ମୁମ୍ବାଇ,୨୭।୯ : ବମ୍ବେ ହାଇକୋର୍ଟର ନାଗପୁର ବେଞ୍ଚ କହିଛନ୍ତି ସ୍ତ୍ରୀ-ସ୍ବାମୀଙ୍କ ଛାଡପତ୍ର ପାଇଁ ଅପସ୍ମାର ସମସ୍ୟା ଏକ କାରଣ ହୋଇ ପାରିବ ନାହିଁ। ହିନ୍ଦୁ ବିବାହ ଆଇନ ଅନୁଯାୟୀ ଏହାକୁ ଛାଡପତ୍ରର କାରଣ ଭାବରେ ବିବେଚନା କରାଯାଇପାରିବ ନାହିଁ। ବେଞ୍ଚ କହିଛି ଅପସ୍ମାରର ଚିକିତ୍ସା ସମ୍ଭବ । ଏହାକୁ ମାନସିକ ବିକୃତି ଭାବରେ ବିବେଚନା କରାଯାଇପାରିବ ନାହିଁ।
ବାସ୍ତବରେ ଜଣେ ୩୩ ବର୍ଷ ବୟସ୍କ ବ୍ୟକ୍ତି ତାଙ୍କ ସ୍ତ୍ରୀଙ୍କଠାରୁ ଛାଡପତ୍ର ପାଇଁ ଆବେଦନ କରିଥିଲେ। ସେ କହିଥିଲେ ଅପସ୍ମାର କାରଣରୁ ତାଙ୍କ ସ୍ତ୍ରୀଙ୍କ ମାନସିକ ସ୍ବାସ୍ଥ୍ୟ ଖରାପ ହୋଇଯାଇଛି। ସେ ତାଙ୍କ ପ୍ରତି ଖରାପ ବ୍ୟବହାର କରନ୍ତି।
ଜଷ୍ଟିସ ବିନୟ ଯୋଶୀ ଏବଂ ଜଷ୍ଟିସ ବାଲ୍ମିକୀ ଏସଏ ମେନେଜେସଙ୍କ ଏକ ଡିଭିଜନ ବେଞ୍ଚ ଏହି ଆବେଦନକୁ ଖାରଜ କରିଛନ୍ତି। କୋର୍ଟ ସମ୍ପୃକ୍ତ ବ୍ୟକ୍ତିଙ୍କୁ ତାଗିଦ ମଧ୍ୟ କରିଛନ୍ତି।
ବ୍ୟକ୍ତି ଜଣକ ତାଙ୍କ ପିଟିଶନରେ କହିଥିଲେ ସେ ତାଙ୍କସ୍ତ୍ରୀଙ୍କ ସହିତ ରହିପାରିବେ ନାହିଁ । ସେ ହିନ୍ଦୁ ବିବାହ ଆଇନର ଧାରା ୧୩ (୧) (୩) ଅନୁଯାୟୀ ଛାଡପତ୍ର ମାଗିଥିଲେ। ଏହି ଧାରା ଅନ୍ତର୍ଗତ ଯଦି କୌଣସି ପୁରୁଷ କିମ୍ବା ମହିଳାଙ୍କର ମାନସିକ ବିକୃତି ରହିଥାଏ ତେବେ ଛାଡ଼ପତ୍ର ମାମଲା କରାଯାଇ ପାରିବ।
ମହିଳା ଜଣକ ବେଞ୍ଚକୁ କହିଥିଲେ ସେ ଅପସ୍ମାରରେ ପୀଡିତ, କିନ୍ତୁ ମାନସିକ ସ୍ତରରେ ସୁସ୍ଥ ଅଛନ୍ତି। ତାଙ୍କର ମାନସିକ ସନ୍ତୁଳନ ଠିକ ଅଛି।
ଶୁଣାଣି ପରେ ବେଞ୍ଚ ଏହି ଆବେଦନକୁ ଖାରଜ କରି କହିଛନ୍ତି ଡାକ୍ତରଙ୍କ ଅନୁଯାୟୀ, ଅପସ୍ମାରରେ ପୀଡିତ ପ୍ରତ୍ୟେକ ବ୍ୟକ୍ତି ସାଧାରଣ ଜୀବନଯାପନ କରିପାରିବେ। ତେଣୁ ଏହି ମାମଲାକୁ ଖାରଜ କରାଯାଉଛି।
