ଥୁଆମୂଳ ରାମପୁର, ୧୧ା୨ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକରେ ପୁଣି ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟି ଜଣେ ଯୁବକଙ୍କ ଅକାଳ ବିୟୋଗ ହୋଇଥିବାବେଳେ ଅନ୍ୟ ଜଣେ ଜୀବନ ସହ ସଂଗ୍ରାମ କରୁଛନ୍ତି। ମୃତକ ଜଣଙ୍କ ହେଲେ ଡୁମେରପଦର ଗ୍ରାମର କେଶବ ମାଝୀ (୨୨) ଏବଂ ଗୁରୁତର ଆହତ ଜଣକ ହେଲେ ବଡ଼ଦେରଲା ଗ୍ରାମର ବିନୋଦ ଗୌଡ଼ (୨୦)। ମଙ୍ଗଳବାର ସନ୍ଧ୍ୟା ପ୍ରାୟ ୬:୩୦ ସମୟରେ କେଶବ ଓ ବିନୋଦ ଏକ କେଟିଏମ ଡ୍ୟୁକ ବାଇକ (OD-08-AA-2946) ଯୋଗେ ଥୁଆମୂଳ ରାମପୁରରୁ ନିଜ ଗ୍ରାମକୁ ଫେରୁଥିଲେ। କାଠକୁରା-ଥୁଆମୂଳ ରାମପୁର ମୁଖ୍ୟ ରାସ୍ତାର ସାହୁ ଜଙ୍ଗଲ ନିକଟସ୍ଥ ଏକ ପୋଲ ବୁଲାଣିରେ ଗାଡ଼ିଟି ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଥିଲା। ଘଟଣାସ୍ଥଳରେ ହିଁ କେଶବଙ୍କ ମୃତ୍ୟୁ ଘଟିଥିବାବେଳେ ବିନୋଦ ଗୁରୁତର ହୋଇଥିଲେ। ସମୟ ମତେ ଆମ୍ବୁଲାନ୍ସ ନ ମିଳିବାରୁ ଶେଷରେ ଅଗ୍ନିଶମବାହିନୀ ଗାଡ଼ି ଯୋଗେ ଉଭୟଙ୍କୁ ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇଥିଲା। ବିନୋଦଙ୍କ ଅବସ୍ଥା ଅତି ସଙ୍କଟାପନ୍ନ ଥିବାରୁ ତାଙ୍କୁ ଭବାନୀପାଟଣା ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ସେଠାକୁ ଯିବା ପାଇଁ ମଧ୍ୟ ସରକାରୀ ଆମ୍ବୁଲାନ୍ସ ନ ମିଳିବାରୁ ପରିବାର ଲୋକେ ଘରୋଇ ଗାଡ଼ି ଭଡ଼ା କରି ନେଇଥିବା ଜଣାପଡ଼ିଛି। ଏହି ଦୁଃଖଦ ଘଟଣା ପରେ ଅଞ୍ଚଳବାସୀ ସୁରକ୍ଷା ପାଇଁ ଚିନ୍ତା ପ୍ରକଟ କରିଛନ୍ତି। ସେ କହିଛନ୍ତି ଯେ, “ବ୍ଲକରେ ଦିନକୁ ଦିନ ଦୁର୍ଘଟଣା ବଢ଼ିବା ସହ ଅନେକ ମୂଲ୍ୟବାନ ଜୀବନ ଯାଉଛି। ତେଣୁ ସମସ୍ତ ଜନସାଧାରଣ ବିଶେଷ କରି ଯୁବପିଢ଼ି ଗାଡ଼ି ଚଳାଇବାବେଳେ ନିଶ୍ଚିତ ଭାବେ ହେଲମେଟ ପରିଧାନ କରନ୍ତୁ ଏବଂ ଦ୍ରୁତ ଗତିରୁ ନିବୃତ୍ତ ରୁହନ୍ତୁ।” ଥୁଆମୂଳ ରାମପୁର ଥାନାରେ ଏନେଇ ଏକ ଅପମୃତ୍ୟୁ ମାମଲା ରୁଜୁ ହୋଇଛି। ବୁଧବାର ମୃତଦେହ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯିବ ବୋଲି ପୋଲିସ ସୂଚନା ଦେଇଛି।
