ଭୁବନେଶ୍ୱର,୨୪।୫ ଚଳିତବର୍ଷ ମେ ୩୦ ଓ ୩୧ କ୍ରମାଗତ ୨ଦିନ ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆର କର୍ମଚାରୀମାନେ ଦେଶବ୍ୟାପୀ ଧର୍ମଘଟ କରିବେ । ବ୍ୟାଙ୍କସ୍ତରୀୟ ଦ୍ୱିପାକ୍ଷିକ ରାଜିନାମା ଓ ସେଣ୍ଟ୍ରାଲ ବ୍ୟାଙ୍କ କର୍ତ୍ତୃପକ୍ଷ ଏବଂ ମାନ୍ୟତାପ୍ରାପ୍ତ ସର୍ବଭାରତୀୟ କର୍ମଚାରୀ ସଂଗଠନ ସହ କରିଥିବା ରାଜିନାମାଗୁଡ଼ିକୁ ଉଲ୍ଲଂଘନ କରି ବ୍ୟାଙ୍କର ୪୦୦୦ରୁ ଅଧିକ କିରାଣିଙ୍କୁ ମନମୁଖି ଭାବେ ଗଣବଦଳି, କର୍ମଚାରୀ ଓ ଅଫିସରମାନଙ୍କୁ ହଇରାଣହରକତ କରିବା, ୬୦୦ ବ୍ୟାଙ୍କ ଶାଖା ବନ୍ଦ କରିବା ପାଇଁ ଚେଷ୍ଟା, ଆଉଟସୋର୍ସିଂ କରି ଠିକା କର୍ମଚାରୀ ନିଯୁକ୍ତି, ବ୍ୟାଙ୍କର ଘରୋଇକରଣ ଉଦ୍ୟମ ବିରୋଧରେ ଓ ସର୍ବୋପରି କେନ୍ଦ୍ରୀୟ ଶ୍ରମ କମିଶନରଙ୍କ ନିର୍ଦ୍ଦେଶ ଅନୁସାରେ ଶିଳ୍ପ ବିବାଦ ଆଇନର ୩୩ ଧାରାକୁ ଉଲ୍ଲଂଘନ କରିବା ବିରୋଧରେ ଏହି ଧର୍ମଘଟର ଡାକରା ଦିଆଯାଇଛି। ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆରେ ଥିବା ଏଆଇବିଇଏ, ଆଇଏବିଇଏଫ, ବିଇଏଫଆଇ, ଏନସିବିଇ ଓ ଏନଓବିଡବ୍ଲ୍ୟୁ ସଙ୍ଗଠନ ପକ୍ଷରୁ ଉପରୋକ୍ତ ଦାବିଗୁଡ଼ିକ ଉପରେ ବ୍ୟାଙ୍କ କର୍ତ୍ତୃପକ୍ଷଙ୍କୁ ମିଳିତ ଭାବେ ଧର୍ମଘଟର ନୋଟିସ୍ ଦିଆଯାଇଛି। ଓଡ଼ିଶାରେ ଏହି ଧର୍ମଘଟକୁ ସଫଳ କରିବା ପାଇଁ ସେଣ୍ଟ୍ରାଲ ବ୍ୟାଙ୍କର ସମସ୍ତ କର୍ମଚାରୀଙ୍କୁ ଓ ଧର୍ମଘଟକୁ ନୈତିକ ସମର୍ଥନ କରିବା ପାଇଁ ଅଫିସର ସଙ୍ଗଠନଗୁଡ଼ିକୁ ଓଡ଼ିଶା ରାଜ୍ୟ ସେଣ୍ଟ୍ରାଲ ବ୍ୟାଙ୍କ କର୍ମଚାରୀ ୟୁନିୟନ ପକ୍ଷରୁ ସଭାପତି ପ୍ରଫୁଲ୍ଲ କୁମାର ତ୍ରିପାଠୀ, ସାଧାରଣ ସମ୍ପାଦକ ଓଁକାର ମହାନ୍ତି ଏବଂ ନିଖିଳ ଓଡ଼ିଶା ସେଣ୍ଟ୍ରାଲ ବ୍ୟାଙ୍କ କର୍ମଚାରୀ ଆସୋସିଏଶନର ସାଧାରଣ ସମ୍ପାଦକ ସୁନୀଲ ମହାରଣା ନିବେଦନ କରିଛନ୍ତି।
