ବ୍ରହ୍ମପୁର ଅଫିସ,୨୫ା୬: ଜଣେ ଉଚ୍ଚଶିକ୍ଷିତା ଯୁବତୀ ବିବାହ ଦୁଇ ଦିନ ପୂର୍ବରୁ ଆତ୍ମହତ୍ୟା କରିଛନ୍ତି। ସେ ହେଲେ ସାଲୋନୀ ମହାପାତ୍ର (୨୬)। ଛତିଶଗଡ଼ ଜାମୁନିପଲି ଥାନା ଅନ୍ତର୍ଗତ ସୁକାମର ଗ୍ରାମର ମୂଳନିବାସୀ ସାଲୋନୀଙ୍କ ବ୍ରହ୍ମପୁରରେ ବିବାହ କରାଯିବାକୁ ସ୍ଥିର ହୋଇଥିଲା। ତେଣୁ ସେ ଓ ତାଙ୍କ ମା’ ହରପ୍ରିୟା ବ୍ୟାଙ୍କ କଲୋନୀ ଫାଷ୍ଟ ଲାଇନରେ ରହୁଥିଲେ। ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ କରାଇବା ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଏ ନେଇ ନଂ. ୮/୨୨ ରେ ଅପମୃତ୍ୟୁ ମାମଲା ରୁଜୁ ହୋଇଛି। ଯୁବତୀଙ୍କ ମୋବାଇଲ ଫୋନ୍ ଓ ଲାପଟପ୍ ପୋଲିସ ଜବତ କରି ଆତ୍ମହତ୍ୟାର କାରଣ ଖୋଜୁଛି। ସାଲୋନୀଙ୍କ ଭିସେରା ସଂରକ୍ଷିତ ରଖାଯାଇଛି। ଅତ୍ୟଧିକ ମାନସିକ ଚାପରୁ ସେ ଆତ୍ମହତ୍ୟା କରିଥିବା ପ୍ରାଥମିକ ତଦନ୍ତରୁ ପୋଲିସ ସନ୍ଦେହ କରୁଛି।
ପ୍ରକାଶ ଯେ, ସାଲୋନୀଙ୍କ ବାପା ସୁକୁମାର ମହାପାତ୍ର ଦିଲ୍ଲୀରେ ଜଣେ ଶିକ୍ଷକ। ସାଲୋନୀ ଆମେରିକା ଏସେଞ୍ଚୁଆର ନାମକ ଏକ ସଂସ୍ଥାରେ ଆଇଟି ଇଞ୍ଜିନିୟର ଭାବେ ୱାର୍କଫ୍ରମ ହୋମ କାମ କରୁଥିଲେ। ଇତିମଧ୍ୟରେ ତାଙ୍କର ବ୍ରହ୍ମପୁରରେ ବିବାହ ନିମନ୍ତେ ସ୍ଥିର ହୋଇଥିବାରୁ ମା’ଙ୍କ ସହ କିଛିଦିନ ପୂର୍ବରୁ ବ୍ରହ୍ମପୁର ଆସି ଘରଭଡ଼ା ନେଇ ରହୁଥିଲେ। ସେମାନଙ୍କ କେତେଜଣ ସମ୍ପର୍କୀୟ ପୂର୍ବରୁ ବ୍ରହ୍ମପୁରରେ ଅଛନ୍ତି। ଦୁଇଦିନ ପରେ ବିବାହ ଥିବାରୁ ସମ୍ପର୍କୀୟଙ୍କ ସଲୋନୀଙ୍କ ମା’ କିଣାକିଣି କରିବାକୁ ବଜାରକୁ ଯାଇଥିଲେ। ଘରେ ସାଲୋନୀ ଏକାକୀ ଥିଲେ। ବଜାରରୁ ମା’ ଘରକୁ ଫେରିବାରେ ଘର ଭିତର ପଟୁ ବନ୍ଦ ଥିବା ଜାଣି ସାଲୋନୀଙ୍କୁ ଫୋନ କରିଥିଲେ ମଧ୍ୟ କୌଣସି ଉତ୍ତର ମିଳି ନ ଥିଲା। ଶେଷରେ ସମ୍ପର୍କୀୟଙ୍କ ସହାୟତାରେ କବାଟ ଭାଙ୍ଗି ଘର ଭିତରକୁ ଯିବାରେ ସାଲୋନୀ ଚୂନି ବେକରେ ବାନ୍ଧି ଫ୍ୟାନରେ ଝୁଲୁଥିବା ମା’ ଦେଖିଥିଲେ। ତାଙ୍କୁ ତଳକୁ ଓହ୍ଲାଇ ଏମକେସିଜି ମେଡିକାଲକୁ ନିଆଯାଇଥିଲେ ମଧ୍ୟ ସାଲୋନୀଙ୍କୁ ଡାକ୍ତର ମୃତ ଘୋଷଣା କରିଥିଲେ।
