ଦୁବାଇ,୨୧।୯: ଅନ୍ତିମ ଓଭରରେ ରାଜସ୍ଥାନ ରୟାଲ୍ସକୁ ଜିତିବା ପାଇଁ ଦରକାର ଥାଏ ୪ ରନ୍। ଯୁବ ପେସର କାର୍ତ୍ତିକ ତ୍ୟାଗିଙ୍କ ସାମ୍ନାରେ ଥିଲେ ନିକୋଲାଶ ପୁରନ ଓ ଏଡେନ ମାରକ୍ରାମଙ୍କ ଭଳି ସେଟ୍ ଓ ବିସ୍ଫୋରକ ବ୍ୟାଟ୍ସମ୍ୟାନ। ଲାଗୁଥିଲା ରାଜସ୍ଥାନ ପାଇଁ ଜିତିବାର ଆଶା ନାହିଁ। କିନ୍ତୁ ଦୁଇ ଦୁଇଟି ଉଇକେଟ ନେଇ ମ୍ୟାଚ୍ର ଭାଗ୍ୟ ବଦଳି ଦେଇଥିଲେ କାର୍ତ୍ତିକ। ଫଳରେ ରାଜସ୍ଥାନ ୨ ରନ୍ରେ ପଞ୍ଜାବ କିଙ୍ଗ୍ସକୁ ହରାଇ ଦେଇଛି। ଏହି ରୋଚକ ବିଜୟ ସହ ଆଇପିଏଲ ପଏଣ୍ଟ ଟେବୁଲର ୫ମ ସ୍ଥାନକୁ ଉନ୍ନୀତ ହୋଇଛି ସଞ୍ଜୁ ସାମସନଙ୍କ ରୟାଲ୍ସ ଦଳ।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ରାଜସ୍ଥାନକୁ ଭଲ ଆରମ୍ଭ ଦେଇଥିଲେ ଇଭିନ ଲୁଇସ (୩୬) ଓ ଜଶସ୍ବୀ ଜୈଶ୍ୱାଲ (୪୯)ଙ୍କ ଓପନିଂ ଯୋଡ଼ି। ତା’ ପରେ ମଧ୍ୟକ୍ରମରେ ବିସ୍ଫୋରକ ୪୩ ରନ୍ର ପାଳି ଖେଳିଥିଲେ ମହିପାଲ ଲୋମରର। ଏକଦା ଦଳୀୟ ସ୍କୋର ୨୦୦ ଅତିକ୍ରମ କରିବା ନିଶ୍ଚିତ ମନେ ହେଉଥିଲା। ହେଲେ ଶେଷ ୪ ଓଭରରେ ମାତ୍ର ୨୧ ରନ୍ ଯୋଡ଼ି ଅନ୍ତିମ ୬ ଉଇକେଟ ହରାଇ ୧୮୫ ରନ୍ରେ ଅଲଆଉଟ୍ ହୋଇଯାଇଥିଲା ରାଜସ୍ଥାନ। ପଞ୍ଜାବ ପକ୍ଷରୁ ଅର୍ଶଦୀପ ସିଂ ୫ ଉଇକେଟ ସଫଳତା ହାତେଇଥିବା ବେଳେ ମହମ୍ମଦ ଶାମି ୩ ଉଇକେଟ ନେଇଥିଲେ।
ଜବାବରେ ପଞ୍ଜାବକୁ ୧୨୦ ରନ୍ର ବିସ୍ଫୋରକ ଆରମ୍ଭ ଦେଇଥିଲେ ଅଧିନାୟକ ଲୋକେଶ ରାହୁଲ (୪୯ ରନ୍, ୪ ଚୌକା ଓ ୨ ଛକା ) ଓ ମୟଙ୍କ ଅଗ୍ରଓ୍ବାଲ (୬୭ ରନ୍, ୭ ଚୌକା ଓ ୨ ଛକା)ଙ୍କ ଓପନିଂ ଯୋଡ଼ି। ଦୁହେଁ ଆଉଟ୍ ହେବା ପରେ ସ୍ଥିତି ସମ୍ଭାଳିଥିଲେ ମାରକ୍ରାମ (୨୬) ଓ ପୁରନ (୩୨)। ଦୁଇ ବ୍ୟାଟ୍ସମ୍ୟାନ ୩ୟ ଉଇକେଟ ପାଇଁ ୩୯ ବଲରେ ଦଳୀୟ ସ୍କୋରରେ ଯୋଡ଼ିଥିଲେ ୫୭ ରନ୍। ହେଲେ ଦଳକୁ ଜିତାଇ ପାରି ନ ଥିଲେ। ଫଳରେ ଶେଷ ପର୍ଯ୍ୟନ୍ତ ବ୍ୟାଟିଂ କରିଥିବା ପଞ୍ଜାବ ୪ ଉଇକେଟ ହରାଇ ୧୮୩ ରନ୍ କରିବାକୁ ସକ୍ଷମ ହୋଇଥିଲା।
