ଓ୍ବାଶିଂଟନ,୨୨।୨: ପ୍ରଧାନମନ୍ତ୍ରୀ ମୋଦି ସମ୍ପ୍ରତି ତାଙ୍କ ଆମେରିକା ଗସ୍ତ ସମୟରେ ରାଷ୍ଟ୍ରପତି ଟ୍ରମ୍ପଙ୍କ ସହ ଦ୍ୱିପାକ୍ଷିକ ଆଲୋଚନାରେ ଦୁଇ ଦେଶ ମଧ୍ୟରେ ବାଣିଜ୍ୟ ସମ୍ପର୍କରେ ଆଲୋଚନା କରିଥିଲେ। ଏଥିରେ ଶୁଳ୍କ ବିଷୟରେ ମଧ୍ୟ ଆଲୋଚନା ହୋଇଥିଲା। କିନ୍ତୁ ଏବେ ଏହି ବୈଠକର ମାତ୍ର ଗୋଟିଏ ସପ୍ତାହ ପରେ, ଡୋନାଲ୍ଡ ଟ୍ରମ୍ପ ପୁଣି ଥରେ ଭାରତକୁ ଶୁଳ୍କ ବା ଟାରିଫ ସମ୍ପର୍କରେ ଧମକ ଦେଇଛନ୍ତି। ସେ ଭାରତ ଉପରେ ‘ଟିଟ ଫର୍ ଟାଟ’ ଶୁଳ୍କ ଲାଗୁ କରିବା ବିଷୟରେ କହିଛନ୍ତି।
ଆମେରିକା ରାଷ୍ଟ୍ରପତି ଟ୍ରମ୍ପ ଶୁକ୍ରବାର ଘୋଷଣା କରିଛନ୍ତି ଯେ ସେ ଖୁବ ଶୀଘ୍ର ଭାରତ ଏବଂ ଚାଇନା ଭଳି ଦେଶଗୁଡ଼ିକ ଉପରେ ରେସିପ୍ରୋକାଲ ଶୁଳ୍କ ଲାଗୁ କରିବେ। ସେ କହିଛନ୍ତି ଯେ ଏହି ଦେଶଗୁଡ଼ିକ ଆମେରିକୀୟ ସାମଗ୍ରୀ ଉପରେ ଯେଉଁଭଳି ଶୁଳ୍କ ଲଗାନ୍ତି, ଆମେରିକା ମଧ୍ୟ ଏହି ଦେଶଗୁଡ଼ିକରୁ ଆମଦାନୀ ହେଉଥିବା ସାମଗ୍ରୀ ଉପରେ ସମାନ ଶୁଳ୍କ ଲଗାଇବ।
ଟ୍ରମ୍ପ କହିଛନ୍ତି, ‘ଆମେ ଖୁବ ଶୀଘ୍ର ପାରସ୍ପରିକ ଶୁଳ୍କ ବା ରେସିପ୍ରୋକାଲ ଟାରିଫ ଲାଗୁ କରିବୁ।’ ଭାରତ କିମ୍ବା ଚାଇନା ପରି ଯେକୌଣସି କମ୍ପାନୀ କିମ୍ବା ଦେଶ ହେଉ, ସେମାନେ ଆମଠାରୁ ଯାହା ବି ଚାର୍ଜ କରନ୍ତୁ, ଆମେ ମଧ୍ୟ ସମାନ ଦେୟ ଦେବୁ। ଆମେ ବାଣିଜ୍ୟରେ ସମାନତା ଚାହୁଁ। ଆମେ ଏହା ପୂର୍ବରୁ କେବେ କରିନାହୁଁ। ଆମେ କୋଭିଡ ପୂର୍ବରୁ ଏହା କରିବାକୁ ପ୍ରସ୍ତୁତ ହେଉଥିଲୁ।
ଡୋନାଲ୍ଡ ଟ୍ରମ୍ପ ତାଙ୍କ ପୂର୍ବ ରାଷ୍ଟ୍ରପତି କାର୍ଯ୍ୟକାଳରେ ମଧ୍ୟ ଶୁଳ୍କ ଉପରେ ବହୁତ ଆକ୍ରମଣାତ୍ମକ ଥିଲେ। ତାଙ୍କର ପ୍ରଥମ ରାଷ୍ଟ୍ରପତି କାର୍ଯ୍ୟକାଳରେ, ସେ ଆମେରିକୀୟ ସାମଗ୍ରୀ ଆମଦାନୀ ଉପରେ ଉଚ୍ଚ ଶୁଳ୍କ ଆଦାୟ କରୁଥିବା ଅନେକ ଦେଶ ବିରୁଦ୍ଧରେ ଏକ ଶୁଳ୍କ ଯୁଦ୍ଧ ଆରମ୍ଭ କରିଥିଲେ। ଏଥିରେ ଭାରତ ମଧ୍ୟ ସାମିଲ ଥିଲା। ରାଷ୍ଟ୍ରପତି ଟ୍ରମ୍ପ ଭାରତକୁ ଏକ ଶୁଳ୍କ ରାଜା ବା ଟାରିଫ କିଙ୍ଗ ବୋଲି ମଧ୍ୟ କହିଥିଲେ।
ଏଥର ମଧ୍ୟ ଏହି ପ୍ରସଙ୍ଗରେ ତାଙ୍କର ମନୋଭାବ ସମାନ। ସେ କାନାଡା ଏବଂ ମେକ୍ସିକୋରୁ ଆମଦାନୀ ହେଉଥିବା ସାମଗ୍ରୀ ଉପରେ ୨୫% ଟିକସ ଘୋଷଣା କରିଛନ୍ତି। ଚାଇନା ଉପରେ ମଧ୍ୟ ୧୦% ଶୁଳ୍କ ଘୋଷଣା କରାଯାଇଛି। ସେମାନଙ୍କର ପରବର୍ତ୍ତୀ ଟାର୍ଗେଟ ହେଉଛି ଭାରତ ସମେତ ଅନ୍ୟ ଅନେକ ଦେଶ।
