କୁଚିଣ୍ଡା,୧୨ା୮(ଡି.ଏନ.ଏ.): ସମ୍ବଲପୁର ଜିଲା ବାମରା ବ୍ଲକ ମହୁଲପାଲି ଥାନା ଜରାବଗା ପଞ୍ଚାୟତ ସରକାରୀ ହାଇସ୍କୁଲ ଛାତ ଉପରେ ଶୁକ୍ରବାର ଅପରାହ୍ନରେ ୨ଟି ବଡ଼ ଗଛ ଉପୁଡି ପଡି ଶ୍ରେଣୀ କୋଠରୀ ଉପରେ ପଡିଯାଇଥିଲା। ତେବେ ଶ୍ରେଣୀ କୋଠରୀରେ ଥିବା ଛାତ୍ରୀଛାତ୍ର ଅଳ୍ପକେ ବର୍ତ୍ତିଯାଇଛନ୍ତି। ହାଇସ୍କୁଲ ପଛପଟ ପାଚେରୀ ବାହାରେ ଏକ ବହୁ ପୁରୁଣା ଶାଳ ଓ ଆମ୍ବଗଛ ରହିଥିଲା। ଲଗାଣ ବର୍ଷା ଯୋଗୁ ମାଟି ଓଦା ହୋଇ ଶାଳଗଛଟି ଉପୁଡି ଆମ୍ବଗଛ ଉପରେ ପଡିଥିଲା। ଶାଳଗଛର ଓଜନ ସମ୍ଭାଳି ନ ପାରି ଆମ୍ବଗଛ ମଧ୍ୟ ଉପୁଡି ୯ମ ଶ୍ରେଣୀ କୋଠରୀ ଛାତ ଉପରେ ପଡିଯାଇଥିଲା। ଶବ୍ଦ ଶୁଣି ଶ୍ରେଣୀରେ ବସିଥିବା ଛାତ୍ରୀଛାତ୍ରମାନେ ଭୟରେ ଚିତ୍କାର କରି ବାହାରକୁ ଦୌଡି ପଳାଇ ଆସିଥିଲେ। ହେଲେ ଗଛ କୋଠରୀ ଉପରେ ପଡିବାରୁ ଆଜବେଷ୍ଟସ୍ ଭାଙ୍ଗି ଚୁରମାର୍ ହୋଇଯାଇଛି। ଅନ୍ୟପକ୍ଷେ ପ୍ରଧାନ ଶିକ୍ଷକ ବିଭୀଷଣ କିଷାନ ଘଟଣା ସମ୍ପର୍କରେ ବାମରା ବିଡିଓ, ତହସିଲଦାର ଓ ସମ୍ବଲପୁର ଜିଲା ଶିକ୍ଷା ଅଧିକାରୀଙ୍କୁ ଜଣାଇଥିବା କହିଛନ୍ତି।
