ମୋରଡ଼ା,୨୩ା୧୨ (ଡି.ଏନ୍.ଏ.): ଦାରିଦ୍ର୍ୟର ତାଡ଼ନାରେ ଜଣେ ଆଦିବାସୀ ମହିଳା ହଜାରେ ଟଙ୍କା ଆଉ ଖଣ୍ଡେ ଶାଢ଼ି ବଦଳରେ ନବଜାତ ଯାଆଁଳା ଶିଶୁଙ୍କୁ ଦୁଇ ବ୍ୟକ୍ତିଙ୍କୁ ବିକିଦେବା ଚର୍ଚ୍ଚାର ବିଷୟ ହୋଇଛି। ମୟୂରଭଞ୍ଜ ଜିଲା ମୋରଡ଼ା ବ୍ଲକ ଭାଲିଆଡିହା ପଞ୍ଚାୟତର ଡାକୋଇ ଅମଣନାମା ଗ୍ରାମରେ ଏହି ଅଭାବନୀୟ ଘଟଣା ଘଟିଛି। ମହିଳା ଜଣକ ଗତ ୮ ତାରିଖରେ ବାରିପଦାସ୍ଥିତ ପିଆର୍ଏମ୍ ମେଡିକାଲରେ ଯାଆଁଳା ସନ୍ତାନ (ଗୋଟିଏ ଝିଅ ଏବଂ ଗୋଟିଏ ପୁଅ ) ଜନ୍ମ ଦେଇଥିଲେ। ୯ ତାରିଖରେ ଡାକ୍ତରଖାନାରୁ ଡିସଚାର୍ଜ ହୋଇଥିଲେ। କିନ୍ତୁ ଘରକୁ ଫେରିବା ବେଳକୁ ତାଙ୍କ କୋଳରେ ପିଲା ନ ଥିଲେ। ଅସ୍ତିଆ ଏବଂ କାଠପାଳ ଅଞ୍ଚଳର ଦୁଇ ବ୍ୟକ୍ତିଙ୍କୁ ସେ ତାଙ୍କ ପିଲାଙ୍କୁ ବିକ୍ରି କରି ଦେଇଥିବା ଉକ୍ତ ଗ୍ରାମର ଅଙ୍ଗନଓ୍ବାଡି କର୍ମୀ ଲକ୍ଷ୍ମୀ ମୁର୍ମୁ କହିଛନ୍ତି। ପିଲା ବିକ୍ରି ବାବଦରେ ସେ ହଜାରେ ଟଙ୍କା ଏବଂ ଖଣ୍ଡେ ଶାଢ଼ି ଆଣିଥିବା କଥା ଅଙ୍ଗନଓ୍ବାଡି କର୍ମୀଙ୍କୁ ଜଣାଇଥିବା ସୂଚନା ମିଳିଛି। ତେବେ ବୁଧବାର ରାତିରେ ଏନେଇ ଗଁାରେ ଏକ ବୈଠକ ବସି ଦୁଇ ପିଲାଙ୍କୁ ଫେରାଇ ଆଣିବାକୁ ସମ୍ପୃକ୍ତ ମହିଳାଙ୍କୁ କୁହାଯାଇଥିଲା। ତେବେ ଦାରିଦ୍ର୍ୟ ଯୋଗୁ ଦୁଇ ପିଲାଙ୍କୁ ପାଳିବା ତାଙ୍କ ପକ୍ଷେ ସମ୍ଭବ ନୁହେଁ ବୋଲି ମହିଳା ଜଣକ କହିଛନ୍ତି। ଉଲ୍ଲେଖଯୋଗ୍ୟ, ମାନସିକ ବିକୃତି ଯୋଗୁ ମହିଳାଙ୍କ ସ୍ବାମୀ କିଛି ଦିନ ହେବ ଘରୁ କେଉଁଆଡ଼େ ପଳାଇ ଯାଇଛନ୍ତି। ତାଙ୍କ ନିଖୋଜ ସମ୍ପର୍କରେ ପରିବାର ଲୋକେ ବାରିପଦା ଟାଉନ ଥାନାରେ ଲିଖିତ ଅଭିଯୋଗ କରିଥିଲେ ମଧ୍ୟ ତାଙ୍କର କୌଣସି ସନ୍ଧାନ ମିଳି ପାରିନାହିଁ।
