ନୂଆଦିଲ୍ଲୀ,୭।୨: ଜମ୍ମୁ-କଶ୍ମୀର ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଶୁକ୍ରବାର ବିଧାନସଭାରେ ୨୦୨୬-୨୭ ଆର୍ଥିକ ବର୍ଷ ପାଇଁ ୧.୨୭ ଲକ୍ଷ କୋଟି ଟଙ୍କାର ବଜେଟ୍ ଉପସ୍ଥାପନ କରିଛନ୍ତି । ମୁଖ୍ୟମନ୍ତ୍ରୀ ଅବଦୁଲ୍ଲା କହିଛନ୍ତି ଯେ ଏହି ଆର୍ଥିକ ଯୋଜନା କେନ୍ଦ୍ରଶାସିତ ଅଞ୍ଚଳରେ ସ୍ଥାୟୀ ଅଭିବୃଦ୍ଧି, ସାମାଜିକ ସଦ୍ଭାବ ଏବଂ ଆର୍ଥିକ ସମୃଦ୍ଧି ପାଇଁ ଏକ ଦୃଢ଼ ମୂଳଦୁଆ ସ୍ଥାପନ କରିବା ଲକ୍ଷ୍ୟ ରଖିଛି । ସେ କହିଛନ୍ତି ଯେ ତାଙ୍କ ସରକାର ନିବେଶ, ନବସୃଜନ ଏବଂ ଅଂଶଗ୍ରହଣମୂଳକ ଶାସନକୁ ପ୍ରୋତ୍ସାହିତ କରି ଜମ୍ମୁ କଶ୍ମୀରକୁ ଏକ ଆଧୁନିକ, ପ୍ରଗତିଶୀଳ ଏବଂ ଆର୍ଥିକ ଦୃଷ୍ଟିରୁ ସକ୍ରିୟ ଅଞ୍ଚଳରେ ପରିଣତ କରିବାକୁ ପ୍ରତିବଦ୍ଧ ।
ଏହା ସହିତ, ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ୨୦୨୬-୨୭ ବଜେଟରେ ୨୩,୮୦୦ ସରକାରୀ ପଦବୀ ପାଇଁ ଦ୍ରୁତ ନିଯୁକ୍ତି ଘୋଷଣା କରିଛନ୍ତି, ଯାହା ବେକାର ଯୁବତୀଯୁବକଙ୍କ ମୁହଁରେ ହସ ଫୁଟାଇଛି । ଏହି ଘୋଷଣା କେବଳ ନିଯୁକ୍ତିର ଦ୍ୱାର ଖୋଲିନାହିଁ ବରଂ ରାଜ୍ୟରେ ଏକ ସ୍ୱଚ୍ଛ ଏବଂ ସମୟୋଚିତ ନିଯୁକ୍ତି ପ୍ରକ୍ରିୟା ପାଇଁ ଆଶା ସୃଷ୍ଟି କରିଛି ।
ମୁଖ୍ୟମନ୍ତ୍ରୀ ତାଙ୍କ ବଜେଟ୍ ଭାଷଣରେ ସ୍ପଷ୍ଟ ଭାବରେ କହିଥିଲେ ଯେ ୨,୮୦୦ ଗେଜେଟେଡ୍, ୧୪,୦୦୦ଅଣ-ଗେଜେଟେଡ୍ ଏବଂ ୭,୦୦୦ ଶ୍ରେଣୀ-IV (ଚତୁର୍ଥ ଶ୍ରେଣୀ) ପଦବୀ ସମୟସୀମା ମଧ୍ୟରେ ପୂରଣ କରାଯିବ। ଏହି ନିଯୁକ୍ତି JKSSB ଏବଂ JKPSC ଭଳି ଏଜେନ୍ସି ମାଧ୍ୟମରେ ଯୋଗ୍ୟତା ଆଧାରିତ ଏବଂ ସ୍ୱଚ୍ଛ ଉପାୟରେ କରାଯିବ।
