ଭବାନୀପାଟଣା,୧୬।୧(ସ୍ବ.ପ୍ର.): ଉଭୟ କେନ୍ଦ୍ର ଓ ରାଜ୍ୟ ସରକାର ଆଦିବାସୀମାନଙ୍କ ପାଇଁ ବିଭିନ୍ନ ଯୋଜନା କରି କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ପ୍ରଶାସନିକ ଅଧିକାରୀଙ୍କ ନାଲିଫିତା ତଳେ ସବୁ ଯୋଜନା ଅଟକି ପଡୁଛି। ଏମାନଙ୍କ ପାଇଁ ନା ଅଛି ରାସ୍ତା, ଅବା ନା ଅଛି ପାନୀୟ ଜଳର ସୁିଧା କିମ୍ବା ନା ଆଛି ଆବାସ ଯୋଜନାରେ ପକ୍କା ଘର। ଆଦିବାସୀମାନେ ଜଙ୍ଗଲରେ ବାସବାନ୍ଧି ଜଙ୍ଗଲୀ ଜୀବଜନ୍ତୁ ଭଳି ବଞ୍ଚୁଛନ୍ତି। ନାଳ ଓ ଜଙ୍ଗଲ ରାସ୍ତା ଥିବା ଯୋଗୁ ଏହି ଗାଁକୁ କେବଳ ନିର୍ବାଚନ ସମୟରେ ଛାଡିଦେଲେ କେବେ ମଧ୍ୟ କୌଣସି ସରକାରୀ ଅଧିକାରୀ କିମ୍ବା ରାଜନେତା ଅବା ନିର୍ବାଚିତ ପ୍ରତିନିଧିମାନଙ୍କ ପାଦ ପଡେନାହିଁ। ଏମାନେ ବିକାଶର ସୂର୍ଯ୍ୟ ଦେଖି ନ ଥିବା ବେଳେ ଜଙ୍ଗଲଭିତରେ ନିଜର ଭାଗ୍ୟକୁ ନିଜେ ଲେଖୁଛନ୍ତି। ଏଭଳି ଏକ ଦୃଶ୍ୟ ଦେଖିବାକୁ ମିଳିଛି କଳାହାଣ୍ଡି ଜିଲା ଜୁନାଗଡ଼ ବ୍ଲକ ଅନ୍ତର୍ଗତ ବୁଢ଼ୀଦର ପଞ୍ଚାୟତକୁ ଲାଗି ରହିଥିବା କର୍ଲାପାଟ ଅଭୟାରଣ୍ୟ ଭିତରେ ଏକ ଛୋଟ ଆଦିବାସୀ ଗାଁ ଖୁଟୁଲୁଗୁଡ଼ାରେ। ଏହି ଗାଁ ମାଓବାଦୀ ଅଞ୍ଚଳ ହୋଇଥିବା ବେଳେ ଅଗନାଅଗନି ବନସ୍ତ ମଧ୍ୟରେ ଏଠି ୯ ଆଦିବାସୀ ପରିବାରର ୫୦ରୁ ଊଦ୍ଧର୍ବ ଲୋକ ବାସ କରିଥାନ୍ତି। ଏହି ଗାଁକୁ ଯିବାକୁ ହେଲେ ଜଙ୍ଗଲ ପାଦଚଲା ରାସ୍ତା ଓ ଅନେକ ନାଳ ପାରି ହୋଇ ଯିବାକୁ ପଡିଥାଏ। ଏହି ଆଦିବାସୀମାନେ ଏମ୍ଜିଏନ୍ଆରଇଜିଏସ୍ କିଛି ଜାଣି ନ ଥିବା ବେଳେ ଜଙ୍ଗଲରୁ ଜଙ୍ଗଲଜାତ ଦ୍ରବ୍ୟ ଓ ବାଉଁଶରେ ବିଭିନ୍ନ ସାମଗ୍ରୀ ଯଥା, କୁଲା, ଟୋପା, ଚିଙ୍ଗିଡି, ପାର୍ଲି ଆଦି ଜିନିଷ ତିଆରି କରି ବିକ୍ରି କରିଥାନ୍ତି। ଏମାନେ ସମସ୍ତେ ଭୂମିହୀନ ଥିବା ବେଳେ ଜଙ୍ଗଲକୁ ସଫା କରି ମୁଖ୍ୟତ କାନ୍ଦୁଲ, ଝୁଡୁଙ୍ଗ, ମାଣ୍ଡିଆ, କାଙ୍ଗୋ, କସଲା ଚାଷ କରିଥାନ୍ତି। ଏମାନଙ୍କ ପାଇଁ ଯୋଗାଣ ବ୍ୟବସ୍ଥା ନ ଥିବା ବେଳେ ପାହାଡର ଝରଣାପାଣି ପିଇ ତୃଷା ମେଣ୍ଟାଇଥାନ୍ତି। ରାସ୍ତା ନ ଥିବା ଯୋଗୁ ଆମ୍ବୁଲାନ୍ସ ଯାଇପାରେନାହିଁ। ଫଳରେ ଖଟିଆରେ ବୋହି ରୋଗୀଙ୍କୁ ୪ କି.ମି. ଆଣିଥାନ୍ତି। ବର୍ଷା ଦିନରେ ଏମାଙ୍କ ଦୁଃଖ ଦ୍ବିଗୁଣିତ ହୋଇଥାଏ। ଏହି ଦୁର୍ଗମ ଅଞ୍ଚଳରେ ଶିକ୍ଷା ବ୍ୟବସ୍ଥା ଫେଲ ମାରିଛି। ଏହି ଆଦିବାସୀ ଶିଶୁମାନେ ପ୍ରି ସ୍କୁଲ କଣ ଜାଣି ନ ଥିବା ବେଳେ ପ୍ରାଥମିକ ଶିକ୍ଷା ବହୁ ଦୂରରେ। ପ୍ରାଥମିକ ବିଦ୍ୟାଳୟର ଯିବା ପାଇଁ ପାଇଁ ଜଙ୍ଗଲ ରାସ୍ତାରେ ୫ଟି ନାଲା ପାର ହୋଇ ଯିବାକୁ ପଡିଥାଏ। କୋମଲମତି ଶିଶୁ ଯିବେ କେମିତି। କେବେ ଉଇଁବ ଏ ଅଞ୍ଚଳରେ ବିକାଶର ସୂର୍ଯ୍ୟ, କେବେ ହେବ ଏହି ନା ସରକାରୀ ଅଧିକାରୀଙ୍କ ନାଲିଫିତା ତଳେ ଏମାନଙ୍କ ଭାଗ୍ୟ ଲୁଚିକି ରହିବ ତାହା ଦେଖିବାକୁ ବାକି ରହିଲା।
