ଆଙ୍କରା,୮।୧୧ : ଗତ ଏକ ମାସ ଧରି ଇସ୍ରାଏଲ ଏବଂ ହମାସ ମଧ୍ୟରେ ଯୁଦ୍ଧ ଚାଲିଛି। ଏହି ସମୟରେ ତୁର୍କୀ ସଂସଦ ଦେଶର ରେଷ୍ଟୁରାଣ୍ଟରେ ଅନେକ ଉତ୍ପାଦର ବ୍ୟବହାର ଉପରେ ପ୍ରତିବନ୍ଧକ ଲଗାଇବାକୁ ନିଷ୍ପତ୍ତି ନେଇଛି। ତୁର୍କୀ ସରକାର କହିଛନ୍ତି ଯେଉଁ କମ୍ପାନୀ ମାନେ ଇସ୍ରାଏଲକୁ ସମର୍ଥନ କରୁଛନ୍ତି ସେମାନଙ୍କର ଉତ୍ପାଦର ବ୍ୟବହାରକୁ ବଏକଟ କରାଯିବ।
ତୁର୍କୀ ସଂସଦ କୋକାକୋଲା ଏବଂ ନେଷ୍ଟଲେ ଉତ୍ପାଦ ବ୍ୟବହାର ଉପରେ ପ୍ରତିବନ୍ଧକ ଲଗାଇଛି। ତୁର୍କୀ ସଂସଦର ବାଚସ୍ପତି ନୋମାନ କୁର୍ତ୍ତୁଲମସ କହିଛନ୍ତି ସଂସଦ ଇସ୍ରାଏଲର ଆକ୍ରୋଶକୁ ସମର୍ଥନ କରୁଥିବା ଉତ୍ପାଦ ବ୍ୟବହାର କରିବ ନାହିଁ। ତୁର୍କୀର ଉତ୍ତର ପ୍ରଦେଶର ଅର୍ଡୁରେ ଏକ କାର୍ଯ୍ୟକ୍ରମରେ ସେ କହିଛନ୍ତି ତୁର୍କୀ ଗ୍ରାଣ୍ଡ ନ୍ୟାଶନାଲ ଆସେମ୍ବଲିରେ ଆମେ ଇସ୍ରାଏଲର ଆକ୍ରମଣକୁ ସମର୍ଥନ କରୁଥିବା କମ୍ପାନୀର କୌଣସି ଉତ୍ପାଦ ବ୍ୟବହାର କରିବୁ ନାହିଁ ବୋଲି ସହମତ ହୋଇଛୁ।
ଟିଆରଟି ନ୍ୟୁଜ ଅନୁଯାୟୀ, ନୋମାନ କହିଛନ୍ତି ବର୍ତ୍ତମାନଠାରୁ ଆମେ ସେହି କମ୍ପାନୀମାନଙ୍କଠାରୁ କିଛି କିଣିବୁ ନାହିଁ। ଆମେ କିଣିଥିବା ଉତ୍ପାଦଗୁଡ଼ିକୁ ମଧ୍ୟ ଫିଙ୍ଗିଦେବୁ। ତେବେ ସଂସଦର ବାଚସ୍ପତି ନୋମାନ ସଂସଦର ରେଷ୍ଟୁରାଣ୍ଟରୁ କେଉଁ କମ୍ପାନୀର ଉତ୍ପାଦ ଉପରେ ପ୍ରତିବନ୍ଧକ ଲଗାଯାଇଛି ସେ ସମ୍ପର୍କରେ ସୂଚନା ଦେଇନାହାଁନ୍ତି। ରଏଟର୍ସ ଅନୁଯାୟୀ ତୁର୍କୀ ସଂସଦ କୋକାକୋଲା ଏବଂ ନେଷ୍ଟଲର ଉତ୍ପାଦକୁ ବଏକଟ କରିଛି। ନ୍ୟୁଜ ଏଜେନ୍ସି ସୂତ୍ରରୁ ପ୍ରକାଶ ସଂସଦ ରେଷ୍ଟୁରାଣ୍ଟର ମେନୁରୁ କୋକାକୋଲା ଏବଂ ନେଷ୍ଟଲେକୁ ହଟାଇ ଦିଆଯାଇଛି।
