ଗୋରଖପୁର, ୨୦।୮: ଉତ୍ତର ପ୍ରଦେଶର ଗୋରଖପୁର ଜିଲାରୁ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ସମ୍ପତ୍ତି ଲୋଭରେ ଜଣେ ବୃଦ୍ଧା ମହିଳାଙ୍କୁ ଅତି ନର୍ମମ ଭାବେ ହତ୍ୟା କରାଯାଇଛି। ଜଣାପଡ଼ିଛି କି ମହିଳାଙ୍କ ସ୍ବାମୀ ୨ ଦିନ ତଳେ ମୃତ୍ୟୁବରଣ କରିଥିଲେ। ସେହିଭଳି ମୃତ ମହିଳାଜଣଙ୍କର କୌଣସି ସନ୍ତାନ ନ ଥିଲେ।
ଘଟଣା ବୁଧବାର ରାତିରେ ଚୋରିଚୋରାସ୍ଥିତ ବଂଶହିୟା ଗ୍ରାମରେ ଘଟିଛି। ପୋଲିସ ପକ୍ଷରୁ କୁହାଯାଇଛି କି, ରାତି ୮ଟାରେ ବାଦାମୀ ଦେବୀ (୭୦ ବର୍ଷ) ନାମକ ଜଣେ ମହିଳାଙ୍କୁ ଧାରୁଆ ଅସ୍ତ୍ରରେ ତଣ୍ଟି କାଟି ହତ୍ୟା କରାଯାଇଛି। ପୂର୍ବରୁ ଅସୁସ୍ଥତା କାରଣରୁ ଅଗଷ୍ଟ ୧୭ରେ ବାଦାମୀ ଦେବୀଙ୍କ ସ୍ବାମୀ ରାମ ସିପାହୀ ଯାଦବଙ୍କ ମୃତ୍ୟୁ ହୋଇଥିଲା। ୧୮ରେ ରାମଙ୍କ ଅନ୍ତିମ ସଂସ୍କାର ହୋଇଥିବାବେଳେ ଏହାର ଦିନକ ପରେ ବାଦାମୀ ଦେବୀଙ୍କୁ ସମ୍ପତ୍ତି ଲୋଭରେ ତାଙ୍କ ସମ୍ପର୍କୀୟମାନେ ହତ୍ୟା କରିଥିବା ପୋଲିସ ଅନୁମାନ କରୁଛି। ପୋଲିସ ହତ୍ୟା ମାମଲା ରୁଜୁ କରି ରାମ ସିପାହୀଙ୍କ ୨ ଭାଇ ଓ ଭଣଜାଙ୍କୁ ପଚରା ଉଚରା କରୁଛି।
