ନୂଆଦିଲ୍ଲୀ, ୧୧।୫ : ଦେଶରେ ଦେଶଦ୍ରୋହ ଆଇନ ଉପରେ ଚାଲିଥିବା ଶୁଣାଣି ମଧ୍ୟରେ ସୁପ୍ରିମକୋର୍ଟ ବୁଧବାର ଏକ ବଡ ନିଷ୍ପତ୍ତି ନେଇଛନ୍ତି। ଅଦାଲତ ବର୍ତ୍ତମାନ ପର୍ଯ୍ୟନ୍ତ ଆଇନକୁ ସ୍ଥଗିତ ରଖିଛନ୍ତି। ବିଶେଷ କଥା ହେଉଛି ଆଇନର ସମୀକ୍ଷା ବିଷୟରେ କେନ୍ଦ୍ର ସରକାର ଆଲୋଚନା କରିଛନ୍ତି। ଅଦାଲତ କହିଛନ୍ତି ଯେ ସମୀକ୍ଷା ସମାପ୍ତ ନହେବା ପର୍ଯ୍ୟନ୍ତ ଏହି ସ୍ଥଗିତାଦେଶ ଜାରି ରହିବ।
ଭବିଷ୍ୟତରେ ଧାରା ୧୨୪-ଏ ଅନ୍ତର୍ଗତ ଥିବା ଏଫ୍ଆଇଆର୍ ଗୁଡିକ କେବଳ ପୋଲିସ ଅଧୀକ୍ଷକ କିମ୍ବା ତଦୁର୍ଦ୍ଧ୍ୱ ଅଧିକାରୀଙ୍କ ଦ୍ୱାରା ଅନୁସନ୍ଧାନ ପରେ ପଞ୍ଜୀକୃତ ହୋଇପାରିବ ବୋଲି କେନ୍ଦ୍ର ସରକାର ପ୍ରସ୍ତାବ ଦେଇଛନ୍ତି। ସରକାର କହିଛନ୍ତି ଯେ ବିଚାରାଧୀନ ମାମଲାରେ ଜାମିନର ଶୀଘ୍ର ବିଚାର ପାଇଁ କୋର୍ଟ ନିର୍ଦ୍ଦେଶ ଦେଇପାରିବେ।
ଆବେଦନକାରୀଙ୍କ ପକ୍ଷରୁ ହାଜର ହୋଇଥିବା ଆଇନଜୀବୀ କପିଲ ସିବଲ କହିଛନ୍ତି ଯେ ସାରା ଦେଶରେ ୮୦୦ରୁ ଅଧିକ ଦେଶଦ୍ରୋହ ମାମଲା ରୁଜୁ ହୋଇଛି। ଏହା ଯୋଗୁ ୧୩ ହଜାରରୁ ଅଧିକ ଲୋକ ଜେଲରେ ଅଛନ୍ତି।
ତେବେ ଏସବୁ ଅଭିଯୁକ୍ତମାନେ ଜାମିନ ପାଇଁ ଅଦାଲତରେ ଆବେଦନ କରିପାରିବେ ବୋଲି ଶୀର୍ଷକୋର୍ଟ କହିଛନ୍ତି।
