ହାଟଡିହୀ,୧୨ା୬(ଶୁଭକାନ୍ତ ନାୟକ): କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡ ହାଟଡିହୀ ବ୍ଲକ ସୋସୋ ଥାନା ହଦଗଡ଼ ଶାଳନ୍ଦୀ ନଦୀ ଡ୍ୟାମ ବୁଲିବାକୁ ଆସିଥିବା ୭ ଜଣ ସାଙ୍ଗଙ୍କ ମଧ୍ୟରୁ ଦୁଇ ଜଣ ସାଙ୍ଗ ଗାଧୋଉଥିବା ବେଳେ ନଦୀରେ ବୁଡ଼ି ପ୍ରାଣ ହରାଇଛନ୍ତି। ସେମାନେ ହେଉଛନ୍ତି ଭଦ୍ରକ ଜିଲା ବରପଦା ପଞ୍ଚୁଗୋଛିଆ ଗ୍ରାମର ସ୍ବର୍ଗତଃ ମଦନ ଦାସଙ୍କ ପୁଅ ଈଶ୍ୱର(୨୩) ଏବଂ ତିହିଡି ଗ୍ରାମର ବାବୁ ନାୟକଙ୍କ ପୁଅ ସୋମହିତ (୨୨)। ଖବର ପାଇ ହାଟଡିହୀ ଅଗ୍ନିଶମ ବିଭାଗ ଏବଂ ସୋସୋ ଥାନା ଅଧିକାରୀ ବିଜୟ ବିହାରୀ ଘଟଣାସ୍ଥଳରେ ପହଞ୍ଚି ଥିଲେ। ଦୀର୍ଘ ସମୟ ନଦୀ ଭିତରେ ଖୋଜା ଖୋଜି ପରେ ସୋମହିତ ଏବଂ ଈଶ୍ୱରଙ୍କୁ ଉଦ୍ଧାର କରାଯାଇଥିଲା। ଉଭୟଙ୍କୁ ଆନନ୍ଦପୁର ଉପଖଣ୍ଡ ମେଡିକାଲ ନିଆଯାଇଥିଲା। ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ପୋଲିସ ୟୁଡ଼ି କେସ୍ ନଂ ୧୪/୨୪ ଏବଂ ୧୫/୨୪ରେ ଦୁଇଟି ମାମଲା ରୁଜୁ କରିଛି। ଈଶ୍ୱର ପଞ୍ଜାବ ଏବଂ ସୋମହିତ ଭୁବନେଶ୍ୱର କିଟରେ କମ୍ପ୍ୟୁଟର ସାଇନ୍ସରେ ବିସିଏ ଛାତ୍ର ଅଟନ୍ତି। ଥାନା ଅଧିକାରୀ ବିଜୟ ବିହାରୀଙ୍କ ସୂଚନା ଅନୁସାରେ ତିହିଡ଼ି ଅଞ୍ଚଳର ଆୟୁଷ୍ମାନ ପାଣିଗ୍ରାହୀ, ସୌମ୍ୟରଞ୍ଜନ ସାହୁ, ଅମୀୟ ନାୟକ, ଶୁଭମ ପରିଡ଼ା, ବେଦ ପ୍ରକାଶ ଏବଂ ସୋମହିତ ନାୟକ,ବରପଦାରୁ ଈଶ୍ୱର ଦାସ ସମସ୍ତେ ସାଙ୍ଗ ହୋଇ ହଦଗଡ଼ ଡ୍ୟାମ ବୁଲିବାକୁ ଆସିଥିଲେ। ସୋମହିତ ନଦୀରେ ଗାଧୋଉଥିବା ବେଳେ ଗୋଡ଼ ନଦୀ ଭିତରକୁ ଖସି ଯାଇଥିଲେ। ସୋମହିତ ବୁଡ଼ି ଯାଉଥିବା ଦେଖି ଈଶ୍ୱର ଉଦ୍ଧାର କରିବାକୁ ଯାଇ ନଦୀ ଭିତରେ ବୁଡ଼ି ଯାଇଥିଲେ। ଉଭୟଙ୍କ ମୃତଦେହ ଜବତ କରାଯାଇ ବ୍ୟବଚ୍ଛେଦ କରାଯାଇଛି। ଖବର ଦେବା ପରେ ପରିବାର ଲୋକେ ପହଞ୍ଚିଛନ୍ତି।
