେ ଯୋଗଦେଇଥିଲେ।
ଏହି ଅବସରରେ ଅତିଥିମାନେ ମାନବ ସମାଜ ପାଇଁ ବୃକ୍ଷର ଆବଶ୍ୟକତା, ପରିବେଶ ସୁରକ୍ଷା ଏବଂ ବୃକ୍ଷ ସୁରକ୍ଷାରେ ଛାତ୍ରୀଛାତ୍ରଙ୍କ ଭୂମିକା ଉପରେ ମତବ୍ୟକ୍ତ କରିଥିଲେ। ରାକ୍ଷୀ ପୂର୍ଣ୍ଣିମା ଭଳି ପବିତ୍ର ଦିନରେ ଗଛକୁ ରାକ୍ଷୀ ବାନ୍ଧିବା ପରିବେଶ ସୁରକ୍ଷା ପାଇଁ ଏକ ମହତ୍ୱ ପଦକ୍ଷେପ ବୋଲି ସେମାନେ କହିଥିଲେ। ଅନ୍ୟମାନଙ୍କ ମଧ୍ୟରେ ଇତିହାସ ବିଭାଗର ମୁଖ୍ୟ ଅଧ୍ୟାପକ ଡ. ରବୀନ୍ଦ୍ର ମିଶ୍ର, ଏନ୍ସିସି ନାଭାଲ ସିଟିଓ ବିଦେଶୀ ରାଉତ, ବଟନି ବିଭାଗ ମୁଖ୍ୟ ଅଧ୍ୟାପିକା ସୁନିତା ରାଣୀ ଖଣ୍ଡୁଆଳ, ସେଲ୍ଫ ଡିଫେନ୍ସ ସଂଯୋଜିକା ଅଧ୍ୟାପିକା ସ୍ମରଣିକା ପାଢ଼ୀ ପ୍ରମୁଖ ଯୋଗଦେଇଥିଲେ। କାର୍ଯ୍ୟକ୍ରମ ପରିଚାଳନାରେ ବନପାଳ ବବୁଲ ସେଠୀ, ବନରକ୍ଷୀ ବସନ୍ତ ସାହୁ, ସୁକାନ୍ତି ସାବତ, ଏନଏସଏସ କୋ-ୟୁନିଟ ଅଧିକାରୀ ବି. ପ୍ରଧାନ, ମହିଳା ଶାଖା ଅଧିକାରିଣୀ ସସ୍ମିତା ଦାସ, ଛାତ୍ରୀ ସୁନିତା ବେହେରା ଓ ପାୟଲ ରାଉତ, ଛାତ୍ର ରଞ୍ଜନ ନାଇକ, ନୀଳକଣ୍ଠ ପ୍ରଧାନ, ବନକର୍ମଚାରୀ
ପ୍ରତାପ ସ୍ବାଇଁ, ସରୋଜ ପାତ୍ର, ମିଥୁନ ପ୍ରଧାନ ଏବଂ ବନ ସୁରକ୍ଷା ସମିତିର କର୍ମକର୍ତ୍ତାମାନେ ସହଯୋଗ କରିଥିଲେ।