ନୂଆଦିଲ୍ଲୀ,୧୪।୬: ପ୍ରଧାନମନ୍ତ୍ରୀ କିଶାନ ଯୋଜନା ହିତାଧିକାରୀଙ୍କ ପାଇଁ ଖୁସି ଖବର। ଆସନ୍ତା ସପ୍ତାହରେ ଯୋଗ୍ୟ ଚାଷୀଙ୍କ ଖାତାକୁ ଆସିବ ୧୭ତମ କିସ୍ତି। ତେବେ ନିକଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତୃତୀୟ ଥର ପାଇଁ ଶପଥ ଗ୍ରହଣ କରିବା ପରେ ତୁରନ୍ତ କିଷାନ ସମ୍ମାନ ନିଧିର କିସ୍ତି ରିିଲିଜ କରିବା ସମ୍ବନ୍ଧୀୟ ଫାଇଲରେ ଦସ୍ତଖତ କରିଥିଲେ। ଏବେ ଏହି ଟଙ୍କା ଚାଷୀଙ୍କ ଆକାଉଣ୍ଟକୁ ଆସିବ। ଜୁନ ୧୮ (ମଙ୍ଗଳବାର) ରେ କୃଷକଙ୍କ ଆକାଉଣ୍ଟରେ ଟଙ୍କା ଜମା ହେବ । ଅର୍ଥାତ ଆଉ ୩ ଦିନ ପରେ ଯୋଗ୍ୟ କୃଷକଙ୍କ ଆକାଉଣ୍ଟକୁ ଟଙ୍କା ଆସିବ।
ପ୍ରଧାନମନ୍ତ୍ରୀ ମୋଦି ଜୁନ ୧୮ ରେ ପ୍ରଥମ ଥର ପାଇଁ ତାଙ୍କ ସଂସଦୀୟ ନିର୍ବାଚନମଣ୍ଡଳୀ ବାରାଣସୀ ପରିଦର୍ଶନ କରିବେ। ଏହି ଦିନିକିଆ ଗସ୍ତ ସମୟରେ ସେ କୃଷକ ସମ୍ମିଳନୀକୁ ସମ୍ବୋଧିତ କରିବା ସହ ୧୭ ତମ କିସ୍ତି ରିଲିଜ କରିବେ। ଏହା ଅଧୀନରେ ୯.୩ କୋଟି କୃଷକଙ୍କ ଆକାଉଣ୍ଟକୁ ୨୦,୦୦୦ କୋଟି ଟଙ୍କା ହସ୍ତାନ୍ତର କରାଯିବ।
କେନ୍ଦ୍ର ସରକାରଙ୍କ ଏହି ଯୋଜନାରେ ସମ୍ପୂର୍ଣ୍ଣ ଖର୍ଚ୍ଚ ସରକାର ବହନ କରନ୍ତି। ଏହି ଯୋଜନା ୧ ଡିସେମ୍ବର ୨୦୧୮ ରେ ଆରମ୍ଭ ହୋଇଥିଲା। କୃଷକମାନଙ୍କୁ କୃଷି ପାଇଁ ଆର୍ଥିକ ସହାୟତା ଯୋଗାଇବା ଏହି ଯୋଜନାର ଉଦ୍ଦେଶ୍ୟ । ଏହି ଯୋଜନା ମାଧ୍ୟମରେ ଯୋଗ୍ୟ ଜମି ମାଲିକ କୃଷକ ପରିବାରକୁ ବାର୍ଷିକ ୬ ହଜାର ଟଙ୍କା ଆର୍ଥିକ ସହାୟତା ଯୋଗାଇ ଦିଆଯାଉଛି। ଏହି ଟଙ୍କା ବର୍ଷକୁ ୨ ହଜାର ଟଙ୍କା ଲେଖାଏ ୩ କିସ୍ତିରେ ମିଳୁଛି।
ଅନଲାଇନ୍ରେ ହିତାଧିକାରୀ ସ୍ଥିତି କିପରି ଯାଞ୍ଚ କରିବେ?
-ସର୍ବପ୍ରଥମେ PM Kisan Yojanaର ଅଫିସିଆଲ ୱେବସାଇଟ୍ କୁ ଯାଆନ୍ତୁ ।
– ବର୍ତ୍ତମାନ ହିତାଧିକାରୀ ସ୍ଥିତି ଧାରଣ କରିଥିବା ଅନଲାଇନ୍ ପୃଷ୍ଠାକୁ ଯାଆନ୍ତୁ ।
– ଏହା ପରେ ଆପଣଙ୍କର ଆଧାର ନମ୍ବର କିମ୍ବା ଆକାଉଣ୍ଟ ନମ୍ବର ପ୍ରବେଶ କରନ୍ତୁ ।
– ବର୍ତ୍ତମାନ ଏଠାରେ ‘ଡାଟା ପାଆନ୍ତୁ’ ବଟନ୍ ଉପରେ କ୍ଲିକ କରନ୍ତୁ ।
– ଏହା ପରେ ହିତାଧିକାରୀ ସ୍ଥିତିକୁ ଦେଖନ୍ତୁ ଏବଂ କ୍ଲିକ କରନ୍ତୁ ।
– ଏହା ପରେ ଆପଣ ଦେୟ ସ୍ଥିତି ଦେଖିବା ଉପରେ କ୍ଲିକ କରନ୍ତୁ ।
– ଏହି ପ୍ରକ୍ରିୟା ସମାପ୍ତ କରିବା ପରେ, ହିତାଧିକାରୀ ସ୍ଥିତି ଆପଣଙ୍କ ପରଦାରେ ଦେଖାଯିବ । ୧୭ ତମ କିସ୍ତି ସମ୍ବନ୍ଧୀୟ ସୂଚନା ଏଠାକୁ ଆସିବ ।
