ଜୟପୁର, ୧୬।୮: ରାଜସ୍ଥାନର ସିକ୍କର ଜିଲାରୁ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ସ୍ତ୍ରୀଙ୍କ ଦ୍ୱିତୀୟ ବିବାହରେ ସ୍ବାମୀ ଏତେ ପରିମାଣରେ ମର୍ମାହତ ହୋଇଯାଇଥିଲେ ଯେ ଶେଷରେ ଆତ୍ମହତ୍ୟା କରିଛନ୍ତି। ତେବେ ଏହି ଘଟଣା ଜାଣିବା ପରେ ସେହି ବ୍ୟକ୍ତିଙ୍କ ସ୍ତ୍ରୀ ଥାନାରେ ଏକ ଏତଲା ଦେଇଛନ୍ତି। ଯେଉଁଥିରେ ସେ ଉଲ୍ଲେଖ କରିଛନ୍ତି ଯେ, ତାଙ୍କ ବାପା ଓ ମା ଟଙ୍କା ଲୋଭରେ ଜବରଦସ୍ତି ଦ୍ୱିତୀୟ ବିବାହ କରାଇ ଦେଇଛନ୍ତି। ଦ୍ୱିତୀୟ ବିବାହ ପାଇଁ ସେ ମନା କରିବାରୁ ତାଙ୍କୁ ହତ୍ୟା ଧମକ ମଧ୍ୟ ଦିଆଯାଇଥିଲା। ଏବେ ମଧ୍ୟ ସେ ତାଙ୍କ ପ୍ରଥମ ସ୍ବାମୀଙ୍କ ଶ୍ୱଶୁର ଘରେ ରହିବାକୁ ଚାହୁଁଛନ୍ତି।
ଜଣଙ୍କ ଆହୁରି ମଧ୍ୟ କହିଛନ୍ତି, ତାଙ୍କ ବାପା, ମା ଓ ମାମୁଁ ପ୍ରଥମ ସ୍ବାମୀଙ୍କୁ ଛାଡ଼ପତ୍ର ନ କରାଇ ଗତ ଜୁନ୍ରେ ଦ୍ୱିତୀୟ ବିବାହ କରାଇଥିଲେ। ଏହାର ପ୍ରତିବଦଳରେ ଦ୍ୱିତୀୟ ସ୍ବାମୀଙ୍କ ପରିବାର ପକ୍ଷରୁ ତାଙ୍କ ବାପା ଓ ମାଙ୍କୁ ୧୦ ଲକ୍ଷ ଟଙ୍କା ପ୍ରଦାନ କରାଯାଇଥିଲା। ନିକଟରେ ସେ ଯେତେବେଳେ ତାଙ୍କ ପ୍ରଥମ ଶାଶୁଘରକୁ ଆସିଥିଲେ ସେତେବେଳେ ଜାଣିଲେ ଯେ ତାଙ୍କ ପ୍ରଥମ ସ୍ବାମୀ ମାନସିକ ଭାରସାମ୍ୟ ହରାଇ ଦୁଃଖରେ ଆତ୍ମହତ୍ୟା କରିଛନ୍ତି। ଅପରପକ୍ଷରେ ପୋଲିସ ପକ୍ଷରୁ କୁହାଯାଇଛି ଯେ, ୨୦୧୪ରେ ମହିଳାଜଣଙ୍କ ପ୍ରଥମ ବିବାହ କରିଥିଲେ। ତାଙ୍କର ଏକ ୫ ବର୍ଷର ଝିଅ ରହିଛି। କିନ୍ତୁ ଗତ ଜୁନ୍ ୨୨ରେ ମହିଳାଙ୍କ ବାପା ଓ ମା ତାଙ୍କୁ ଘରକୁ ଡକାଇ ମାଉସୀ ଘରେ ଜବରଦସ୍ତି ଦ୍ୱିତୀୟ ବିବାହ କରାଇ ଦେଇଥିଲେ। ଦ୍ୱିତୀୟ ବିବାହ ନ କଲେ ହତ୍ୟା କରିବେ ବୋଲି ଧମକ ମଧ୍ୟ ଦେଇଥିଲେ। ପୋଲିସ ଏଡଇ ଘଟଣାର ଏବେ ତଦନ୍ତ ଆରମ୍ଭ କରିଛି।
