ନୂଆଦିଲ୍ଲୀ,୧୫ା୫: ଭାରତ ଏବଂ ପାକିସ୍ତାନ ମଧ୍ୟରେ ଆମେରିକାର ମଧ୍ୟସ୍ଥତାରେ ହୋଇଥିବା ଯୁଦ୍ଧବିରତିକୁ ୧୮ ମେ ପର୍ଯ୍ୟନ୍ତ ବୃଦ୍ଧି କରାଯାଇଛି। ପାକିସ୍ତାନର ଉପ ପ୍ରଧାନମନ୍ତ୍ରୀ ଇଶାକ ଡାର ଗୁରୁବାର (୧୫ ମେ) ଏହି ଘୋଷଣାର ପୁଷ୍ଟି କରିଛନ୍ତି। ପାକିସ୍ତାନର ଉପ ପ୍ରଧାନମନ୍ତ୍ରୀ ଇଶାକ ଡାରଙ୍କ ପାଖରେ ବୈଦେଶିକ ମନ୍ତ୍ରଣାଳୟର ଦାୟିତ୍ୱ ମଧ୍ୟ ରହିଛି।
ପାକିସ୍ତାନର ଉପ ପ୍ରଧାନମନ୍ତ୍ରୀ ଇଶାକ ଡାର ପାକିସ୍ତାନୀ ସଂସଦକୁ ସମ୍ବୋଧିତ କରି କହିଛନ୍ତି ଯେ ଉଭୟ ଦେଶ ମଧ୍ୟରେ ଏହି ନିଷ୍ପତ୍ତି ଡିଜିଏମଓ ସ୍ତରରେ ବୁଧବାର (୧୪ ମେ) ହଟଲାଇନରେ ଆଲୋଚନା ସମୟରେ ନିଆଯାଇଥିଲା। ଏହି ଯୁଦ୍ଧବିରତିକୁ ୧୮ ମଇ ପର୍ଯ୍ୟନ୍ତ ବୃଦ୍ଧି କରାଯାଇଛି।
ଅନ୍ୟପକ୍ଷରେ, ଇଶାକ ଡାର ଅଲ ଜଜିରାକୁ ଦେଇଥିବା ଏକ ସାକ୍ଷାତକାରରେ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା କରାଯାଇଥିବା ଦାବିକୁ ମଧ୍ୟ ଖାରଜ କରିଛନ୍ତି। ତାଙ୍କୁ ଯେତେବେଳେ ପଚରାଯାଇଥିଲା, “ଯୁଦ୍ଧବିରତି ପାଇଁ ଆମେରିକାକୁ ସମ୍ପର୍କ କରାଯାଇଥିଲା କି?” ଏହି ପ୍ରଶ୍ନର ଉତ୍ତରରେ ଇଶାକ ଡାର କହିଛନ୍ତି ଯେ ଆମେ ଯୁଦ୍ଧବିରତି ସମ୍ପର୍କରେ ଆମେରିକା ସହ କୌଣସି ଆଲୋଚନା କରି ନାହୁଁ।
ଦ୍ୱିତୀୟ ପ୍ରଶ୍ନ ପଚରାଯିବା ପରେ ଯେ ଆମେରିକା ପକ୍ଷରୁ ପାକିସ୍ତାନ ଉପରେ ଯୁଦ୍ଧବିରତି ଲଦାଯାଇଥିଲା କି? ଇଶାକ ଡାର କହିଛନ୍ତି ଯେ ଯୁଦ୍ଧବିରତି ଲଦାଯିବାର ପ୍ରଶ୍ନ ହିଁ ଉଠୁ ନାହିଁ। ସେ ଦାବି କରି କହିଛନ୍ତି, “ଏହା ଅହଂକାର ନୁହେଁ, ବରଂ ବାସ୍ତବବାଦୀ ହେବାର ପ୍ରଶ୍ନ। ଯଦି ଆମେ ଆମର ପଡ଼ୋଶୀ ଦେଶ ପରି ବ୍ୟବହାର କରିଥାନ୍ତୁ, ତେବେ ଏହି ସମଗ୍ର ଅଞ୍ଚଳରେ ବିନାଶକାରୀ ପରିଣାମ ହୋଇଥାନ୍ତା।”
ସେ କହିଛନ୍ତି ଯେ ପାକିସ୍ତାନ ସହ ଆମେରିକା, ସାଉଦି ଆରବ, ସଂଯୁକ୍ତ ଆରବ ଏମିରେଟ୍ସ ସମେତ ଅନେକ ଦେଶ ଆଲୋଚନା କରୁଥିଲେ। ଏହି ସମସ୍ତ ଦେଶ ଉଭୟ ପକ୍ଷ ମଧ୍ୟରେ ଶାନ୍ତି ବଜାୟ ରଖିବା ପାଇଁ ଉଦ୍ୟମ କରୁଥିଲେ। ଆମେ ଏହି ନିଷ୍ପତ୍ତି ନେବା ପାଇଁ ସ୍ୱାଧୀନ ଥିଲୁ। ଭାରତର ସୈନ୍ୟ ଅଡ଼ୁଆଳି ଏବଂ ନାଗରିକମାନଙ୍କ ଉପରେ ପାକିସ୍ତାନ ପକ୍ଷରୁ କରାଯାଇଥିବା ଆକ୍ରମଣ ସମ୍ପର୍କରେ ସେ ମିଛ କହି ଦାବି କରିଛନ୍ତି ଯେ ଆମେ ବହୁତ ଧୈର୍ଯ୍ୟ ଦେଖାଇଛୁ। ଭାରତ ପକ୍ଷରୁ କରାଯାଇଥିବା କାର୍ଯ୍ୟର ଏକ ମାପଚୁପ ଉତ୍ତର ଦେଇଛୁ।
