ଇସଲାମାବାଦ,୧୧।୭ : ପାକିସ୍ତାନର ଖାଇବର ପାସ୍ତୁନଖ୍ବା (କେପି) ପ୍ରଦେଶର କୁରାମ ଜିଲାରେ ଜମି ବିବାଦ ଯୋଗୁଁ ଆଦିବାସୀଙ୍କ ମଧ୍ୟରେ ସଂଘର୍ଷରେ ମୃତ୍ୟୁ ସଂଖ୍ୟା ନଅକୁ ବୃଦ୍ଧି ପାଇଛି। ସ୍ଥାନୀୟ ନ୍ୟୁଜ ଏଜେନ୍ସି ଏୟାରଓ୍ବାଇ ନ୍ୟୁଜ ଏହି ସୂଚନା ଦେଇଛି। ଗତ ଚାରି ଦିନ ଧରି ଜାରି ରହିଥିବା ସଂଘର୍ଷରେ ବର୍ତ୍ତମାନ ପର୍ଯ୍ୟନ୍ତ ୯ ଜଣଙ୍କର ମୃତ୍ୟୁ ଘଟିଛି ଏବଂ ୫୦ ରୁ ଅଧିକ ଲୋକ ଆହତ ହୋଇଛନ୍ତି।
ପାକିସ୍ତାନର ପ୍ରବାସୀ ତଥା ମାନବ ସମ୍ବଳ ବିକାଶ ମନ୍ତ୍ରୀ ସାଜିଦ ହୁସେନ ତୁରି ସଂଘର୍ଷ ବିରାମ ପାଇଁ ଆଦିବାସୀ ଜିଲାରେ ପହଞ୍ଚିଥିଲେ। ସେ ଗଣମାଧ୍ୟମକୁ କହିଛନ୍ତି ପୋଲିସ, ସେନା ଆଦିବାସୀ ବହୁଳ ଅଞ୍ଚଳ ପୱାର, ବାଲିଶକେଲ ଏବଂ ଖାର କାଲା ଅଞ୍ଚଳରେ ଅସ୍ତ୍ରବିରତି କରିବାକୁ ଚେଷ୍ଟା କରୁଛନ୍ତି। ପରିସ୍ଥିତି ଶୀଘ୍ର ସ୍ବାଭାବିକ ଅବସ୍ଥାକୁ ଆସିବ ବୋଲି ସେ ଆଶ୍ୱାସନା ଦେଇଛନ୍ତି।
ରବିବାର କୁରାମ ଆଦିବାସୀ ଜିଲାର ବିଭିନ୍ନ ଅଞ୍ଚଳରେ ଆଦିବାସୀମାନେ ସଂଘର୍ଷ କରିବା ପରେ ଆଉ ଦୁଇ ଜଣଙ୍କର ମୃତ୍ୟୁ ଘଟିଥିବା ବେଳେ ୮ ଜଣ ଆହତ ହୋଇଥିଲେ ବୋଲି ସ୍ଥାନୀୟ ଗଣମାଧ୍ୟମ ଜିଓ ନ୍ୟୁଜ ରିପୋର୍ଟ କରିଛି। ଆହତମାନଙ୍କୁ ଜିଲା ମୁଖ୍ୟାଳୟ ଡାକ୍ତରଖାନାକୁ ନିଆଯାଇଥିଲା ଯେଉଁଠାରେ ତିନିଜଣ ଆହତଙ୍କ ଅବସ୍ଥା ଗୁରୁତର ଥିବା କୁହାଯାଉଛି।
