ନନ୍ଦପୁର, ୨୭।୫ (ଡି.ଏନ୍.ଏ.): ବିପଦସଙ୍କୁଳ ଅବସ୍ଥାରେ ନିର୍ମାଣ ସାମଗ୍ରୀ ଯଥା ବାଲି, ଚିପ୍ସ, ପଥର ଆଦି ଖୋଲାମେଲାରେ ପରିବହନ କରାଯାଉଛି। ଏଥିସହ ପ୍ରାୟ ୨୦ରୁ ୩୦ଜଣ ଶ୍ରମିକ ମଧ୍ୟ ଏଥିରେ ଯାଉଛନ୍ତି। ଏଭଳି ଟ୍ରକ୍, ଟ୍ରାକ୍ଟର ପ୍ରତି ପୋଲିସ ଓ ପରିବହନ ବିଭାଗର ନଜର ପଡୁନାହିଁ। ଏଭଳି ପରିବହନ ପ୍ରତି ବିଭାଗୀୟ କଟକଣା ଥିଲେ ମଧ୍ୟ ଅଣଦେଖା କରାଯାଉଛି। ଦୁଇ ବିଭାଗ ପକ୍ଷରୁ ଏଭଳି ପରିବହନକୁ ନ ରୋକାଯିବାରୁ ତାହା ବଡ଼ ବଡ଼ ଦୁର୍ଘଟଣାକୁ ଏକରକମ ନିମନ୍ତ୍ରଣ ତଥା ସମର୍ଥନ କରାଯାଉଛି ବୋଲି ବୁଦ୍ଧିଜୀବୀ କହିବା ସହ ଅସନ୍ତୋଷ ବ୍ୟକ୍ତ କରିଛନ୍ତି। ନନ୍ଦପୁର ବ୍ଲକରେ ଏହାର ଉଦାହରଣ ସବୁ ଦେଖିବାକୁ ମିଳୁଛି।
ସକାଳୁ ଜୟପୁରରୁ ବିଶାଖାପାଟଣାକୁ ସଂଯୋଗ କରୁଥିବା ରାଜ୍ୟ ରାଜପଥର ଏକ ଚିପ୍ସ (ଗୋଡ଼ି) ବୋଝେଇ ଟ୍ରକ୍ ପାଡୁଆ ପଟୁ ଚାଟୁଆ ଯାଉଥିଲା। ଏହି ସମୟରେ ପଛପଟୁ ଗୋଡ଼ି ବିଛାଡ଼ି ହୋଇ ପଡ଼ୁଥିଲା। କିନ୍ତୁ ଚାଳକ ଟ୍ରକ୍ରେ ଜୋରରେ ବାଜୁଥିବା ଗୀତ ଭୋଳରେ ମଗ୍ନଥିବା ପଥଚାରୀ କହିଛନ୍ତି। ପ୍ରାୟ ୫କି.ମି. ଦୂର ରାସ୍ତାରେ ଗୋଡ଼ି ବିଛାଡ଼ିହୋଇ ପଡ଼ିଛି। ଦୁଇ ତିନି ଜାଗାରେ ରାସ୍ତାର ସମ୍ପୂର୍ଣ୍ଣ ଭାଗରେ ପ୍ରାୟ ୫ଇଞ୍ଚ ବହଳର ଗୋଡ଼ି ପଡିଛି, ଯାହା ଦୁର୍ଘଟଣାର କାରଣ ସାଜି ଧନ ଜୀବନ କ୍ଷତି ଘଟାଇପାରେ ବୋଲି ପଥଚାରୀ ଆଶଙ୍କା କରିଛନ୍ତି। ଏହି ରାସ୍ତାରେ ଥିବା ବାଲି ସଇରାତଗୁଡ଼ିକରୁ ମଧ୍ୟ ସମାନ ଢଙ୍ଗରେ ବାଲି ପରିବହନ କରାଯାଉଥିବା ଅଭିଯୋଗ ହୋଇଛି। ବାଲି ବୋଝେଇ ଗାଡ଼ି ଉପରେ କୌଣସି ଆବରଣ କରାଯାଉ ନାହିଁ। ଉକ୍ତ ବାଲି ଉପରେ ୨୦ ରୁ ୩୦ ଜଣ ଶ୍ରମିକଙ୍କୁ ବସାଇ ନିଆଯାଉଛି। ଏଭଳି ବିପଦସଙ୍କୁଳ ପରିବହନ ପ୍ରତି ପୋଲିସ, ପରିବହନ ଓ ରାଜସ୍ବ ବିଭାଗ କର୍ତ୍ତୃପକ୍ଷଙ୍କ ଦୃଷ୍ଟି ପଡୁ ନ ଥିବା କହି ତୁରନ୍ତ ଏଥିପ୍ରତି ଦୃଷ୍ଟିଦେବାକୁ ଅନୁରୋଧ କରିଛନ୍ତି। ପାଡୁଆ ଥାନାଧିକାରୀ ସବ୍ୟସାଚୀ ଶତପଥୀଙ୍କ ଦୃଷ୍ଟି ଆକର୍ଷଣ କରିବାରେ ଗୋଡ଼ି ଖସିବା ଘଟଣାକୁ ନିନ୍ଦା କରିବା ସହ ଆଗକୁ ଏଭଳି ପରିବହନ ପ୍ରତି କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
