ସୁରତ,୯।୩: ଆଜିକାଲି ଗୁଜରାଟର ଯମଜ ଭଉଣୀ ଚର୍ଚ୍ଚାରେ ଅଛନ୍ତି। ଦୁହେଁ MBBS ପରୀକ୍ଷାରେ ସମାନ ନମ୍ବର ରଖି ଏକ ଅନନ୍ୟ ରେକର୍ଡ ସୃଷ୍ଟି କରିଛନ୍ତି। ଗୁଜରାଟର ସୁରତର ବାସିନ୍ଦାର ବାସିନ୍ଦା ରିବା ଏବଂ ରହିନ ହାଫିଜ ଏହି ବିରଳ ସଫଳତାକୁ ସେଲିବ୍ରେଟ୍ କରୁଛନ୍ତି। ଉଭୟ ସମାନ ନମ୍ବରରେ ଭଦୋଦରାର GMERS ମେଡିକାଲ କଲେଜରୁ ଏକକାଳୀନ MBBS ଶେଷ କରିଛନ୍ତି। ସେ ପରୀକ୍ଷାରେ ମୋଟ ୯୩୫ ନମ୍ବର ଅର୍ଥାତ୍ ୬୬.୮ ପ୍ରତିଶତ ନମ୍ବର ରଖିଛନ୍ତି।
ଏହି ଦୁଇ ୨୪ ବର୍ଷୀୟ ଭଉଣୀ ଆର୍ଥିକ ଅସୁବିଧାକୁ ଦୂର କରି ଡାକ୍ତର ହେବାର ସଫଳତା ହାସଲ କରିଛନ୍ତି। ତାଙ୍କ ମାଆ ଗୁଲଶାଦ ବାନୁ ଜଣେ ସିଙ୍ଗଲ ମଦର ଏବଂ ପେଶାରେ ଜଣେ ଶିକ୍ଷୟିତ୍ରୀ। ରହିନ ହାଫିଜି କହିଛନ୍ତି, ମୋ ମାମୁଁ ଜଣେ ଡାକ୍ତର, ଯିଏ ଆମକୁ ଚିକିତ୍ସା କ୍ଷେତ୍ରକୁ ଯିବା ପାଇଁ ପ୍ରେରଣା ଦେଇଥିଲେ। ଆମେ ସବୁବେଳେ ଏକାଠି ପରୀକ୍ଷା ପାଇଁ ପ୍ରସ୍ତୁତ ହେଉଥିଲୁ, ତେଣୁ ଆଜି ଏହି ସଫଳତା ପାଇଛୁ।
ରିପୋର୍ଟ ଅନୁସାରେ, ରିବା ଦଶମ ଶ୍ରେଣୀ ପରୀକ୍ଷାରେ ୯୯ ପ୍ରତିଶତ ନମ୍ବର ରଖିଥିବାବେଳେ, ରହିନ ୯୮.୫ ପ୍ରତିଶତ ନମ୍ବର ପାଇଥିଲେ। ଦ୍ୱାଦଶ ଶ୍ରେଣୀରେ ସେ ଯଥାକ୍ରମେ ୯୮.୨ ଏବଂ ୯୭.୩ ପ୍ରତିଶତ ମାର୍କ ପାଇଥିଲେ। ବିନା କୋଚିଂରେ ଦୁହେଁ NEET UGରେ ଚମତ୍କାର ପ୍ରଦର୍ଶନ କରିଥିଲେ। ରିବା ୯୭ ପ୍ରତିଶତ ନମ୍ବର ରଖିଥିବାବେଳେ, ରହିନ ୯୭.୭ ପ୍ରତିଶତ ନମ୍ବର ରଖିଥିଲେ।
ଏହି ଯମଜ ଭଉଣୀମାନେ ସେମାନଙ୍କର ସଫଳତାର ଶ୍ରେୟ ସେମାନଙ୍କ ମା’ ଏବଂ ଜେଜେମାଆଙ୍କୁ ଦେଇଛନ୍ତି ଏହି ଦୁହେଁ ସେମାନଙ୍କୁ ସବୁବେଳେ ସମର୍ଥନ ଏବଂ ଉତ୍ସାହିତ କରିଥିଲେ। ରହିନ କହିଛନ୍ତି, ଆମେ ଅନେକ ଉତ୍ଥାନ-ପତନ ଦେଖିଛୁ, କିନ୍ତୁ ମା’ ଏବଂ ଜେଜେମାଆ ଆମର ଶକ୍ତି ଏବଂ ପ୍ରେରଣାର ନିରନ୍ତର ଉତ୍ସ ହୋଇ ଆସିଛନ୍ତି। ଆମେ ଖୁସି ଯେ ଆମେ ତାଙ୍କର ସ୍ବପ୍ନ ପୂରଣ କରିପାରିଲୁ। ସରକାରୀ ସ୍କଲାରସିପ ଏବଂ ଅନ୍ୟାନ୍ୟ ଯୋଗ୍ୟତା ଭିତ୍ତିକ ଆର୍ଥିକ ସହାୟତା ମାଧ୍ୟମରେ ଆମେ ଏଠି ପହଞ୍ଚିଛୁ। ଆଗକୁ ଡାକ୍ତର ହୋଇ ଅନ୍ୟମାନଙ୍କୁ ସାହାଯ୍ୟ କରିବାକୁ ଦୃଢ଼ ସଂକଳ୍ପବଦ୍ଧ।
