ଓଟ୍ଟାଓ୍ବା,୬।୧ କାନାଡା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋ ସୋମବାର ଲିବେରାଲ ପାର୍ଟି ନେତା ପଦରୁ ଇସ୍ତଫା ଘୋଷଣା କରିଛନ୍ତି। ଏଥିସହିତ ପ୍ରଧାନମନ୍ତ୍ରୀ ଭାବେ ତାଙ୍କର ୯ ବର୍ଷର କାର୍ଯ୍ୟକାଳ ଆପାତତଃ ଶେଷ ହୋଇଛି। ତେବେ ନୂଆ ନେତା ମନୋନୀତ ହେବା ପର୍ଯ୍ୟନ୍ତ ସେ ପ୍ରଧାନମନ୍ତ୍ରୀ ଭାବେ ରହିବାକୁ ଯୋଜନା କରିଛନ୍ତି।
ଇସ୍ତଫା ପରେ ଏକ ସାକ୍ଷତକାରରେ ସେ କହିଛନ୍ତି,ଆମର ମହାନ ଦେଶ ତଥା ଆମର ଗଣତନ୍ତ୍ର ଇତିହାସରେ କାନାଡାର ଲିବେରାଲ ପାର୍ଟି ଏକ ଗୁରୁତ୍ୱପୂର୍ଣ୍ଣ ଅନୁଷ୍ଠାନ। ଆସନ୍ତା ନିର୍ବାଚନରେ ଜଣେ ନୂତନ ପ୍ରଧାନମନ୍ତ୍ରୀ ତଥା ଲିବରାଲ ପାର୍ଟିର ନେତା ଦେଶର ମୂଲ୍ୟବୋଧ ଏବଂ ଆଦର୍ଶକୁ ଆଗକୁ ବଢାଇବେ। ଆଗାମୀ କିଛି ମାସ ମଧ୍ୟରେ ଏହି ପ୍ରକ୍ରିୟା ଘଟିବା ଦେଖି ମୁଁ ଖୁସି ହେବି। ମହାମାରୀ ପରେ ଅର୍ଥନୀତିକୁ ମଜଭୁତ କରିବା ଏବଂ କାନାଡାର ସ୍ବାର୍ଥକୁ ଆଗକୁ ନେବା ପାଇଁ ଆମେ ୨୦୨୧ରେ ତୃତୀୟ ଥର ପାଇଁ ନିର୍ବାଚିତ ହୋଇଥିଲୁ। ଏହା କାମ ଆଗକୁ ମଧ୍ୟ କାନାଡିୟମାନଙ୍କ ପାଇଁ ଜାରି ରଖିବୁ।
ଆଭ୍ୟନ୍ତରୀଣ ଦଳୀୟ ଅସନ୍ତୋଷ ଏବଂ ଜନମତ ରେଟିଂ ହ୍ରାସ କାରଣରୁ ଇସ୍ତଫା ପାଇଁ ତାଙ୍କ ଉପରେ ଦଳ ଭିତରୁ ଚାପ ବଢ଼ିବାରେ ଲାଗିଥିଲା। ନୂଆ ନେତା ନିର୍ବାଚନ ପାଇଁ ବୁଧବାର ଦଳୀୟ ବୈଠକ ବସିବାକୁ ଥିବାବେଳେ ଏହା ପୂର୍ବରୁ ଟ୍ରୁଡୋ ଇସ୍ତଫା ଦେଇଛନ୍ତି। ବ୍ୟାଙ୍କ୍ ଅଫ୍ କାନାଡାର ପୂର୍ବତନ ମୁଖ୍ୟ ମାର୍କ କାର୍ନି ଦଳର ନେତୃତ୍ୱ ନେଇପାରନ୍ତି ବୋଲି କୁହାଯାଉଛି। ସେ ଟ୍ରୁଡୋଙ୍କ ଅବଦାନ ଏବଂ ତ୍ୟାଗକୁ ଧନ୍ୟବାଦ ଜଣାଇଛନ୍ତି।
ଚଳିତବର୍ଷ ଦେଶରେ ନିର୍ବାଚନ ଅନୁଷ୍ଠିତ ହୋଇ ଅକ୍ଟୋବର ୨୦ ସୁଦ୍ଧା ନୂଆ ସରକାର ଗଢ଼ାଯିବ। ଦଳୀୟ ନେତା ପଦରୁ ଟ୍ରୁଡୋ ଇସ୍ତଫା ଦେଇଥିରୁ ଏଥର ଲିବେରାଲ ପାର୍ଟି ତାଙ୍କ ନେତୃତ୍ୱରେ ନିର୍ବାଚନ ଲଢ଼ିବ ନାହିଁ ବୋଲି ସ୍ପଷ୍ଟ ହୋଇଯାଇଛି। ଟ୍ରୁଡୋ କିଛିମାସ ହେଲା ରାଜନୈତିକ ସଙ୍କଟର ସମ୍ମୁଖୀନ ହୋଇଆସୁଥିଲେ। ଦେଶର ଆର୍ଥତ୍କ ସ୍ଥିତିରେ ଅବନତି ଆଦି ବିଭିନ୍ନ ଚ୍ୟାଲେଞ୍ଜ ସୃଷ୍ଟି ହୋଇଥିବାବେଳେ ଏଥିରୁ ନଜର ହଟାଇବା ପାଇଁ ସେ ଖଲିସ୍ତାନୀ ବିଚ୍ଛିନ୍ନତାବାଦୀ ନେତାଙ୍କ ହତ୍ୟା ଘଟଣାରେ ବାରମ୍ବାର ଭାରତ ସରକାରଙ୍କୁ ଦାୟୀ କରିଆସୁଥିଲେ। ଏହାକୁ ନେଇ ସେ ନିଜ ଦଳ ଭିତରେ ବିରୋଧର ସମ୍ମୁଖୀନ ହୋଇଥିଲେ। ସିଆନ୍ କାସେ, କେନ୍ ମାକ୍ଡୋନାଲ୍ଡଙ୍କ ଭଳି କେତେଜଣ ପ୍ରଭାବଶାଳୀ ଲିବେରାଲ ପାର୍ଟି ଏମ୍ପି ତାଙ୍କ ଇସ୍ତଫା ପାଇଁ ଦାବି କରିଆସୁଥିଲେ। ଟ୍ରୁଡୋଙ୍କ ଇସ୍ତଫା ଦାବିକରି ୨୦ରୁ ଊର୍ଦ୍ଧ୍ୱ ଦଳୀୟ ଏମ୍ପି ଏକ ସଂକଳ୍ପ ପତ୍ରରେ ସ୍ବାକ୍ଷର କରିଥିଲେ। ଡିସେମ୍ବରରେ ଉପପ୍ରଧାନମନ୍ତ୍ରୀ ତଥା ଅର୍ଥମନ୍ତ୍ରୀ କ୍ରିଷ୍ଟିଆ ଫ୍ରିଲାଣ୍ଡଙ୍କ ଇସ୍ତଫା ଟ୍ରୁଡୋଙ୍କ ସରକାରଙ୍କ ପାଇଁ ଶକ୍ତ ଝଟକା ଥିଲା। ସରକାରଙ୍କ କେତେକ ନୀତିକୁ ବିରୋଧ କରି ଫ୍ରିଲାଣ୍ଡ ଇସ୍ତଫା ଦେଇଥିଲେ।
ଲିବେରାଲ ପାର୍ଟି ନେତା ପଦରୁ ଇସ୍ତଫା ଦେବା ପୂର୍ବରୁ ୫୩ ବର୍ଷୀୟ ଟ୍ରୁଡୋ ସୋମବାର ଦେଶବାସୀଙ୍କ ଉଦ୍ଦେଶ୍ୟରେ ଉଦ୍ବୋଧନ ଦେଇଛନ୍ତି। ଦଳ ଏବଂ ଦେଶ ପାଇଁ ଗୁରୁତ୍ୱପୂର୍ଣ୍ଣ ଲଢ଼େଇରୁ ସେ ସହଜରେ ପଛଘୁଞ୍ଚା ଦେଉନାହାନ୍ତି। କାନାଡା ଜନସାଧାରଣଙ୍କ ସ୍ବାର୍ଥ ଏବଂ ଗଣତନ୍ତ୍ର ପାଇଁ ସେ ଲଢ଼େଇ ଜାରି ରଖିବେ ବୋଲି କହିଛନ୍ତି। ଜାନୁଆରୀ ୨୭ରେ ଆରମ୍ଭ ହେବାକୁ ଥିବା ପାର୍ଲାମେଣ୍ଟ ଅଧିବେଶନକୁ ମାର୍ଚ୍ଚ ୨୪ ପର୍ଯ୍ୟନ୍ତ ସ୍ଥଗିତ ରଖାଯାଇଛି। ଏହି ସମୟ ମଧ୍ୟରେ ଲିବେରାଲ ପାର୍ଟି ଏହାର ନେତା ବାଛିବାକୁ ସୁଯୋଗ ପାଇବ। ପାର୍ଲାମେଣ୍ଟ ଆରମ୍ଭ ହେଲେ ଅନାସ୍ଥା ପ୍ରସ୍ତାବ ଆଣି ଲିବେରାଲ ପାର୍ଟି ସରକାରଙ୍କ କ୍ଷମତାଚ୍ୟୁତ କରିବାକୁ ୩ ପ୍ରମୁଖ ବିରୋଧୀ ଦଳ ଯୋଜନା କରିଛନ୍ତି। ତେଣୁ ଲିବେରାଲ ପାର୍ଟି ନୂଆ ନେତା ବାଛିବା ପରେ ନିର୍ବାଚନ ଅନୁଷ୍ଠିତ ହୋଇପାରେ ବୋଲି କୁହାଯାଉଛି।
