ଭୁବନେଶ୍ୱର, ୨୫।।୫ (ବନ୍ଦନା ସେଠୀ): ପ୍ରବଳ ଖରାରେ ସିଝୁଛି ପୂରା ଓଡ଼ିଶା। ଅଧିକାଂଶ ସହରର ତାପମାତ୍ରା ୪୦ ଡିଗ୍ରୀ ଉପରେ ରହୁଥିବାବେଳେ ତାତି ସାଙ୍ଗକୁ ଗୁଳୁଗୁଳି ଅସ୍ତବ୍ୟସ୍ତ କରି ପକାଉଛି। ଏଭଳି ସମୟରେ ଅଘୋଷିତ ବିଦ୍ୟୁତ୍ କାଟ ଲୋକଙ୍କ ଉପରେ ଦାଉ ସାଧୁଛି। ଚଳିତ ବର୍ଷ ଖରାଦିନେ ପାଓ୍ବାର କଟ୍ ହେବ ନାହିଁ ବୋଲି ପୂର୍ବରୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଘୋଷଣା କରିଥିଲେ। ମାତ୍ର ମୁଖ୍ୟମନ୍ତ୍ରୀଙ୍କ ଏହି ଘୋଷଣା ପରେ ରାଜ୍ୟରେ ପାଓ୍ବାର କଟ୍ ଆହୁରି ବଢ଼ିଯାଇଛି। ସେହିପରି ବିଦ୍ୟୁତ୍ ବିଲ୍ ବାକି ଥିଲେ ମଧ୍ୟ ବିଦ୍ୟୁତ୍ କାଟିବେ ନାହିଁ ବୋଲି ଉପମୁଖ୍ୟମନ୍ତ୍ରୀ ତଥା ଶକ୍ତିମନ୍ତ୍ରୀ କନକ ବର୍ଦ୍ଧନ ସିଂଦେଓ ପୂର୍ବରୁ ସମସ୍ତ ବିଦ୍ୟୁତ୍ ବିତରଣ କମ୍ପାନୀଙ୍କୁ ନିର୍ଦ୍ଦେଶ ଦେଇଥିଲେ। ମାତ୍ର ଏଠାରେ ବିଦ୍ୟୁତ୍ ବିଲ୍ ପଇଠ କରିବା ପରେ ମଧ୍ୟ ଗ୍ରାହକଟିଏ ନିଜର ଅଧିକାର ପାଇବାରୁ ବଞ୍ଚତ୍ତ ହେଉଛି। ରାଜ୍ୟବାସୀଙ୍କୁ ନିରବଚ୍ଛିନ୍ନ ବିଦ୍ୟୁତ୍ ସେବା ଯୋଗାଇ ଦେବାରେ ଟାଟା ପାଓ୍ବାର ଫେଲ୍ ମାରିଛି। ରାଜଧାନୀ ଭୁବନେଶ୍ୱର ସମେତ ରାଜ୍ୟର ବିଭିନ୍ନ ସ୍ଥାନରେ ଏଭଳି ସ୍ଥିତି ଲାଗି ରହିଛି। ରାତି ଦିନ କିଛି ଠିକ୍ ନାହଁି ମନଇଚ୍ଛା ଘଣ୍ଟା ଘଣ୍ଟା ଧରି ବିଦ୍ୟୁତ୍ କାଟ ହେଉଛି। ଲୋକମାନେ ବର୍ତ୍ତମାନ ବିଦ୍ୟୁତ୍ କାର୍ଯ୍ୟାଳୟରେ ତାଲା ପକାଇବା ସ୍ଥିତି ଉପୁଜିଲାଣି। କେତେକ ସ୍ଥାନରେ ଲୋ ଭୋଲ୍ଟେଜ ପାଇଁ କୁଲର୍, ଏସି ଦୂରର କଥା ପଙ୍ଖା ମଧ୍ୟ ଠିକ୍ ଭାବେ ଚାଲୁନାହିଁ। ବିଶେଷକରି ଖରା ସମୟରେ ବିଦ୍ୟୁତ୍ କାଟ ଯୋଗୁ ଗରମରେ ଘରେ ରହିପାରୁ ନାହାନ୍ତି କି ବାହାରକୁ ଯାଇପାରୁ ନାହାନ୍ତି। ରାଜ୍ୟର ବିଭିନ୍ନ ସ୍ଥାନରେ ବିଦ୍ୟୁତ୍ ସେବାକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ଏପରି କି ଗଞ୍ଜାମ ଜିଲା ପାତ୍ରପୁର ବ୍ଲକ ଅନ୍ତର୍ଗତ ତାଳପଡା ଓ ଆଖପାଖ ଅଞ୍ଚଳବାସୀ ଶନିବାର ଅଘୋଷିତ ବିଦ୍ୟୁତ କାଟ୍ର ପ୍ରତିବାଦ କରି ସୁରଙ୍ଗି ଗ୍ରାମସ୍ଥିତ ବିଦ୍ୟୁତ କାର୍ଯ୍ୟାଳୟରେ ତାଲା ପକାଇବା ସହ ରାସ୍ତା ଅବରୋଧ କରିଥିବା ଦେଖିବାକୁ ମିଳିଛି। ଏଭଳି ସ୍ଥିତିରେ ଶକ୍ତିମନ୍ତ୍ରୀ କହିଛନ୍ତି, ପିକ୍ ଆଓ୍ବାରରେ ଅଧିକ ଓଭରଲୋଡିଂ ହେଉଥିବାରୁ ଟ୍ରାନ୍ସଫର୍ମର ଫେଲ୍ ମାରୁଛି। ତଥାପି ବିଦ୍ୟୁତ୍ କାଟ୍ କରିବାକୁ ନ କରିବାକୁ କୁହାଯାଇଛି। ଯେତେ ଶୀଘ୍ର ସମ୍ଭବ ଏହାର ସମାଧାନ କରିବା ସହିତ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ କରାଯାଉଥିବା ମନ୍ତ୍ରୀ କହିଛନ୍ତି। ସେହିପରି ଏଭଳି ପରିସ୍ଥିତି ପାଇଁ ଖୋଦ୍ ଶକ୍ତି ମନ୍ତ୍ରୀ ଓ ଶକ୍ତି ବିଶେଷଜ୍ଞ ଅତ୍ୟଧିକ ଏସି ବ୍ୟବହାରକୁ ଦାୟୀ କରିଛନ୍ତି। ତେବେ ପ୍ରତି ବର୍ଷ ଏଭଳି ସମସ୍ୟା ଉପୁଜୁଥିଲେ ମଧ୍ୟ ବିଦ୍ୟୁତ୍ ବିତରଣ ସଂସ୍ଥା କାହିଁକି ଆଡଭାନ୍ସ ହୋଇପାରୁନାହିଁ ଏବଂ ସରକାର କାହିଁକି ଏନେଇ ପୂର୍ବରୁ ପଦକ୍ଷେପ ନେଉ ନାହାନ୍ତି ତାକୁ ନେଇ ପ୍ରଶ୍ନ ଉଠିଛି।
