ନୂଆଦିଲ୍ଲୀ,୨ ।୩: ତ୍ରିପୁରା, ନାଗାଲାଣ୍ଡ ଓ ମେଘାଳୟରେ ହୋଇଥିବା ବିଧାନସଭା ନିର୍ବାଚନର ଫଳାଫଳ ଗୁରୁବାର ଘୋଷଣା ହେବାକୁ ଯାଉଛି । ଭୋଟ ଗଣତି ସକାଳ ୮ଟାରୁ ଆରମ୍ଭ ହେବ । ତିନୋଟି ଯାକ ରାଜ୍ୟରେ ଭୋଟ ଗଣତି ପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି । ଏହା ବ୍ୟତୀତ ମହାରାଷ୍ଟ୍ରର କସବା ପେଠ ତଥା ଚିଂଚୱାଡା ବିଧାନସଭା ଆସନ, ତାମିଲନାଡୁର ଇରୋଡ-ପୂର୍ବ ଆସନ, ପଶ୍ଚିମବଙ୍ଗର ସାଗରଦିଘି ଓ ଝାଡଖଣ୍ଡର ରାମଗଡ଼ ଆସନରେ ହୋଇଥିବା ଉପନିର୍ବାଚନର ଫଳାଫଳ ମଧ୍ୟ ଗୁରୁବାର ଆସିବ । ତ୍ରିପୁରାରେ ଗୋଟିଏ ପର୍ଯ୍ୟାୟରେ ୧୬ ଫେବୃୟାରୀରେ ଭୋଟ ଗ୍ରହଣ କରାଯାଇଥିବା ବେଳେ ମେଘାଳୟରେ ୨୭ ଫେବୃୟାରୀରେ ମତଦାନ କରାଯାଇଥିଲା ।
ତ୍ରିପୁରାର ମୁଖ୍ୟ ନିର୍ବାଚନ ଅଧିକାରୀ(ସିଇଓ) ବୁଧବାର କହିଥିଲେ କି ଭୋଟଗଣନା ସମ୍ପର୍କିତ ସମସ୍ତ ପ୍ରସ୍ତୁତି ଶେଷ ହୋଇଯାଇଛି । ଭୋଟ ଗଣତି ସକାଳ ୮ଟାରୁ ଆରମ୍ଭ ହେବ । ୫ରୁ ୮ ରାଉଣ୍ଡ ମଧ୍ୟରେ ଭୋଟଗଣତି ଶେଷ ହୋଇପାରେ । ସେ କହିଛନ୍ତି ଦ୍ୱିପ୍ରହର ସୁଦ୍ଧା ଫଳାଫଳ ସ୍ପଷ୍ଟ ହୋଇଯାଇପାରେ । ତ୍ରିପୁରା ବିଧାନସଭାର ମୋଟ ୬୦ଟି ଆସନରେ ୮୯.୯୦ ପ୍ରତିଶତ ମତଦାନ ହୋଇଛି । ବିଭିନ୍ନ ଦଳର ମୋଟ ୨୫୯ ପ୍ରାର୍ଥୀ ନିର୍ବାଚନ ମଇଦାନରେ ଅଛନ୍ତି । ଏଠାର ଶାସକ ଭାଜପା-ଆଇପିଏଫଟି ଓ ଲେଫ୍ଟ-କଂଗ୍ରେସ ମେଣ୍ଟ ମଧ୍ୟରେ ମୁଖ୍ୟ ମୁକାବିଲା ହେବ ବୋଲି ଅନୁମାନ କରାଯାଉଛି ।
ମେଘାଳୟର ୫୯ ବିଧାନସଭା ଆସନ ପାଇଁ ୨୭ ଫେବୃୟାରୀରେ ହୋଇଥିବା ଭୋଟ ଗ୍ରହଣର ଫଳାଫଳ ଗୁରୁବାର ଆସିବ । ଏକଜିଟ ପୋଲ ଉପରେ ଭରସା କଲେ ଲାଗୁଛି ଏଥର ରାଜ୍ୟରେ ତ୍ରିଶଂକୁ ବିଧାନସଭା ହୋଇପାରେ । ମୁଖ୍ୟମନ୍ତ୍ରୀ କୋନରାଡ ସାଙ୍ଗମାଙ୍କ ନ୍ୟାଶନାଲ ପିପୁଲ୍ସ ପାର୍ଟି(ଏନପିପି)କୁ ସବୁଠାରୁ ଅଧିକ ଆସନ ମିଳିପାରେ ବୋଲି ଅନୁମାନ କରାଯାଉଛି । ମିଡିଆ ରିପୋର୍ଟ ଅନୁଯାୟୀ, ମୁଖ୍ୟମନ୍ତ୍ରୀ କୋନରାଡ ସାଙ୍ଗମା ମତଗଣନା ପୂର୍ବରୁ ଗୁଆହାଟିରେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱା ଶର୍ମାଙ୍କୁ ଭେଟିଛନ୍ତି ।
ନାଗାଲାଣ୍ଡରେ ହୋଇଥିବା ବିଧାନସଭା ଆସନରେ ଏଥର ଶାସକ ଭାରତୀୟ ଜନତା ପାର୍ଟି(ଭାଜପା)ଓ ନ୍ୟାଶନାଲିଷ୍ଟ ଡେମୋକ୍ରାଟିକ ପ୍ରୋଗ୍ରେସିଭ ପାର୍ଟି(ଏନଡିପିପି)ର ମେଣ୍ଟକୁ ବହୁମତ ମିଳିପାରେ । ୬୦ ସଦସ୍ୟ ବିଶିଷ୍ଟ ବିଧାନସଭାରେ ଏନଡିପିପି ୪୦ଟି ଆସନରେ ନିର୍ବାଚନ ଲଢିଛି ଓ ଭାଜପା ୨୦ ଆସନରେ ପ୍ରାର୍ଥୀ ଦେଇଛି ।
