ନୂଆଦିଲ୍ଲୀ,୧୦।୧୦: ଶୁକ୍ରବାର ଓସଲୋରେ ନୋବେଲ କମିଟି ୨୦୨୫ ନୋବେଲ ଶାନ୍ତି ପୁରସ୍କାର ଭେନେଜୁଏଲାର ରାଜନେତ୍ରୀ ମାରିଆ କୋରିନା ମାଚାଡୋଙ୍କୁ ପ୍ରଦାନ କରିଛି। ତାଙ୍କୁ ଗଣତନ୍ତ୍ର ପାଇଁ ପ୍ରୋତ୍ସାହନ ଓ ଏକଛତ୍ରବାଦ ବିରୋଧରେ ଲଢ଼େଇ ପାଇଁ ଏହି ସମ୍ମାନ ମିଳିଛି।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ପୁରସ୍କାର ପାଇଁ ତୀବ୍ର ପ୍ରଚାର ଚଳାଇଥିଲେ। ସେ ଭାରତ-ପାକିସ୍ତାନ ସମେତ ୬-୭ଟି ସଂଘର୍ଷ ସମାଧାନ କରିଥିବା ଦାବି କରିଥିଲେ। ପାକିସ୍ତାନ ଓ ଇସ୍ରାଏଲ ତାଙ୍କ ପାଇଁ ମନୋନୟନ ପତ୍ର ଦାଖଲ କରିଥିଲେ। ତେବେ ଜାନୁଆରୀ ୩୧ରେ ମନୋନୟନ ସମୟ ସରିଥିବାରୁ ଟ୍ରମ୍ପ ଚଳିତ ବର୍ଷ ପୁରସ୍କାର ପାଇ ନଥିଲେ।
ଟ୍ରମ୍ପଙ୍କ ଦାବି ଅନୁଯାୟୀ, ସେ ଇସ୍ରାଏଲ-ଇରାନ, ଭାରତ-ପାକିସ୍ତାନ ଓ ଅନ୍ୟାନ୍ୟ ସଂଘର୍ଷ ସମାଧାନ କରିଛନ୍ତି। ତେବେ ଭାରତ ତାଙ୍କ ଭୂମିକାକୁ ଅସ୍ୱୀକାର କରି ସାମରିକ ଚାପ ଦ୍ୱାରା ପାକିସ୍ତାନ ସହ ଯୁଦ୍ଧବିରାମ ହୋଇଥିବା କହିଛି।
ଟ୍ରମ୍ପ ରୁଷିଆ-ୟୁକ୍ରେନ ଓ ଇସ୍ରାଏଲ-ହମାସ ଯୁଦ୍ଧ ଶେଷ କରିବାକୁ ଚେଷ୍ଟା ଜାରି ରଖିଛନ୍ତି। ୨୦୨୬ରେ ନୋବେଲ ଶାନ୍ତି ପୁରସ୍କାର ପାଇଁ ସେ ପୁଣି ପ୍ରତିଦ୍ୱନ୍ଦ୍ୱୀ ହୋଇପାରନ୍ତି।
