ନୂଆଦିଲ୍ଲୀ,୨୮।୨: ଟି୨୦ ବିଶ୍ୱକପ୍ରେ ପାକିସ୍ତାନଠାରୁ ଭାରତୀୟ ଦଳ ପରାସ୍ତ ହେବା ପରେ ମହମ୍ମଦ ଶାମିଙ୍କୁ ସୋସିଆଲ ମିଡିଆରେ ପ୍ରବଳ ସମାଲୋଚନା କରାଯାଇଥିଲା। ଏପରି କି ତାଙ୍କୁ ଦେଶଦ୍ରୋହୀ ଏବଂ ମ୍ୟାଚ୍ ହାରିବା ପାଇଁ ଟଙ୍କା ନେଇ ଥିବା କୁହାଯାଇଥିଲା। ଏହା ଉପରେ ପ୍ରଥମ ଥର ପାଇଁ ମୁହଁ ଖୋଲିଛନ୍ତି ଭାରତୀୟ ପେସର ଶାମି।
“ଯେଉଁମାନେ ମୋତେ ଟ୍ରୋଲ କରିଥିଲେ, ସେମାନେ ରିଅନ ଫ୍ୟାନ୍ କି ଅସଲ ଭାରତୀୟ ନୁହେଁ। ଲୋକେ ଅଜଣା ସୋସିଆଲ ମିଡିଆ ପ୍ରୋଫାଇଲରେ ଜଣଙ୍କ ଉପରେ ଆଙ୍ଗୁଠି ଉଠାଛନ୍ତି, ସେମାନଙ୍କ ପାଖରେ ହରାଇବାକୁ କିଛି ନାହିଁ। କାରଣ ସେମାନେ କେହି ନୁହନ୍ତି। ଆମକୁ ସେମାନଙ୍କ ଉତ୍ତର ଦେବାର ଆବଶ୍ୟକତା ନାହିଁ। ଆମକୁ ଜଣାଅଛି, ଆମେ କ’ଣ। ଆମ ପାଇଁ ଭାରତର ଅର୍ଥ କ’ଣ, ତାହା କାହାକୁ କହିବାର ଆବଶ୍ୟକତା ନାହିଁ। କାରଣ ଆମେ ଏହି ଦେଶ ପାଇଁ ଲଢ଼େଇ କରୁ। ଏଣୁ ଆମକୁ କିଛି ପ୍ରମାଣ କରିବାର ଆବଶ୍ୟକତା ନାହିଁ” ବୋଲି ୩୧ ବର୍ଷୀୟ ପେସର ଏକ ସାକ୍ଷାତ୍କାରରେ କହିଛନ୍ତି।
ଉଲ୍ଲେଖଯୋଗ୍ୟ, ୨୦୧୩ରେ ପଦାର୍ପଣ କରିଥିବା ଶାମି ଏପର୍ଯ୍ୟନ୍ତ ୫୭ ଟେଷ୍ଟରେ ୨୦୯ ଉଇକେଟ ହାତେଇଛନ୍ତି। ରିଷ୍ଟ ଆହତ ସମସ୍ୟା କାରଣରୁ ତାଙ୍କୁ ଶ୍ରୀଲଙ୍କା ବିପକ୍ଷ ଟେଷ୍ଟ ସିରିଜ୍ ଲାଗି ଦଳରେ ସ୍ଥାନ ମିଳି ନାହିଁ।
