ଓ୍ବାଶିଂଟନ,୩।୩: ଇସ୍ରାଏଲ ଏବଂ ଆମେରିକା ଇରାନ ଉପରେ ଆକ୍ରମଣ ଜାରି ରଖିଛନ୍ତି। ମଙ୍ଗଳବାର ଆକ୍ରମଣର ଚତୁର୍ଥ ଦିନ। ଇସ୍ରାଏଲ ଏବଂ ଇରାନ ଶନିବାର ମିଳିତ ଭାବରେ ଇରାନ ଉପରେ ଆକ୍ରମଣ କରିଥିଲେ, ଯେଉଁଥିରେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନେଇଙ୍କ ମୃତ୍ୟୁ ହୋଇଥିଲା। ଏହି ଆକ୍ରମଣରେ ୭୦୦ରୁ ଅଧିକ ଲୋକ ପ୍ରାଣ ହରାଇଛନ୍ତି, ଯେଉଁଥିରେ ଇରାନର ଶୀର୍ଷ ସାମରିକ ନେତା ମଧ୍ୟ ସାମିଲ ଅଛନ୍ତି। ଏହି ଆକ୍ରମଣ ସମଗ୍ର ମଧ୍ୟପ୍ରାଚ୍ୟକୁ ଏକ ଯୁଦ୍ଧରେ ଗ୍ରାସ କରିଛି।
ମଧ୍ୟପ୍ରାଚ୍ୟରେ ଉତ୍ତେଜନା ମଧ୍ୟରେ, ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ଏକ ବିବୃତ୍ତି ଜାରି କରିଥିଲେ। ରୁବିଓ କହିଛନ୍ତି, ‘ଆମେ ଜାଣିଥିଲୁ ଯେ ଇସ୍ରାଏଲ ଇରାନ ଉପରେ ଆକ୍ରମଣ କରିବାକୁ ଯାଉଛି, ଏବଂ ଏହା ସମ୍ଭବ ଥିଲା।’ ସେ କହିଛନ୍ତି ଯେ ଇରାନ ଇସ୍ରାଏଲୀ ଆକ୍ରମଣର ଜବାବରେ ମଧ୍ୟପ୍ରାଚ୍ୟରେ ଆମେରିକୀୟ ସୈନ୍ୟମାନଙ୍କୁ ଟାର୍ଗେଟ କରିଥାନ୍ତା, ଯାହା ଟ୍ରମ୍ପ ପ୍ରଶାସନକୁ ଇସ୍ରାଏଲ ସହିତ ଇରାନ ଉପରେ ଆକ୍ରମଣ କରିବାକୁ ବାଧ୍ୟ କରିଥିଲା।
ଆମେରିକାର ବିଦେଶ ମନ୍ତ୍ରୀ ରୁବିଓ ଯୁକ୍ତରାଷ୍ଟ୍ର କ୍ୟାପିଟଲରେ ଏକ ଗଣମାଧ୍ୟମ ବ୍ରିଫିଂ ସମୟରେ କହିଥିଲେ, ‘ଏହା ସମ୍ପୂର୍ଣ୍ଣ ସ୍ପଷ୍ଟ ଥିଲା ଯେ ଯଦି କେହି ଇରାନ ଉପରେ ଆକ୍ରମଣ କରନ୍ତି, ତାହା ଆମେରିକା, ଇସ୍ରାଏଲ କିମ୍ବା ଅନ୍ୟ କେହି ହେଉ, ଇରାନ ପ୍ରତିଶୋଧ ନେବ, ଏବଂ ସେହି ପ୍ରତିଶୋଧ ଆମେରିକା ବିରୁଦ୍ଧରେ ମଧ୍ୟ ନିଆଯିବ।’ ରୁବିଓ ଆହୁରି କହିଛନ୍ତି, ‘ଆମେ ଜାଣିଥିଲୁ ଯେ ଇସ୍ରାଏଲ କାର୍ଯ୍ୟାନୁଷ୍ଠାନ ଗ୍ରହଣ କରିବ। ଆମେ ଏହା ମଧ୍ୟ ଜାଣିଥିଲୁ ଯେ ଏହା ଆମେରିକାର ସୈନ୍ୟଙ୍କ ଉପରେ ଆକ୍ରମଣ କରିପାରେ, ଏବଂ ଆମେ ଜାଣିଥିଲୁ ଯେ ଯଦି ଆମେ ସେମାନଙ୍କ ଆକ୍ରମଣ ଆରମ୍ଭ କରିବା ପୂର୍ବରୁ ସେମାନଙ୍କ ଉପରେ ଆକ୍ରମଣ ନକରୁ, ତେବେ ଆମେ ଅଧିକ ମୃତାହତ ହେବୁ ଏବଂ କ୍ଷତି ସହିବୁ।’
ଗଣମାଧ୍ୟମ ରିପୋର୍ଟ ଅନୁସାରେ, ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କୁ ଯେତେବେଳେ ପଚରାଗଲା ଯେ ଇସ୍ରାଏଲ ଆମେରିକାକୁ ଇରାନ ସହିତ ଯୁଦ୍ଧରେ ଟାଣି ନେଇଛି କି ନାହିଁ ସେ ହସିଥିଲେ। ନେତାନ୍ୟାହୁ ଉତ୍ତର ଦେଇଥିଲେ, ‘ଏହା ହାସ୍ୟାସ୍ପଦ। ଡୋନାଲ୍ଡ ଟ୍ରମ୍ପ ବିଶ୍ୱର ସବୁଠାରୁ ଶକ୍ତିଶାଳୀ ନେତା।’ ଏବଂ ସେ ଆମେରିକା ପାଇଁ ଯାହା ଠିକ ବୋଲି ଭାବନ୍ତି ତାହା କରନ୍ତି।’ ସେ ଆହୁରି ମଧ୍ୟ କହିଛନ୍ତି, ‘ମୁଁ ଯୁଦ୍ଧର ମୂଲ୍ୟ ଜାଣେ, କିନ୍ତୁ ମୁଁ ଏହା ମଧ୍ୟ ଜାଣେ ଯେ କେତେକ ସମୟରେ ଆମକୁ ଧ୍ୱଂସ କରୁଥିବା ଲୋକଙ୍କଠାରୁ ଆମକୁ ରକ୍ଷା କରିବା ପାଇଁ ଯୁଦ୍ଧ ଆବଶ୍ୟକ।’
