ଭୁବନେଶ୍ୱର,୩।୩: ଜିଜିପି କଲୋନୀ ରାହୁଲ ମହାରଣାଙ୍କ ହତ୍ୟା ଘଟଣାରେ ସାମ୍ନାକୁ ଆସିଲେ ସାଙ୍ଗ ଶିବା। କଳା ରାତିର କଳା କାହାଣୀ କହିଲା ବେଳେ ପୁଣି ତଦନ୍ତକୁ ନେଇ ପ୍ରଶ୍ନ ଉଠିଛି। ଶିବା କହିଛନ୍ତି, ଖେଳ ପଡ଼ିଆରେ ପ୍ରଥମେ କାଚ ଭଙ୍ଗା ଶଦ୍ଦ ଶୁଭିବାରୁ ପ୍ରତିବାଦ କରିଥିଲି। ପିଲାମାନେ ଏଠି ଖେଳୁଛନ୍ତି, କାହିଁକି କାଚ ଭାଙ୍ଗ ଫିଙ୍ଗୁଛ ପଚାରିଲି।ଏହାପରେ ମୋତେ ସେମାନେ ତୁ କିଏ କହି ଗାଳି ଗୁଲଜ କରିଥିଲେ। ଏହି ଯୁକ୍ତିତର୍କରୁ ଠେଲାପେଲା ହେଲା, ମୁଁ ଅଚେତ ହୋଇ ତଳେ ପଡ଼ିଗଲି। ରାହୁଲକୁ କିଏ ଛୁରି ମାରିଲା ମୁଁ ଦେଖିପାରି ନଥିଲି । ପୋଲିସ କାଲି ରାତି ସାଢ଼େ ୯ରେ ମୋ ବୟାନ ରେକର୍ଡ କରିଛି। ଛୁରି ଧରି ସେମାନେ କାହିଁକି ପଡ଼ିଆକୁ ଆସିଥିଲେ ତଦନ୍ତ ହେବା ଦରକାର ବୋଲି ଶିବା କହିଛନ୍ତି।
ରାହୁଲଙ୍କ ଅନ୍ୟତମ ସାଙ୍ଗ ସଚିନ ମଧ୍ୟ ଚାଞ୍ଚଲ୍ୟକର ବୟାନ ଦେଇଛନ୍ତି। ତାଙ୍କ କହିବାନୁସାରେ, ଡିଫେନ୍ସ ଲୋକ ଜଣଙ୍କ ରାହୁଲ ଛାତିକୁ ମୁଥ ମାରିବା ମୁଁ ଦେଖିଛି।ଏହା ପରେ ରାହୁଲ ତଳେ ପଡ଼ି ଅଚେତ ହୋଇ ଯାଇଥିଲେ। ମାତ୍ର ଯବାନ ହାତରେ ଛୁରି ଥିଲା କି ନାହିଁ ମୁଁ ଜାଣିନି। ଗତକାଲି ମୃତ ରାହୁଲଙ୍କ ପତ୍ନୀ ଶିବାଙ୍କ ଭୂମିକାକୁ ନେଇ ସନ୍ଦେହ କରିଥିଲେ।ଏଥିସହ ହତ୍ୟା ପଛରେ ଷଡ଼ଯନ୍ତ୍ର ଥିବା ସହ ପୋଲିସ ତଦନ୍ତକୁ ନେଇ ପ୍ରଶ୍ନ ଉଠାଇଥିଲେ।
