ବଲାଙ୍ଗୀର,୨୫ା୩(ବୀରେନ୍ଦ୍ର କୁମାର ଝାଙ୍କର): ଆମେରିକା-ଇସ୍ରାଏଲ-ଇରାନ୍ ଯୁଦ୍ଧ ପରେ ଭାରତରେ ଦେଖାଦେଇଥିବା ଏଲପିଜି ଗ୍ୟାସ୍ ସିଲିଣ୍ଡର ସମସ୍ୟା ଦିନକୁ ଦିନ ବଢିବାରେ ଲାଗିଛି। ଏହାର ପ୍ରଭାବ ବଲାଙ୍ଗୀରରେ ବିଶେଷକରି ହୋଟେଲ ଏବଂ ଉଠାଦୋକାନୀଙ୍କ ଉପରେ ପଡିଛି। ସିଲିଣ୍ଡର ମିଳୁ ନ ଥିବା ଏବଂ କଳାବଜାରରେ ଚଢ଼ା ଦରରେ ବିକ୍ରି ହେଉଥିବାରୁ ଏହାମଧ୍ୟରେ କିଛି ହୋଟେଲ ବନ୍ଦ ହୋଇଯାଇଛି। କିଛି ହୋଟେଲ କାଠ ଓ କୋଇଲା ଚୁଲାକୁ ଫେରି ଯାଇଛନ୍ତି। ଏଭଳି ସମୟରେ ବଲାଙ୍ଗୀର ସହରର ଜଣେ ହୋଟେଲ ମାଲିକ ନିଜ ବୁଦ୍ଧି ଏବଂ ଜ୍ଞାନ ପ୍ରୟୋଗ କରି ଏକ ବିକଳ୍ପ ଚୁଲା ‘ଜେଟ୍ ଷ୍ଟୋଭ’ ପ୍ରସ୍ତୁତ କରି ଚର୍ଚ୍ଚାରେ ରହିଛନ୍ତି। ଏହି ଚୁଲା ପୋଡା ମୋବିଲ ଏବଂ ଡିଜେଲ ମିଶ୍ରିତ ତେଲରେ ଚାଲୁଛି। ଏହା ଏଲ୍ପିଜି ଠାରୁ ଢ଼େର ଶସ୍ତା ଏବଂ ଅଧିକ ଭଲ ବୋଲି ହୋଟେଲ ମାଲିକ ଜଣକ କହିଛନ୍ତି।
ବଲାଙ୍ଗୀର ସହର ବିକ୍ରମ ଛକରୁ ରେଲୱେ ଷ୍ଟେଶନ ରାସ୍ତାରେ ରହିଛି ରଘୁ ହୋଟେଲ। ଏହି ହୋଟେଲର ମାଲିକ ସରୋଜ କୁମାର ସାହୁ ଏବେ ଚର୍ଚ୍ଚାରେ ରହିଛନ୍ତି। ସେ ନିଜେ ଏକ ‘ଜେଟ୍ ଷ୍ଟୋଭ’ ତିଆରି କରି ସେଥିରେ ହୋଟେଲ ଚଳାଉଛନ୍ତି। ସରୋଜ କହିଛନ୍ତି, ସିଲିଣ୍ଡର ନ ମିଳିବାରୁ ସେ ଚିନ୍ତାରେ ପଡିଥିଲେ। ହୋଟେଲ ବନ୍ଦ ହୋଇଯିବା ଭୟ ତାଙ୍କୁ ଘାରିଥିଲା। ତେବେ ଏହି ଭୟ ଓ ଚିନ୍ତା ତାଙ୍କୁ ବିକଳ୍ପ ଚୁଲା ତିଆରି ପାଇଁ ପ୍ରେରଣା ଯୋଗାଇଥିଲା। ୟୁଟ୍ୟୁବ୍ରେ ବିକଳ୍ପ ଇନ୍ଧନ ଏବଂ ରନ୍ଧନ ଚୁଲା ଖୋଜୁ ଖୋଜୁ କମ୍ କାଠରେ ଚାଲୁଥିବା କିଛି ଚୁଲା ଦେଖିବାକୁ ପାଇଥିଲେ।
ଏହାପରେ ସେ ଘରେ ଥିବା ଏକ ଲୁହାର ହେମ ଦସ୍ତାକୁ ନେଇ ଏହା ମଝିରେ ସେ ନିଜେ ତିଆରି କରିଥିବା ଏକ ସ୍ବତନ୍ତ୍ର ବର୍ଣ୍ଣରକୁ ୱେଲଡିଂ କରିବାକୁ ଗ୍ୟାରେଜ୍ବାଲାଙ୍କୁ କହିଥିଲେ। ଏହି ସ୍ବତନ୍ତ୍ର ଚୁଲା ପ୍ରସ୍ତୁତ କରିବା ପରେ ସେଇ ବର୍ଣ୍ଣରକୁ ଡିଜେଲ ମିଶ୍ରିତ ପୋଡା ମୋବିଲ ଆସିବା ପାଇଁ ଏକ ସ୍ବତନ୍ତ୍ର ପାଇପ୍ ଏବଂ ପୋଡା ମୋବିଲ ରହିବା ଟାଙ୍କି ପ୍ରସ୍ତୁତ କରିଥିଲେ। ବର୍ଣ୍ଣର ତଳକୁ ଏକ ଭେକ୍ୟୁମ୍ ପାଇପ ଲଗାଇ ଏୟାର ଥ୍ରୋ ବ୍ୟବସ୍ଥା କରିଥିଲେ। ପୋଡା ମୋବିଲ ରହିଥିବା ଟାଙ୍କିରୁ ବର୍ଣ୍ଣରକୁ ଡିଜେଲ ମିଶ୍ରିତ ପୋଡା ମୋବିଲ ପାସ୍ କରିବା ପରେ ବର୍ଣ୍ଣର ଉପରେ ଦିଆସିଲି ଜଳାଇ ଅଗ୍ନିସଂଯୋଗ କରାଯାଉଛି। ଏହାପରେ ଇଲେକ୍ଟ୍ରିରେ ଚାଲୁଥିବା ଭେକ୍ୟୁମ୍ ମେଶିନକୁ ଅନ୍ କରିବା ପରେ ଏହି ଚୁଲା ଗ୍ୟାସ ବର୍ଣ୍ଣରଠାରୁ ଅଧିକ କ୍ଷୀପ୍ର ଗତିରେ ଜଳିଉଠୁଛି। ଏହି ଚୁଲାର ନାଁ ସେ ନିଜେ ‘ଜେଟ ଷ୍ଟୋଭ’ ଦେଇଛନ୍ତି। ଏଥିରେ ଗତ ୩/୪ ଦିନ ହେଲା ସରୋଜ ତାଙ୍କର ହୋଟେଲ ସୁରୁଖୁରୁରେ ଚଳାଉଥିବା କହିଛନ୍ତି। ଗୋଟିଏ ଦିନର ମଧ୍ୟାହ୍ନ ଏବଂ ରାତ୍ର ଭୋଜନ ପ୍ରସ୍ତୁତ କରିବା ପାଇଁ ପ୍ରାୟ ଅଢ଼େଇ ଲିଟର ଡିଜେଲ ଏବଂ ୫ ଲିଟର ପୋଡା ମୋବିଲର ଆବଶ୍ୟକତା ପଡୁଛି। ଏଥିପାଇଁ ତାଙ୍କୁ ଦୈନିକ ୪୦୦ରୁ ୫ ଶହ ଟଙ୍କା ଖର୍ଚ୍ଚ କରିବାକୁ ପଡୁଛି। ପୂର୍ବରୁ ଏଲପିଜି ସିଲିଣ୍ଡରରେ ତାଙ୍କୁ ଦୈନିକ ପ୍ରାୟ ୧ ହଜାର ଟଙ୍କା ଖର୍ଚ୍ଚ କରିବାକୁ ପଡୁଥିଲା। ଏବେ ପ୍ରାୟ ଅଧା ଟଙ୍କାରେ ତାଙ୍କର ହୋଟେଲ ସୁରୁଖୁରୁରେ ଚାଲୁଛି ବୋଲି ସେ କହିଛନ୍ତି। ତେବେ ମାର୍କେଟରୁ ପୋଡା ମୋବିଲ ସଂଗ୍ରହ କରିବାକୁ ତାଙ୍କୁ ଟିକେ ଅତିରିକ୍ତ ପରିଶ୍ରମ କରିବାକୁ ପଡୁଛି ବୋଲି ସେ କହିଛନ୍ତି। ସରୋଜ କହିଛନ୍ତି, ଯେଉଁ ଜ୍ଞାନ କୌଶଳ ପ୍ରୟୋଗ କରି ସେ ଏହି ଚୁଲା ତିଆରି କରିଛନ୍ତି ତାକୁ ଆହୁରି ଅଧିକ ଉନ୍ନତି କରିବେ ଏବଂ ଉକ୍ତ ଫମୁର୍ଲାକୁ ସେ ପେଟେଣ୍ଟ କରିବାକୁ ଉଦ୍ୟମ କରିବେ ବୋଲି କହିଛନ୍ତି। ଏହାହେଲେ ଅଳ୍ପ ଇନ୍ଧନରେ ଲୋକ ଘରେ ଏବଂ ହୋଟେଲରେ ଏହାକୁ ବ୍ୟବହାର କରିପାରିବେ ବୋଲି ସେ ଆଶା ରଖିଛନ୍ତି।
