ହାଟଡିହୀ/ଛେନାପଦୀ/ଆନନ୍ଦପୁର,୨୫ା୪(ଶୁଭକାନ୍ତ ନାୟକ/ନିରାକାର ପରିଡ଼ା/ସୁଶାନ୍ତ କୁମାର ସାହୁ): କେନ୍ଦୁଝର ଜିଲା ନନ୍ଦିପଦା ଥାନା ଅଧୀନ ହାଟଡିହୀଠାରେ ଥିବା ପେଟ୍ରୋଲ ଟାଙ୍କିରୁ ପ୍ରାୟ ୧୫ ହଜାର ଟଙ୍କାର ପେଟ୍ରୋଲ ନେଇ ଚମ୍ପଟ ମାରିଥିବା ଦୁଇ ଅଭିଯୁକ୍ତଙ୍କୁ କେନ୍ଦୁଝର କୋର୍ଟରୁ ରିମାଣ୍ଡରରେ ଆଣି ପୋଲିସ ଶନିବାର ସେମାନଙ୍କୁ ସ୍ଥାନୀୟ ହାଟଡିହୀ କୋର୍ଟରେ ହାଜର କରାଇଛି। ଜାମିନ ନାମଞ୍ଜୁର ହେବାରୁ ସେମାନଙ୍କୁ ଜିଲା କାରାଗାରକୁ ପଠାଇ ଦିଆଯାଇଥିବା ଇନ୍ସପେକ୍ଟର ବଳିଆ ବାରିକ କହିଛନ୍ତି।
ବାରିକଙ୍କ ସୂଚନା ଅନୁସାରେ, କଟକ ଜିଲା ନରସିଂହପୁର ଥାନା ପତଣ୍ଡା ଗ୍ରାମର ଭାଗିରଥୀ ପଣ୍ଡାଙ୍କ ପୁଅ ଦୀପଙ୍କର (୨୨) ଏବଂ ସନ୍ତୋଷ ପଣ୍ଡାଙ୍କ ପୁଅ ରାଜେଶ (୨୩) ଗତ ମାର୍ଚ୍ଚ ୨୪ରେ ପେଟ୍ରୋଲ ଟାଙ୍କିରୁ ପ୍ରାୟ ୧୫ ହଜାର ଟଙ୍କାର ପେଟ୍ରୋଲ ନେଇଥିଲେ। ଟାଙ୍କି କର୍ମଚାରୀଙ୍କୁ ଟଙ୍କା ନ ଦେଇ ଦ୍ରୁତ ଗତିରେ ଗାଡ଼ି ଧରି ଫେରାର ହୋଇ ଯାଇଥିଲେ। ଘଟଣା ପରଦିନ ଥାନାରେ ଅଭିଯୋଗ ହେବା ପରେ କେସ୍ ନଂ ୧୨୪/୨୦୨୬ରେ ଏକ ମାମଲା ରୁଜୁ ହୋଇଥିଲା। ଟାଙ୍କିରେ ଲାଗିଥିବା ସିସି କ୍ୟାମେରାରୁ ଗାଡି ନମ୍ବର ଜଣାପଡ଼ିଥିଲା। ଅଭିଯୁକ୍ତମାନେ ବ୍ୟବହାର କରୁଥିବା ଗାଡ଼ିର ନମ୍ବର ବାରମ୍ବାର ପରିବର୍ତ୍ତନ କରୁଥିଲେ। ୮ଟି ଭିନ୍ନ ଭିନ୍ନ ନମ୍ବର ପ୍ଲେଟ୍ ଜବତ ହୋଇଛି। ଜିଲାର ହରିଚନ୍ଦନପୁର, ଢେଙ୍କିକୋଟ, ଘଟଗାଁ ପରି ବିଭିନ୍ନ ଅଞ୍ଚଳରେ ନିଜର କାୟା ବିସ୍ତାର କରି ସକ୍ରିୟ ହୋଇଥିଲେ। ଏହି ଦୁଇ ଅଭିଯୁକ୍ତ କେନ୍ଦୁଝର ଜିଲା ପଣ୍ଡାପଡ଼ା ଥାନା କେସ୍ ନଂ ୮୫/୨ ଏପ୍ରିଲ ୨୦୨୬ରେ ଗିରଫ ହୋଇ ଜିଲା କାରାଗାରରେ ଥିଲେ। ଏମାନଙ୍କୁ ଚୋରି, ଠକେଇ, ମିଥ୍ୟା ଡକୁମେଣ୍ଟ ପ୍ରସ୍ତୁତ, ଆର୍ମସ ପ୍ରଭୃତି ବିଭିନ୍ନ ଆକ୍ଟରେ ଗିରଫ କରାଯାଇଥିଲା। ସେହିପରି ଭଦ୍ରକ, ଦେବଗଡ଼, ବାଲେଶ୍ୱର ଢେଙ୍କାନାଳ, କଟକ ଆଦି ଜିଲାରେ ମଧ୍ୟ ଅଭିଯୁକ୍ତଙ୍କ ନାମରେ ମାମଲା ରହିଛି।
