ସୋନପୁର,୧୦।୧୧(ମୃତ୍ୟୁଞ୍ଜୟ ଶତପଥୀ): ଆସନ୍ତା ୧୨ ତାରିଖ ମଙ୍ଗଳବାର କାର୍ତ୍ତିକ ଏକାଦଶୀ। ଜଗନ୍ନାଥଙ୍କ ଦୁର୍ଲଭ ବେଶ। ଏହି ଦିନ ପୁରୀ ଶ୍ରୀଜୀଉଙ୍କଠାରେ ଲାଗିହେବ ଫୁଲ ଓ ତୁଳସୀ। ଏଥିପାଇଁ ରବିବାର ସୁବର୍ଣ୍ଣପୁର ଜିଲାର ପୁଣ୍ୟପୀଠ ପାତାଳି ଶ୍ରୀକ୍ଷେତ୍ରରୁ ସକାଳ ସାଢେ ୫ଟାରେ ତୁଳସୀ ରଥର ଶୁଭାରମ୍ଭ ହୋଇଛି। ଦୁଇଟି ସୁସଜ୍ଜିତ ରଥ ଶ୍ରୀକ୍ଷେତ୍ର ଅଭିମୁଖେ ଯାତ୍ରା କରୁଛି। ଏହା ସୋମବାର ପୁରୀରେ ପହଞ୍ଚିବ।
ସୁବର୍ଣ୍ଣପୁର ଶ୍ରୀଜଗନ୍ନାଥ ସଂସ୍କୃତି ସମିତି ପକ୍ଷରୁ ଚଳିତ ଥର ପଞ୍ଚମବର୍ଷ ପାଇଁ ଏହି ଯାତ୍ରା ଆୟୋଜିତ ହୋଇଛି। ପାତାଳି ଶ୍ରୀକ୍ଷେତ୍ରଠାରୁ ଉଲୁଣ୍ଡା ଜଗନ୍ନାଥ ମନ୍ଦିର, ବିନିକା ଜଗନ୍ନାଥ ମନ୍ଦିର, ମହାଦେବପାଲି, ବିଶିମୁଣ୍ଡା ଜଗନ୍ନାଥ ମନ୍ଦିର, ସୋନପୁର, ମନମୁଣ୍ଡା, ବାଉଁୁଶୁଣି, ବୌଦ୍ଧ, ଚାରିଛକ, ଦଶପଲ୍ଲା, ନୟାଗଡ, ଖୋର୍ଦ୍ଧା ଓ ଭୁବନେଶ୍ୱର ରାସ୍ତା ଦେଇ ପୁରୀ ଶ୍ରୀମନ୍ଦିର ପର୍ଯ୍ୟନ୍ତ ତୁଳସୀ ରଥଯାତ୍ରାର କାର୍ଯ୍ୟକ୍ରମ ରହିଛି। ଜଗନ୍ନାଥଙ୍କ ପାଇଁ ତୁଳସୀ, ଗେଣ୍ଡୁଫୁଲ ଓ ପଦ୍ମଫୁଲ ପଠାଯାଉଥିବା ସୂଚନା ପାଇବା ପରେ ଭକ୍ତଙ୍କ ମଧ୍ୟରେ ଭକ୍ତି ଭାବ ସୃଷ୍ଟି ହୋଇଥିଲା। ଭାବର ଠାକୁରଙ୍କ ଶ୍ରୀଅଙ୍ଗରେ ତୁଳସୀ ଲାଗି କରିବାକୁ ଭକ୍ତଙ୍କ ମନ ବ୍ୟାକୁଳ ହୋଇ ଉଠିଥିଲା।
ରବିବାର ଅଁଳା ନବମୀ ଦିନ ତୁଳସୀର ଦିବ୍ୟ ସୁଗନ୍ଧରେ ମହକି ଯାଉଥିଲା ସାରା ସୁବର୍ଣ୍ଣପୁର। ନିଜେ ଜଗା ପାଖକୁ ଯାଇ ନପାରି ନିଜ ତୁଳସୀ ଓ ଫୁଲ ପଠାଇବା ପାଇଁ ବିଭିନ୍ନ ଛକ ଏବଂ ମନ୍ଦିର ସମ୍ମୁଖରେ ଅପେକ୍ଷା କରି ରହିଥିଲେ ଭକ୍ତମାନେ। କେଉଁଠି ରଙ୍ଗବେରଙ୍ଗର ମୁରୁଜ ସଜାଯାଇଥିଲା ତ କେଉଁଠି ପୂର୍ଣ୍ଣକୁମ୍ଭ ବସାଯାଇଥିଲା। ସୋନପୁର ବ୍ଲକ ଛକ, ଆମ୍ବେଡକର ଛକ, ପଶ୍ଚିମ ସୋମନାଥ ମନ୍ଦିର, ବଡ ଜଗନ୍ନାଥ ମନ୍ଦିର, ଗୁଣ୍ଡିଚା ମନ୍ଦିର ଓ ସତ୍ୟନାରାୟଣ ମନ୍ଦିର ଆଦି ସ୍ଥାନରୁ ଭକ୍ତଙ୍କ ତୁଳସୀ ସଂଗ୍ରହ କରାଯାଇଥିଲା।
ବିଭିନ୍ନ ସ୍ଥାନରେ ତୁଳସୀ ଧରି ଅପେକ୍ଷା କରି ରହିଥିଲେ ଭକ୍ତମାନେ। ଶ୍ରୀଅଙ୍ଗରେ ତୁଳସୀ ଲାଗି ପାଇଁ ପ୍ରଦାନ କରିଥିଲେ ଜଗାର ପ୍ରିୟ ଦ୍ରବ୍ୟ ତୁଳସୀ। ବିଭିନ୍ନ ସ୍ଥାନରେ ଭବ୍ୟ ସମ୍ବର୍ଦ୍ଧନା ଜଣାଇ ଥିଲେ ସହରବାସୀ। ରଥ ସମ୍ମୁଖରେ ଜଗନ୍ନାଥ ଭଜନ, କୀର୍ତ୍ତନ ଆଦି ପରିବେଷଣ କରା ଯାଉଥିଲା। ଏହି ତୁଳସୀ ଯାତ୍ରାରେ ସାମିଲ ହୋଇଥିଲେ ଅବାଳ ବୃଦ୍ଧ ବନିତା। ଜୟ ଜଗନ୍ନାଥ ଧ୍ୱନିରେ ସହର ପ୍ରକମ୍ପିତ ହୋଇ ଉଠିଥିଲା। ଶ୍ରୀ ଜଗନ୍ନାଥ ସଂସ୍କୃତି ସମିତିର ଚନ୍ଦ୍ରଶେଖର ଓତା, ଗଦାଧର ବାରିକ, ପୂର୍ଣ୍ଣଚନ୍ଦ୍ର ପାଢୀ, ଶ୍ରୀବତ୍ସ ମଲ୍ଳିକ, ସଞ୍ଜୟ କୁମାର ମହାପାତ୍ର, ବେଣୀମାଧବ ବେଦବାକ୍, ଶ୍ରଦ୍ଧାଞ୍ଜଳି ମିଶ୍ର, ପ୍ରସାଦୁ ପଧାନ, ମନୋଜ ଅଗ୍ରଓ୍ବାଲ, ଜୟବ୍ରତ ଜଗଦଲା, ଶ୍ୟାମାଓଁ ପ୍ରସାଦ ମିଶ୍ର, ରାଜେଶ ସିଂ, ଦିଲୀପ ତ୍ରିପାଠୀ, ପ୍ଲାବନ ମହାପାତ୍ର, ସୁରେଶ ମିଶ୍ର, ରଘୁନାଥ ମହାପାତ୍ର, ପଦ୍ମଲୋଚନ ମିଶ୍ର, ନନ୍ଦ କିଶୋର କମାଣୀ ଓ ଚନ୍ଦ୍ରକାନ୍ତି ପାଣ୍ଡେ ପ୍ରମୁଖ ଏହି ଯାତ୍ରାର ନେତୃତ୍ୱ ନେଇଥିଲେ।
