କଳିଙ୍ଗନଗର,୨।୭(ଶୁଭାଶିଷ ରାଉତ): କଳିଙ୍ଗନଗର ଶିଳ୍ପାଞ୍ଚଳ ଦିନେ ଘଞ୍ଚ ଜଙ୍ଗଲ ଥିଲା। କାଳକ୍ରମେ ଜନବସତି ପରେ ବିଭିନ୍ନ କଳକାରଖାନା ବସିଲା। ଏଥିନିମନ୍ତେ ହଜାର ହଜାର ଗଛ କଟାଗଲା ଏବଂ କିଛି ଚାରାରୋପଣ କରଗଲା, ଯାହାକି ପରିବେଶ ସନ୍ତୁଳନ ରକ୍ଷା ପାଇଁ ଆବଶ୍ୟକ ଥିଲା। ଶିଳ୍ପ ସଂସ୍ଥାମାନେ ନିଜ ଜମିର ୩୩ ପ୍ରତିଶତ ସ୍ଥାନରେ ଚାରାରୋପଣ କରିବାକୁ ବାଧ୍ୟତାମୂଳକ କରାଯାଇଛି। ମାତ୍ର କଳିଙ୍ଗନଗରରେ ସବୁଜିମା ସୃଷ୍ଟି କେବଳ କାଗଜକଲମରେ ସୀମିତ ରହିଛି। ଏବେ ବିଭିନ୍ନ ଆଳରେ ଶିଳ୍ପାଞ୍ଚଳରୁ ଚାଲିଛି ଗଛ କଟା। କେଉଁ ଶିଳ୍ପ ସଂସ୍ଥା କେତେ ଗଛ ଲଗାଇଛି ଓ ତନ୍ମଧ୍ୟରୁ କେତେ ଗଛ ବଞ୍ଚିଛି ତା’ର ତଥ୍ୟ ବନ ବିଭାଗ ପାଖରେ ନାହିଁ। କେବଳ ସମ୍ପୃକ୍ତ କାରଖାନାର ସୂଚନାକୁ ଫାଇଲରେ ରଖି ବନ ବିଭାଗ ଦାୟିତ୍ୱ ସମ୍ପାଦନ କରିଆସୁଛି। କାରଖାନା ବାହାରେ ମଧ୍ୟ ପ୍ରତିବର୍ଷ ବିପୁଳ ପରିମାଣର ଗଛ ଲଗାଯାଉଛି। ମାତ୍ର କେଉଁଠାରେ କେତେ ଗଛ ବଞ୍ଚିଲା କି କାଟି ନିଆଗଲା ତାହା ଦେଖିବାକୁ ମିଳୁନାହିଁ। ଶିଳ୍ପାଞ୍ଚଳରାସ୍ତାରେ ପଥପାର୍ଶ୍ୱ ବନୀକରଣ ପ୍ରହସନ ପାଲଟିଥିବା ଦେଖିବାକୁ ମିଳିଛି। ଅନ୍ୟପକ୍ଷରେ ପରିବେଶ ନାମରେ ହେଉଥିବା ଚାରାରୋପଣକୁ ପରବର୍ତ୍ତୀ ସମୟରେ କୌଣସି ନା କୌଣସି କାରଣରୁ କାଟି ଦିଆଯାଉଥିବା ଦେଖାଯାଉଛି। ଶିଳ୍ପାଞ୍ଚଳରେ ଏପରି ଅନେକ ଉଦାହରଣ ଦେଖିବାକୁ ରହିଛି।
ରାସ୍ତା ନିର୍ମାଣ, ପାଇପ ବିଛାଇବା, ଟାୱାର ବସାଇବା, ପାଣି ଟାଙ୍କି ତିଆରି ଓ ପାର୍କିଂ ପାଇଁ ହଜାରହଜାର ସଂଖ୍ୟାରେ ଗଛ ବଳି ପଡୁଛି। ୧୦ ବର୍ଷ ତଳେ ଡୁବୁରୀ-ମିଲିଟାରୀ ଛକର ଜିନ୍ଦଲ କାରଖାନା ପାର୍ଶ୍ୱରେ ବନୀକରଣ କରାଯାଇଥିଲା। ୪ ବର୍ଷ ତଳେ ଦୁଇଟି ବିଦ୍ୟୁତ୍ ଟାୱାର ବସାଇବା ପାଇଁ ସେଠାରେ ଜଣେ ଠିକାଦାର ବିପୁଳ ଗଛ କାଟି ଦେଇଥିଲେ। ଠିକ ସେହି ଭାବେ ପୁଣି ସେହି ପାର୍ଶ୍ୱରେ ଦୁଇଟି ବିଦ୍ୟୁତ୍ ଟାୱାର ସ୍ଥାପନ ପାଇଁ ଶତାଧିକ ଗଛକୁ ଠିକାଦାର କାଟି ଦେଇଥିବା ଦେଖିବାକୁ ମିଳିଛି। ପ୍ରମାଣ ନଷ୍ଟ ପାଇଁ ଗଛର ମୂଳକୁ ମଧ୍ୟ ଖୋଳି ବାହାର କରି ଦିଆଯାଇଛି। ଏ ସମ୍ପର୍କରେ ଟମକା ବନାଞ୍ଚଳ ଅଧିକାରୀ ଶଶିଭୂଷଣ ବେହେରାଙ୍କୁ ପଚାରିବାରୁ ସେ କହିଛନ୍ତି, ଗଛକାଟିବାକୁ କେତେ ସଂସ୍ଥା ଅନୁମତି ନେଇଛନ୍ତି ସେ ସମ୍ପର୍କରେ ତଥ୍ୟ ଖୋଜା ଚାଲିଛି। ତେବେ ଆଗକୁ କିପରି ଗଛ ସୁରକ୍ଷିତ ରହିବ ସେ ସମ୍ପର୍କରେ ଆମେ ଉଦ୍ୟମ କରୁଛୁ ବୋଲି ସେ ପ୍ରକାଶ କରିଛନ୍ତି। ସ୍ଥାନୀୟ ଲୋକଙ୍କ କହିବା ଅନୁଯାୟୀ, ସ୍ବଳ୍ପ ବୃକ୍ଷ କାଟିବାକୁ ଅନୁମତି ଆଣି ବହୁ ବୃକ୍ଷ କଟାଯାଉଛି, ଯାହାକି ସାଧାରଣ ଲୋକ କିଛି ବୁଝି ପାରୁନାହାନ୍ତି।
