ଶେରଗଡ଼,୨୯ା୭(ଡି.ଏନ୍.ଏ.): ଗଞ୍ଜାମ ଜିଲା ଶେରଗଡ଼ ବ୍ଲକ ଷୋଳସଲା ଗ୍ରାମର ଏକ ଗୁହାଳରୁ ଛେଳି ଚୋରି କରିବାକୁ ଯାଇ ହଣା ଖାଇଛନ୍ତି ଦୁଇ ଯୁବକ। ଉକ୍ତ ଯୁବକ ଦ୍ୱୟ ହେଲେ ଧବଳପୁର ଗ୍ରାମର ପବିତ୍ର ପ୍ରଧାନ, ଅଜୟ ବିଷୋୟୀ। ଏହି ଦୁଇଜଣ ମଙ୍ଗଳବାର ବିଳମ୍ବିତ ରାତିରେ କିଛି ଯୁବକଙ୍କୁ ଧରି ଷୋଳସଲା ଗ୍ରାମ ଶେଷରେ ଥିବା ଏକ ଗୁହାଳରୁ ଛେଳି ଚୋରି କରିବାକୁ ଯାଇଥିଲେ। ଗୋଟିଏ ଛେଳିକୁ ମାରି ନେଉଥିବା ସମୟରେ ପୂର୍ବରୁ ଜଗି ବସିଥିବା ମାଲିକମାନେ ପବିତ୍ର ଓ ଅଜୟଙ୍କୁ ଅତର୍କିତ ଖଣ୍ଡାରେ ଆକ୍ରମଣ କରିଥିଲେ। ଫଳରେ ତାଙ୍କ ସହିତ ଚୋରି କରିବାକୁ ଆସିଥିବା ଅନ୍ୟ ଯୁବକମାନେ ପ୍ରାଣଭୟରେ ଫେରାର ହୋଇ ଯାଇଥିଲେ। ଫଳରେ ଛେଳି ମାଲିକମାନେ ପବିତ୍ର ଏବଂ ଅଜୟଙ୍କୁ ମରଣାନ୍ତକ ଆକ୍ରମଣ କରି ଗୁରୁତର ଅବସ୍ଥାରେ ଛାଡ଼ି ଗ୍ରାମକୁ ପଳାଇଥିଲେ। ପରେ ସ୍ଥାନୀୟ ଲୋକେ ପୋଲିସକୁ ଖବର ଦେବାରୁ ଶେରଗଡ଼ ଏଏସ୍ଆଇ ବିଷ୍ଣୁ ପ୍ରସାଦ ଦାସ ଷୋଳସଲାରେ ପହଞ୍ଚି ତଦନ୍ତ ଚଳାଇବା ସହ ପବିତ୍ର, ଅଜୟଙ୍କୁ ପ୍ରଥମେ ଶେରଗଡ଼ ଡାକ୍ତରଖାନା ପରେ ଆମ୍ବୁଲାନ୍ସ ଯୋଗେ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଉଭୟଙ୍କ ମୁଣ୍ଡ, ହାତ, ଗୋଡ଼ରେ ଖଣ୍ଡା ଏବଂ କଟୁରିରେ ଆକ୍ରମଣ କରାଯାଇଛି। ଖବର ଲେଖାହେଲା ବେଳକୁ କୌଣସି ଏତଲା ଦିଆଯାଇନାହିଁ।
