ନୂଆଦିଲ୍ଲୀ,୧୬।୩: ବିଶ୍ୱ ଅର୍ଥନୀତିରେ ଯୁଦ୍ଧ ଓ ଅସ୍ଥିରତା ମଧ୍ୟରେ ଭାରତରୁ ଆସିଛି ଏକ ଆଶ୍ୱସ୍ତିକର ଖବର। ଦେଶରେ ବେକାରୀ ହାରରେ ସାମାନ୍ୟ ହ୍ରାସ ଘଟିଥିବା ପରିସଂଖ୍ୟାନ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି।
ମନ୍ତ୍ରଣାଳୟର ସଦ୍ୟତମ ତଥ୍ୟ ଅନୁଯାୟୀ, ଦେଶର ମୋଟ ବେକାରୀ ହାର ଏବେ ୪.୯%। ବିଶେଷ କରି ସହରାଞ୍ଚଳରେ ନିଯୁକ୍ତି ସୁଯୋଗ ବଢ଼ିଥିବା ବେଳେ ଗ୍ରାମାଞ୍ଚଳରେ ସ୍ଥିତି ସ୍ଥିର ରହିଛି।”
ନ୍ୟାସନାଲ ଷ୍ଟାଟିଷ୍ଟିକ୍ସ ଅଫିସ (NSO) ଦ୍ୱାରା ପ୍ରକାଶିତ ‘ପିରିୟଡିକ ଲେବର ଫୋର୍ସ ସର୍ଭେ’ ଅନୁଯାୟୀ, ୧୫ ବର୍ଷରୁ ଉର୍ଦ୍ଧ୍ୱ ବୟସ୍କ ବ୍ୟକ୍ତିଙ୍କ ମଧ୍ୟରେ କାର୍ଯ୍ୟ କରୁଥିବା ଜନସଂଖ୍ୟା ଅନୁପାତ (WPR) ୫୩.୨%ରେ ସ୍ଥିର ରହିଛି।
ଏହି ରିପୋର୍ଟର ସବୁଠାରୁ ସକାରାତ୍ମକ ଦିଗ ହେଉଛି ମହିଳାମାନଙ୍କ ଅଂଶଗ୍ରହଣ। ମହିଳା ଶ୍ରମ ଶକ୍ତି ଅଂଶଗ୍ରହଣ ହାର (LFPR) ବୃଦ୍ଧି ପାଇ ୩୫.୩% ହୋଇଛି। ଅନ୍ୟପଟେ, ମହିଳା ବେକାରୀ ହାର ଜାନୁଆରୀରେ ୫.୬% ଥିବା ବେଳେ ଫେବୃଆରୀରେ ତାହା ୫.୧%କୁ ଖସି ଆସିଛି।
