କୋରାପୁଟ,୫।୧୧(ସ୍ବ.ପ୍ର.): କୋରାପୁଟ ଜିଲାର ପାଡୁଆଠାରେ ମଙ୍ଗଳବାର ରାତିରେ ଏକ ବ୍ରିଜ୍ ନିକଟରେ କାର- ଓ ଅଟୋ ମୁହାଁମୁହିଁ ହୋଇ ଗାଡି ୨ଟି ପାତାଳୀ ନଦୀ ଭିତରକୁ ଖସିପଡିଛି। ଫଳରେ ୨ଜଣଙ୍କ ମୃତ୍ୟୁ ହୋଇଛି। ସେମାନେ ହେଲେ ପ୍ରତୀକ୍ଷା ଶର୍ମା (୨୪) ଓ ଅଜୟ ଶୁକ୍ଲା (୩୦)। ସେମାନଙ୍କ ଘର ଆନ୍ଧ୍ର ପ୍ରଦେଶ ଅଞ୍ଚଳରେ ବୋଲି ଜଣାପଡିଛି। ପାଡୁଆ ଅଗ୍ନିଶମ ବିଭାଗ ଓ କୋରାପୁଟ ଓଡ୍ରାଫ ଟିମ୍ ପହଞ୍ଚତ୍ ପାତାଳି ନଦୀରୁ ଉଭୟଙ୍କ ମୃତଦେହ ବୁଧବାର ଉଦ୍ଧାର କରିଛନ୍ତି। ମିଳିଥିବା ଖବରରୁ ଜଣାପଡିଛି ମଙ୍ଗଳବାର ବିଳମ୍ବିତ ରାତିରେ କାର(ଏପି୩୯ଏକ୍ସ-୬୨୦୭)ଟି ପ୍ରତୀକ୍ଷା ଓ ଅଜୟଙ୍କୁ ଧରି ଆନ୍ଧ୍ର ଅଭିମୁଖେ ଯାଉଥିଲା। ପାଡୁଆ ନିକଟରେ ବିପରୀତ ଦିଗରୁ ଆସୁଥିବା ଯାତ୍ରୀବାହୀ ଅଟୋ ସହ କାର ବ୍ରିଜ୍ ଉପରେ ମୁହାଁମୁହିଁ ଧକ୍କା ହୋଇଥିଲା। ଫଳରେ ବ୍ରିଜ୍ ଉପରୁ କାର ଓ ଅଟୋ ନଦୀକୁ ଖସି ପଡିଥିଲା। ଅଟୋରେ ଥିବା ୪ ଜଣ ସ୍ଥାନୀୟ ବ୍ୟକ୍ତି ପହଁରି ପହଁରି ଉପରକୁ ଚାଲି ଆସିଥିଲେ। କାରରେ ଥିବା ଆନ୍ଧ୍ରପ୍ରଦେଶ ଅଞ୍ଚଳର ପ୍ରତୀକ୍ଷା ଓ ଅଜୟ ଉପରକୁ ଆସି ପାରି ନଥିଲେ। ଫଳରେ ସେମାନଙ୍କ ମୃତ୍ୟୁ ହୋଇଥିଲା। ଖବର ପାଇ ବୁଧବାର ସକାଳୁ କୋରାପୁଟ ତୃତୀୟ ବାଟାଲିୟନ ଦୁର୍ଗପତି ପି.କେ. ଦାସଙ୍କ ନିର୍ଦ୍ଦେଶରେ ଓଡ୍ରାଫର ହାବିଲଦାର ରାଜେଶ କୁମାର ସାହୁଙ୍କ ନେତୃତ୍ୱରେ ହାବିଲଦାର ସନ୍ତୋଷ କୁମାର ଦଣ୍ଡସେନା, ମାଝି ଶବର, ଏମ. ଖରା, ଆଲୋକ ପାଣି, ଏସ୍ ପଟ୍ଟନାୟକ, ଏମ. ପ୍ରଧାନ, ଏମ. ପୂଜାରି, ଏ. ଅଲ୍ଲି ପ୍ରମୁଖ ଘଟଣା ସ୍ଥଳରେ ପହଞ୍ଚତ୍ ନଦୀରେ ବୁଡିଥିବା କାର ଓ ଅଟୋକୁ ଉଦ୍ଧାର କରିବା ସହ କାରରେ ଥିବା ପ୍ରତୀକ୍ଷା ଓ ଅଜୟଙ୍କ ମୃତଦେହ ଉଦ୍ଧାର କରିଥିଲେ। ଦୁର୍ଗପତି ଦାସ ମଧ୍ୟ ଘଟଣା ସ୍ଥଳରେ ପହଞ୍ଚତ୍ ଉଦ୍ଧାର କାର୍ଯ୍ୟ ତଦାରଖ କରିଥିଲେ। ଉଭୟ ମୃତକଙ୍କ ଘର ଆନ୍ଧ୍ର ପ୍ରଦେଶରେ, ସେମାନଙ୍କ ସମ୍ପର୍କରେ ଅଧିକ ତଥ୍ୟ ସଂଗ୍ରହ କରାଯାଉଥିବା ପାଡୁଆ ପୋଲିସ ପକ୍ଷରୁ କୁହାଯାଇଛି।
