ଓ୍ବାର୍ସ, ୨୭ା୩: ପୋଲାଣ୍ଡ ଗସ୍ତରେ ଥିବା ଆମେରିକା ରାଷ୍ଟ୍ରପତି ଜୋ ବାଇଡେନ୍ ଶନିବାର ଯୁଦ୍ଧ ପ୍ରଭାବିତ ୟୁକ୍ରେନ୍ର ବହିର୍ବ୍ୟାପାର ମନ୍ତ୍ରୀ ଡିମିଟ୍ରୋ କୁଲେବା ଏବଂ ପ୍ରତିରକ୍ଷା ମନ୍ତ୍ରୀ ଓଲେକ୍ସି ରେଜ୍ନିକୋଭ୍ଙ୍କୁ ଓ୍ବାର୍ସରେ ଭେଟିଛନ୍ତି। ରୁଷିଆ ଆକ୍ରମଣ ପରଠାରୁ ୟୁକ୍ରେନ୍ ପ୍ରତିନିଧିଙ୍କୁ ଏହା ବାଇଡେନ୍ଙ୍କ ପ୍ରଥମ ସାକ୍ଷାତ। ଏଭଳି ସଙ୍କଟ ସମୟରେ ୟୁକ୍ରେନ୍ ବାହାରକୁ ଆସି ଦୁଇ ମନ୍ତ୍ରୀ ବାଇଡେନ୍ଙ୍କୁ ସାକ୍ଷାତ କରିବା ଅର୍ଥ ରୁଷିଆ ସହ ଆହୁରି ଜୋରଦାର ଲଢ଼େଇ ପାଇଁ ଆତ୍ମବିଶ୍ୱାସ ପାଇଥିବା କୁହାଯାଉଛି। ଓ୍ବାର୍ସରେ ଥିବା ଏକ ହୋଟେଲରେ ବାଇଡେନ୍ ୟୁକ୍ରେନ୍ ମନ୍ତ୍ରୀଙ୍କ ସହ ଆଲୋଚନା କରିଛନ୍ତି। ୟୁକ୍ରେନ୍ ଉପରେ ଆକ୍ରମଣ ରୁଷିଆ ପାଇଁ ‘ରଣନୈତିକ ବିଫଳତା’ ବୋଲି କହିବା ସହ ନାଟୋ ସୀମାରେ ଥିବା ଗୋଟିଏ ଇଞ୍ଚ ଜାଗା ବିଷୟରେ ପୁଟିନ୍ ଭାବିବାକୁ ମଧ୍ୟ ସାହସ କରନ୍ତୁ ନାହିଁ ବୋଲି ବାଇଡେନ୍ ଚେତାବନୀ ଦେଇଥିଲେ। ଏହାସହ ବାଇଡେନ୍ ପୋଲାଣ୍ଡରେ ପହଞ୍ଚିଥିବା ୟୁକ୍ରେନ୍ ଶରଣାର୍ଥୀଙ୍କୁ ଭେଟିଥିଲେ। ଏହି ସମୟରେ ପୁଟିନ୍ଙ୍କୁ କଂସେଇ ବୋଲି କହି ସେଭଳି ବ୍ୟକ୍ତି କ୍ଷମତାରେ ରହିପାରିବେ ନାହିଁ ବୋଲି ବାଇଡେନ୍ ପ୍ରକାଶ କରିଥିଲେ।
