ବରଗଡ଼ ଅଫିସ୍/ସରଣ୍ଡା, ୨୩।୪: (ଡି.ଏନ.ଏ.) ବରଗଡ଼ ଜିଲା ଚାଷୀଙ୍କ ଦୁଃଖ ସରୁନାହିଁ । ଧାନ ଅମଳକ୍ଷମ ଅବସ୍ଥାକୁ ଆସିଥିବାବେଳେ ଫସଲରେ ଅଜଣା ରୋଗପୋକ ଉପଦ୍ରବ ହୋଇଥିଲା। ତାର ପ୍ରତିକାର ନ ସରୁଣୁ ଶନିବାର ସନ୍ଧ୍ୟାରେ ଝଡ଼ବର୍ଷା ସହ କରାମାଡ଼ ହୋଇଛି । ଫଳରେ ଜିଲାର ଅତାବିରା ଏବଂ ବରଗଡ଼ ବ୍ଲକର ବିଭିନ୍ନ ଅଞ୍ଚଳରେ ବ୍ୟାପକ ଧାନ ପସଲ ଉଜୁଡ଼ି ଯାଇଛି । ଅତାବିରା ବ୍ଲକର ଗୋଡ଼ଭଗା, ଅତାବିରା, ପରମାଣପୁର, ଲସ୍ତଲା, ଭୁର୍ସିପାଲି, ଟିଙ୍ଗିପାଲି, ଡୁମ୍ବେରପାଲି, ହିର୍ଲିପାଲି, ଲଚିଦା, ଲୁରୁପାଲି, ନୂଆଁଖଇରପାଲି, ତାଲପଦରଟିକ୍ରା, ବରଗଡ଼ ବ୍ଲକର କୁର୍ଲା, ସର୍ଲା, ନୁନିଆଁ ଜାମପାଲି, ରୁଷିପାଲି, ବନ୍ଦା ସମେତ ଅନେକ ଅଞ୍ଚଳରେ ଧାନ ଫସଲ କ୍ଷତିଗ୍ରସ୍ତ ହୋଇଛି । କାଳବୈଶାଖୀ ଯୋଗୁ ଚାଷୀଙ୍କ ମାନସିକ ସ୍ଥିତି ଦୋହଲି ପଡ଼ିଛି ।
ବରଗଡ଼ ଜିଲାରେ ପ୍ରାୟତଃ ଅଧିକାଂଶ ଧାନ ଅମଳକ୍ଷମ ଅବସ୍ଥାରେ ରହିଛି। ଆଉ ୨ସପ୍ତାହ ପରେ ଜିଲାର ଅତାବିରାରୁ ରବିଧାନ ସଂଗ୍ରହ ପ୍ରକ୍ରିୟା ଆରମ୍ଭ କରିବାକୁ ପ୍ରଶାସନିକ ସ୍ତରରେ ନିଷ୍ପତ୍ତି ହୋଇଛି। ଏହା ପୂର୍ବରୁ ଅଜଣା ରୋଗରେ ଧାନକେଣ୍ଡା ଏବଂ ଗଛର ଅଗ୍ରଭାଗ ଶୁଖିଯିବାରୁ ଏପର୍ଯ୍ୟନ୍ତ ତାର ପ୍ରତିକାର ହୋଇପାରିନାହିଁ। ନେକ୍ ବ୍ଲାଷ୍ଟ ରୋଗ ବୋଲି ତାକୁ କୁହାଯାଉଥିଲେ ସୁଦ୍ଧା କୀଟନାଶକ ପ୍ରୟୋଗ ସତ୍ତ୍ବେ ତାହା ଦମନ ହୋଇ ପାରିନାହିଁ ବୋଲି ଚାଷୀନେତା ହର ବଣିଆ କହିଛନ୍ତି।
ଅନ୍ୟପକ୍ଷେ ଯେଉଁ ଫସଲ ଅଜଣା ରୋଗରୁ ରକ୍ଷା ପାଇଯାଇଥିଲା ଶନିବାର ଅପରାହ୍ନ ୫ଟାରୁ ତୁହାକୁ ତୁହା କରାମାଡ଼ ଯୋଗୁ ତାହା ନଷ୍ଟ ହୋଇ ପଡ଼ିଛି । ଏଥର ଫସଲ ଆରମ୍ଭରୁ ଅନୁକୂଳ ପାଗ ଯୋଗୁ ଧାନ ଭଲ ଅମଳ ହେବ ବୋଲି ଚାଷୀମାନେ ଆଶା ବାନ୍ଧିଥିଲେ । ମାତ୍ର ଧାନ ଅମଳକ୍ଷମ ହେବାକୁ ସମୟ ଯେତିକି ପାଖେଇଲା, ଅଜଣା ରୋଗପୋକ ଏବଂ କାଳବୈଶାଖୀ ପ୍ରଭାବରେ ଫସଲ ନଷ୍ଟ ହେବା ଚାଷୀଙ୍କ ପାଇଁ ଚଡ଼କ ସଦୃଶ ପାଲଟିଛି। କ୍ଷୟକ୍ଷତି ଆକଳନ କରି କ୍ଷତିଗ୍ରସ୍ତ ଚାଷୀଙ୍କୁ ତୁରନ୍ତ କ୍ଷତିପୂରଣ ଦେବାକୁ ଚାଷୀ ମହଲରେ ଦାବି ହୋଇଛି ।
