ଯାଜପୁର ଅଫିସ/ପ୍ରୀତିପୁର(ଡି.ଏନ.ଏ.) ୧୦ା୧୦: ଯାଜପୁର ଜିଲାରେ ୨୬୦୦ରୁ ଊର୍ଦ୍ଧ୍ୱ ଅଙ୍ଗନଓ୍ବାଡି କେନ୍ଦ୍ର ରହିଛି। ସେଥିରୁ କେତେକ କେନ୍ଦ୍ର ଅତି ପୁରାତନ କ୍ଲବ ଘର ଓ ସ୍କୁଲ ତଥା ଅଙ୍ଗନଓ୍ବାଡି କର୍ମୀଙ୍କ ଘରେ ଚାଲିଛି। ସେଥିମଧ୍ୟରୁ ଅଧିକାଂଶ ଅତି ବିପଦସଙ୍କୁଳ ବୋଲି ଅଭିଭାବକମାନେ କହିଛନ୍ତି। ସେଥିପାଇଁ ସେମାନେ ନିଜ ପିଲାମାନଙ୍କୁ ସେହି କେନ୍ଦ୍ରକୁ ପଠାଇବାକୁ ନାରାଜ ହେଉଛନ୍ତି। ସେଥିମଧ୍ୟରୁ ବିଞ୍ଝାରପୁର ବ୍ଲକରେ ନିଜସ୍ବ ଗୃହ ନ ଥିବା ୧୪୧ଟି କେନ୍ଦ୍ରର ଦୟନୀୟ ସ୍ଥିତିକୁ ଏଠାରେ ଉଦାହରଣ ଭାବେ ନିଆଯାଇପାରେ। ଏହି ବ୍ଲକର କପିଳା ପଞ୍ଚାୟତ ସାମଲସାହିରେ ଏକ ଭଙ୍ଗା ଆଜବେଷ୍ଟସ ସ୍କୁଲ ବାରଣ୍ଡାରେ କୁନି କୁନି ପିଲାମାନେ ବସି ପାଠ ପଢୁଥିବା ଦେଖିବାକୁ ମିଳିଛି।
ବିଞ୍ଝାରପୁର ବ୍ଲକର ୨୯ ପଞ୍ଚାୟତରେ ମୋଟ ୨୯୫ ଅଙ୍ଗନଓ୍ବାଡି କେନ୍ଦ୍ର ରହିଛି। ସେଥିମଧ୍ୟରୁ ମାତ୍ର ୧୫୪ କେନ୍ଦ୍ରର ନିଜସ୍ବ ଘର ରହିଛି। ୪୮ କେନ୍ଦ୍ରର ଗୃହ ନିର୍ମାଣାଧୀନ ଅବସ୍ଥାରେ ରହିଥିବାବେଳେ ୧୮ କେନ୍ଦ୍ର ନିର୍ମାଣ ନିମନ୍ତେ ସ୍ଥାନ ନିରୂପଣ ହୋଇପାରୁ ନାହିଁ। ଏହି ୨୯୫ କେନ୍ଦ୍ରରେ ୭୧୮୮ ଜଣ ୬ ମାସରୁ ୩ ବର୍ଷର ଶିଶୁଙ୍କୁ ଶୁଖିଲା ଖାଦ୍ୟ ପ୍ରଦାନ କରାଯାଉଛି। ୬୯୬୪ ଜଣ ୩ ବର୍ଷରୁ ୬ ବର୍ଷ ବୟସ୍କ ଶିଶୁଙ୍କୁ ରନ୍ଧାଖାଦ୍ୟ ପ୍ରଦାନ କରାଯାଉଛି। ଏହି କେନ୍ଦ୍ରଗୁଡିକୁ ପରିଚାଳନା ନିମନ୍ତେ ୧୩ ଜଣ ସୁପରଭାଇଜର ନିଯୁକ୍ତି ପାଇଛନ୍ତି। ସେଥିମଧ୍ୟରୁ ଜରି, ଫତେପୁର, ଜଗନ୍ନାଥପୁର ଓ ପ୍ରୀତିପୁର ସେକ୍ଟରର ସୁପରଭାଇଜର ପଦ ଖାଲି ରହିଛି। ଏହା ବ୍ୟତୀତ ୪ କେନ୍ଦ୍ରର କର୍ମୀ ଓ ୩ କେନ୍ଦ୍ରର ହେଲପର ପଦ ଖାଲି ରହିଛି। ଅପରପକ୍ଷେ ସରକାରଙ୍କ ତରଫରୁ ପ୍ରତ୍ୟେକ କେନ୍ଦ୍ରରେ ରନ୍ଧାଖାଦ୍ୟ ପ୍ରସ୍ତୁତ ନିମନ୍ତେ ଗ୍ୟାସ ସିଲିଣ୍ଡର ଓ ଚୂଲା କିଣିବାକୁ ୭ ହଜାର ୫ଶହ ଟଙ୍କା ଯୋଗାଇ ଦିଆଯାଇଥିବାବେଳେ ଅଦ୍ୟାବଧି ଅଧିକାଂଶ କେନ୍ଦ୍ରରେ ଉପରୋକ୍ତ ସାମଗ୍ରୀ କିଣାଯାଇ ନ ଥିବା ଅଭିଯୋଗ ହୋଇଛି।
ରାଜ୍ୟ ଓ କେନ୍ଦ୍ର ସରକାର ପ୍ରାଥମିକ ଶିକ୍ଷାର ବିକାଶ ସହିତ ଶିଶୁମାନଙ୍କୁ ପୁଷ୍ଟିକର ଖାଦ୍ୟ ଯୋଗାଇଦେବା ନିମନ୍ତେ ସମନ୍ବିତ ଶିଶୁ ବିକାଶ ଯୋଜନାରେ ଅଙ୍ଗନଓ୍ବାଡି କେନ୍ଦ୍ରର ବ୍ୟବସ୍ଥା କରିଛନ୍ତି। ଏହି କେନ୍ଦ୍ରରେ ଗର୍ଭସ୍ଥ ଶିଶୁଠାରୁ ଆରମ୍ଭ କରି ୬ ବର୍ଷ ହେବା ପର୍ଯ୍ୟନ୍ତ ସେମାନଙ୍କୁ ପୁଷ୍ଟିକର ଖାଦ୍ୟ ଯୋଗାଇ ଦିଆଯିବାର ବ୍ୟବସ୍ଥା ହୋଇଛି। ଏଥି ସହିତ ୩ ବର୍ଷ ପରଠାରୁ ୬ ବର୍ଷ ପର୍ଯ୍ୟନ୍ତ ପ୍ରାଥମିକ ଶିକ୍ଷା ପ୍ରଦାନ ଏହି କେନ୍ଦ୍ର ମାଧ୍ୟମରେ କରାଯିବାର ବ୍ୟବସ୍ଥା ରହିଛି। ମାତ୍ର କେତେକ କ୍ଷେତ୍ରରେ ସରକାରୀ ଅଧିକାରୀଙ୍କ ଅବହେଳା ଓ ରାଜନୈତିକ ଇଚ୍ଛାଶକ୍ତିର ଅଭାବ ଯୋଗୁ ଏହି ଯୋଜନାର ସୁଫଳ ଜନସାଧାରଣଙ୍କ ନିକଟରେ ପହଞ୍ଚତ୍ ପାରୁ ନ ଥିାବ ମତ ପ୍ରକାଶ ପାଇଛି। ଏହାର ଉଦାହରଣ ଯାଜପୁର ଜିଲା ଅଧୀନ ବିଞ୍ଚାରପୁର ବ୍ଲକ୍ର ବିଭିନ୍ନ କେନ୍ଦ୍ରରେ ଦେଖିବାକୁ ମିଳିଛି। ଉକ୍ତ ବ୍ଲକ୍ ଅଧୀନ ଅଧିକାଂଶ ଅଙ୍ଗନଓ୍ବାଡି କେନ୍ଦ୍ରରେ ନିଜର ସ୍ଥାୟୀ ଗୃହ ନାହିଁ। ଯେଉଁମାନଙ୍କ ଗୃହ ରହିଛି ସେମାନଙ୍କ ମଧ୍ୟରୁ କାହାର ବିଦ୍ୟୁତ୍ ସଂଯୋଗ ନାହିଁ ତ କାହାର ଶୌଚାଳୟ ନାହିଁ । ଏପରି କି ରୋଷେଇ ଘର ଏବଂ ପିଇବା ପାଣିର ବ୍ୟବସ୍ଥା ନାହିଁ। ଫଳରେ ପ୍ରାଥମିକ ଶିକ୍ଷାର ଏନ୍ତୁଡିଶାଳ କୁହାଯାଉଥିବା ଏହି କେନ୍ଦ୍ରମାନଙ୍କୁ ଶିଶୁମାନେ ଆସିବାକୁ ଅମଙ୍ଗ ହେଉଛନ୍ତି। ସୂଚନାଯୋଗ୍ୟ, ୨୦୧୨ ଜୁଲାଇ ପ୍ରଥମ ସପ୍ତାହରେ ନୟାଗଡ଼ ଜିଲା ରଣପୁର ବ୍ଲକ ଅନ୍ତର୍ଗତ ସୁଆଁସାହି ପ୍ରାଥମିକ ସ୍କୁଲ ପରିସରରେ ଚାଲିଥିବା ଅଙ୍ଗନଓ୍ବାଡି କେନ୍ଦ୍ରର କାନ୍ଥ ଭାଙ୍ଗି ୭ କୋମଳମତି ଶିଶୁଙ୍କ ମୃତ୍ୟୁ ହୋଇଥିଲା। ଅନ୍ୟ ୫ଜଣ ଗୁରୁତର ଆହତ ହୋଇଥିଲେ। ଏହି ଘଟଣା ପରେ ସରକାର ଚେଇଁ ଉଠିଥିଲେ। ଏହାପରେ ବିପଦସଙ୍କୁଳ କେନ୍ଦ୍ରଗୁଡିକୁ ଚିହ୍ନଟ କରିବାକୁ ସରକାର ଜିଲାପାଳମାନଙ୍କୁ ନିର୍ଦ୍ଦେଶ ଦେଇଥିଲେ। ବର୍ଷାଋତୁରେ କଚା କିମ୍ବା ବିପଦସଙ୍କୁଳ ଘରେ ଅଙ୍ଗନଓ୍ବାଡି କେନ୍ଦ୍ର ନ ଚଳାଇବାକୁ ସମସ୍ତ ସିଡିପିଓମାନଙ୍କୁ ନିର୍ଦ୍ଦେଶ ଦିଆଯାଇଛି। ହେଲେ ଯେଉଁଠି ଘର ନାହିଁ ସେଇଠି ଅବା ଖୋଲା ଆକାଶ ତଳେ ସେହି ଛୋଟ ଛୋଟ ପିଲାମାନଙ୍କୁ ନେଇ ପ୍ରିସ୍କୁଲ ଚଳାଇବା ଏବଂ ପୁଷ୍ଟିକର ଖାଦ୍ୟ ବଣ୍ଟନ କରିବାକୁ ଅଙ୍ଗନଓ୍ବାଡି କର୍ମୀମାନେ ବାଧ୍ୟ ହେଉଛନ୍ତି।
ଏ ସମ୍ପର୍କରେ ବିଞ୍ଝାରପୁର ସିଡିପିଓ ରୁକ୍ମଣୀ ସାହୁଙ୍କୁ ପଚାରିବାରୁ ମିଳିଥିବା ଟଙ୍କାରେ ୨ ଗ୍ୟାସ୍ ସିଲିଣ୍ଡର ଓ ଚୂଲା କିଣିବା ସମ୍ଭବ ହେଉନାହିଁ। ତେଣୁ ଆବଶ୍ୟକ ଅର୍ଥ ସରକାର ଯୋଗାଇଦେଲେ ସେହି ସାମଗ୍ରୀ କିଣାଯିବ। ତେବେ ତାଙ୍କ ଅଧୀନରେ ଥିବା ଅଙ୍ଗନଓ୍ବାଡି କେନ୍ଦ୍ର ମଧ୍ୟରୁ କୌଣସି କେନ୍ଦ୍ର ବିପଦ ସଙ୍କୁଳ ଅବସ୍ଥାରେ ନାହିଁ ବୋଲି ସେ କହିଛନ୍ତି।
