କାବୁଲ,୨୪।୮: ୟୁକ୍ରେନର ଏକ ବିମାନକୁ ଆଫଗାନିସ୍ତାନରୁ ଅପହରଣ କରି ନିଆଯାଇଛି। ୟୁକ୍ରେନର ଉପ-ବୈଦେଶିକ ମନ୍ତ୍ରୀ ୟେଭ୍ଜେନି ୟେନିନ୍ ଏ ସମ୍ପର୍କରେ ସୂଚନା ଦେଇଛନ୍ତି। ରବିବାର ବିମାନକୁ ଅପହରଣ କରାଯାଇ ମଙ୍ଗଳବାର ଇରାନ ନିଆଯାଇଥିବା ମନ୍ତ୍ରୀ କହିଛନ୍ତି। କିଛି ଅଜ୍ଞାତ ଲୋକ ବିମାନକୁ ଅପହରଣ କରିଛନ୍ତି। ବିମାନରେ ଅଜ୍ଞାତ ଲୋକେ ପହରା ଦେଉଥିବା ସେ ପ୍ରକାଶ କରିଛନ୍ତି। ବିମାନଟି ଉଦ୍ଧାର କାର୍ଯ୍ୟରେ ନିୟୋଜିତ ଥିଲା। ଆଫଗାନିସ୍ତାନରେ ରହିଥିବା ୟୁକ୍ରେନ ନାଗରିକଙ୍କୁ ସ୍ବଦେଶ ଫେରାଇ ନେବା କାର୍ଯ୍ୟ ଏହି ବିମାନ ଦ୍ୱାରା କରାଯାଉଥିବା ମନ୍ତ୍ରୀ କହିଛନ୍ତି। ତେବେ ବିମାନ ଅପହରଣକୁ ୟୁକ୍ରେନ୍ ସରକାର ମନା କରିଛନ୍ତି। ଉଦ୍ଧାର କାର୍ଯ୍ୟରେ ନିୟୋଜିତ ଥିବା କୌଣସି ବିମାନକୁ ଅପହରଣ କରାଯାଇ ନାହିଁ ବୋଲି ସରକାର କହିଛନ୍ତି। ଫଳରେ ସରକାର ଏବଂ ମନ୍ତ୍ରୀ କିଏ ସତ କହୁଛନ୍ତି ତାହା ଜଣାପଡୁ ନାହିଁ। ଅପରପକ୍ଷରେ ଏନେଇ ଇରାନର ମନ୍ତ୍ରୀ ଅବାସ୍ ଅସଲାନି କହିଛନ୍ତି ଯେ,ୟୁକ୍ରେନର ଏହି ବିମାନଟି ଉତ୍ତର ପୂର୍ବ ଇରାନର ମଶହାଦ୍ ବିମାନ ବନ୍ଦରରେ ଅବତରଣ କରିଥିଲା। ପରେ ରିଫୁଏଲିଂ ଏହା ୟୁକ୍ରେନ ଅଭିମୁଖେ ଗନ୍ତବ୍ୟ ପଥରେ ଉଡ଼ାଣ କରିଥିଲା। ବିମାନଟି କିଓ୍ବ ବନ୍ଦରରେ ଅବତରଣ କରିଥିବା ସେ କହିଛନ୍ତି। ବିମାନରେ ୮୩ ଜଣ ଯାତ୍ରୀ ରହିଛନ୍ତି। ସେମାନଙ୍କ ମଧ୍ୟରେ ୩୧ ଜଣ ୟୁକ୍ରେନ୍ ନାଗରିକ ରହିଥିବା କୁହାଯାଉଛି। ସୂଚନାଯୋଗ୍ୟ, ସମ୍ପ୍ରତି ଆଫଗାନିସ୍ତାନରେ ପ୍ରାୟ ୧୦୦ ଜଣ ୟୁକ୍ରେନ ନାଗରିକ ରହିଛନ୍ତି। ସେମାନଙ୍କୁ ସୁରକ୍ଷିତ ସ୍ବଦେଶ ଫେରାଇ ଆଣିବା ଲାଗି ଉଦ୍ୟମ ଜାରି ରହିଛି।
