ପୁରୁଷୋତ୍ତମପୁର,୨୨ା୧୦(ସୀମାଞ୍ଚଳ ମିଶ୍ର): ପୂର୍ବ ଶତ୍ରୁତାକୁ କେନ୍ଦ୍ର କରି ଯୁବକଙ୍କୁ ଅତି ବୀଭତ୍ସ ଭାବରେ ହାଣି ହତ୍ୟା କରାଯାଇଛି। ମୃତ ଯୁବକ ଜଣକ ହେଉଛନ୍ତି ଗଞ୍ଜାମ ଜିଲା ରମ୍ଭା ଥାନା ଅନ୍ତର୍ଗତ କୋମଣ୍ଡ ଗ୍ରାମର କେ.ମିଟୁ ରେଡ୍ଡୀ ଓରଫ ପଦ୍ମଚରଣ। ମିଟୁ ଓ ଗୁଡିଝର ଗ୍ରାମର ଲକ୍ଷଣ ପଣ୍ଡା ନାମକ ଦୁଇ ଯୁବକ ରାସ୍ତାରେ ଯିବା ବେଳେ ଶନିବାର ବିଳମ୍ବିତ ରାତିରେ ବଡ଼ରାମପଲ୍ଲି ଗ୍ରାମ ନିକଟରେ ତାଙ୍କୁ ଅଟକାଇ ଦୁର୍ବୃତ୍ତମାନେ ମରଣାତ୍ମକ ଆକ୍ରମଣ କରିଥିଲେ। ଉଭୟଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ସ୍ଥାନୀୟ ଲୋକେ ଘଟଣାସ୍ଥଳରୁ ଉଦ୍ଧାର କରି ଚିକିସା ନିମନ୍ତେ ପୁରୁଷୋତ୍ତମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିବା ସହ କୋମଣ୍ଡ ଗ୍ରାମ ଲୋକଙ୍କୁ ଖବର ଦେଇଥଲ। ମାତ୍ର ଚିକିତ୍ସାଧୀନ ଅବସ୍ଥାରେ କେ.ମିଟୁ ରେଡ୍ଡୀ ଓରଫ ପଦ୍ମଚରଣ( ୩୬)ଙ୍କ ମୃତ୍ୟୁ ଘଟିଥିବା ବେଳେ ଲକ୍ଷ୍ମଣ ପଣ୍ଡା(୨୮)ଙ୍କୁ ଗୁରୁତର ଅବସ୍ଥାରେ ବ୍ରହ୍ମପୁର ବଡ଼ ମେଡିକାଲକୁ ପଠାଯାଇଛି।
ଘଟଣାରୁ ପ୍ରକାଶ ଯେ, ଗ୍ରାମର କୋଠ ଅନୁଷ୍ଠାନର ପଇସା ହିସାବକୁ କେନ୍ଦ୍ରକରି ଦୀର୍ଘଦିନ ହେଲା ସେହି ଗ୍ରାମର କିଛି ବ୍ୟକ୍ତିଙ୍କ ଶହ ମିଟୁଙ୍କ ଶତ୍ରୁତା ଲାଗିରହିଥିଲା। ଏହି ପୂର୍ବ ଶତ୍ରୁତାକୁ ନେଇ ମିଟୁଙ୍କୁ ଜୀବନରେ ମାରି ଶେଷ କରି ଦେବା ଲାଗି ସେମାନେ ଜଗି ରହିଥିଲେ। ଶନିବାର ରାତିରେ ଅଟୋଯୋଗେ ମିଟୁ ଓ ଲକ୍ଷ୍ମଣ କୌଣସି କାର୍ଯ୍ୟରେ ପୁରୁଷୋତ୍ତମପୁର ଆସି ନିଜ ଗ୍ରାମକୁ ଫେରୁଥିବା ବେଳ ବଡ଼ରାମପଲ୍ଲୀ ଗ୍ରାମ ନିକଟ ଜଙ୍ଗଲିଆ ରାସ୍ତାରେ ଶତ୍ରୁତା ରହିଥିବା ବ୍ୟକ୍ତିମାନେ ତାଙ୍କର ଶିକୁଳା ଗ୍ରାମର କିଛି ସହଯୋଗୀଙ୍କୁ ନେଇ ମାରଣାସ୍ତ୍ର ଧରି ଛକି ରହିଥିଲୋ ମିଟୁଙ୍କ ଅଟୋକୁ ଅଟକାଇ ଅତର୍କିତ ଭାବେ ଅତ ନିର୍ମମ ଭାବରେ ଆକ୍ରମଣ କରିଥିଳେ। ଏହି ସମୟରେ ସେମାନଙ୍କ ଚିତ୍କାର ଶୁଣି ସ୍ଥାନୀୟ କିଛି ଲୋକେ ଘଟଣାସ୍ଥଳକୁ ଦୌଡ଼ି ଆସିଥିଲେ। ଏହି ଲୋକମାନଙ୍କୁ ଦେଖି ଅଭିଯୁକ୍ତମାନେ ଅନ୍ଧାରର ସୁଯୋଗ ନେଇ ଜଙ୍ଗଲ ମଧ୍ୟକୁ ଦୌଡ଼ିଥିଲେ। ଏହି ଖବରପାଇ ରମ୍ଭା ଥାନା ପୋଲିସ ପୁରୁଷୋତ୍ତମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆସି ମୃତଦେହ ଜବତ କରି ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ବଡ଼ମେଡିକାଲକୁ ପଠାଇ ତଦନ୍ତ କରିଛି।
